ഹോം

വാർത്ത

തമിഴ് സിനിമാലോകത്ത് നിന്നും നിര്‍മ്മിച്ച ബ്രഹ്മാണ്ഡ ചിത്രമാണ് 2.0. രജനികാന്തിനെ നായകനാക്കി ശങ്കര്‍ സംവിധാനം ചെയ്ത ചിത്രം 2018 നവംബര്‍ 29 ന് തിയറ്ററുകളിലേക്ക് എത്തിയത്. അറുന്നൂറ് കോടിയോളം മുതല്‍ മുടക്കിലൊരുക്കിയ സിനിമയ്ക്ക് ആഗോളതലത്തില്‍ വമ്പന്‍ റിലീസ് ആയിരുന്നു. എന്നാല്‍ പ്രതീക്ഷിച്ച വിജയം നേടിയെടുക്കാന്‍ ചിത്രത്തിന് സാധിച്ചിരുന്നില്ല.

എന്നാല്‍ അടുത്തിടെ സിനിമ ചൈനയിലേക്ക് കൂടി പ്രദര്‍ശനത്തിന് എത്തിയിരിക്കുകയാണ്. ചൈനയിലെ പ്രീ-റിലീസ് തന്നെ കോടികള്‍ വാരിക്കൂട്ടിയെന്നായിരുന്നു റിപ്പോര്‍ട്ടുകള്‍. 48,000 സ്‌ക്രീനുകളിലായിരുന്നു സിനിമ അവിടെ റിലീസ് ചെയ്തത്. ചൈനയില്‍ റിലീസ് ചെയ്യുന്ന ആദ്യ തമിഴ് ചിത്രമാണെന്നുള്ളതും രജനികാന്തിന്റെ ഏറ്റവും വലിയ ചിത്രമാണെന്നുള്ള പ്രത്യേകതയും സിനിമയ്ക്കുണ്ട്. ഇപ്പോഴിതാ ചൈനയിലെത്തിയ സിനിമയുടെ കളക്ഷന്‍ റിപ്പോര്‍ട്ടുകള്‍ വന്നിരിക്കുകയാണ്.

റിലീസ് ദിവസം 9.5 കോടിയായിരുന്നു കളക്ഷന്‍. വെള്ളിയാഴ്ചയായിരുന്നു സിനിമ റിലീസിനെത്തിയത്. പിന്നാലെ ചിത്രത്തിന്റെ പുതിയ വിശേഷങ്ങള്‍ സോഷ്യല്‍ മീഡിയ വഴി വൈറലായി. ചൈനയില്‍ 2.0 ജൂലൈ മാസം തന്നെ റിലീസിനെത്തിക്കാന്‍ തീരുമാനിച്ചെങ്കിലും ഡിസ്‌നിയുടെ ലയണ്‍ കിംഗ് ആ സമയത്ത് റിലീസ് ചെയ്യുന്നതിനാല്‍ രജനികാന്ത് മാറ്റി വെക്കുകയായിരുന്നു.

രജനികാന്തിനൊപ്പം ബോളിവുഡില്‍ നിന്നും അക്ഷയ് കുമാറും എമി ജാക്സനും അഭിനയിച്ചിരുന്നു. മലയാളത്തില്‍ നിന്നും കലാഭവന്‍ ഷാജോണ്‍ തുടങ്ങി വമ്പന്‍ താരങ്ങളായിരുന്നു ചിത്രത്തില്‍ കേന്ദ്രകഥാപാത്രങ്ങളെ അവതരിപ്പിച്ചിരുന്നത്. ദൃശ്യഭംഗിയും സൗണ്ട് എഫ്കട്സുമടക്കം പ്രേക്ഷകരെ അതിശയിപ്പിച്ച ഒട്ടനവധി ഘടകങ്ങളും സിനിമയിലുണ്ടായിരുന്നു.