ഒരു ദിവസം മുന്നേ റിലീസ്; പുഴുവിന് പ്രേക്ഷകരിൽ നിന്നും ലഭിക്കുന്നത് മികച്ച സ്വീകരണം

യു സർട്ടിഫിക്കറ്റ് ലഭിച്ച ചിത്രം പാൻ ഇന്ത്യ തലത്തിൽ അഞ്ചു ഭാഷകളിൽ ആണ് റിലീസ് ചെയ്തത്. ഒരു മണിക്കൂർ അൻപത്തി അഞ്ച് മിനിറ്റ് മാത്രമാണ് ചിത്രത്തിന്റെ ദൈർഖ്യം.

വിധേയനിലും പാലേരിമാണിക്യത്തിലുമാണ് ഇതിനുമുന്നേ നാം മമ്മൂട്ടിയുടെ നെഗറ്റീവ് റോളുകൾ കണ്ടിട്ടുള്ളത്. പുഴുവിലെ മമ്മൂട്ടിയുടെ റോൾ വളരെ വ്യത്യസ്തമാണെന്ന് അദേഹം തന്നെ അടുത്തിടെ പറയുകയുണ്ടായി.

ചിത്രത്തിന്റെ ടീസർ ഏറെ ശ്രദ്ധ പിടിച്ചുപറ്റിയിരുന്നു. ആകാംഷ ഉണർത്തുന്ന പശ്ചാത്തല സംഗീതവും നിഗൂഢതകൾ നിറഞ്ഞ മമ്മൂട്ടിയുടെ കഥാപാത്രവുമാണ് പ്രേക്ഷകരെ ഏറെ ആകർഷിച്ചത്. അതുപോലെ തന്നെയായിരുന്നു ട്രെയിലറും.

ചിത്രം സോണി ലിവിൽ എത്തിയതോടെ പ്രേക്ഷകരുടെ ഭാഗത്ത് നിന്നും ചിത്രത്തെപ്പറ്റിയുള്ള പ്രതികരണങ്ങൾ വന്നുതുടങ്ങി. ചിത്രം കണ്ടിറങ്ങുന്നവർക്ക് മമ്മൂട്ടിയുടെ കഥാപാത്രത്തോട് ദേഷ്യം തോന്നുന്ന തരത്തിൽ ഗംഭീരമായാണ് അദ്ദേഹം കഥാപാത്രത്തെ അവതരിപ്പിച്ചിരിക്കുന്നതെന്ന് പ്രേക്ഷകർ സാക്ഷ്യപ്പെടുത്തുന്നു.

പാർവതി തിരുവൊത്തതും ചിത്രത്തിൽ ഗംഭീര പ്രകടനമാണ് കാഴ്ചവച്ചിരിക്കുന്നത്. റത്തീന സംവിധാനം ചെയ്ത ആദ്യ ചിത്രമാണെങ്കിലും അതി ഗംഭീരമാണ് ചിത്രത്തിന്റെ മേക്കിങ് എന്ന അഭിപ്രായമാണ് പ്രേക്ഷകർക്ക് ഉള്ളത്. എന്നാൽ ചിത്രം തീയറ്റർ റിലീസിനേക്കാൾ ഒ ടി ടി റിലീസിന് പറ്റിയ ചിത്രമാണെന്നും പ്രേക്ഷകർ പറയുന്നു.

ഉണ്ടയുടെ കഥാകൃത്തായ ഹർഷാദ് ആണ് പുഴുവിന്റെ കഥയൊരുക്കുന്നത്. വൈറസിന് ശേഷം ഷറഫ്, സുഹാസ് കൂട്ടുകെട്ട് ഹര്‍ഷാദിനൊപ്പം ചേ‍‍ർന്ന് തിരക്കഥയൊരുക്കുന്ന ചിത്രമാണിത്.

മമ്മൂട്ടി, പാർവതി എന്നിവരെ കൂടാതെ, നെടുമുടി വേണു, ഇന്ദ്രൻസ്, മാളവിക മോനോൻ എന്നിവരും ചിത്രത്തിൽ അഭിനയിക്കുന്നുണ്ട്.

പേരൻപ്, ധനുഷ് ചിത്രം കർണ്ണൻ, അച്ചം യെൻപത് മടമയാടാ, പാവൈ കഥൈകൾ തുടങ്ങിയ സിനിമകളുടെ ഛായാഗ്രാഹകനായ തേനി ഈശ്വറാണ് ചിത്രത്തിന്റെ ക്യാമറമാൻ. മനു ജഗദ് ആണ് കലാസംവിധാനം.