രഞ്ജിത്തില്‍ മമ്മൂട്ടി രക്ഷകനെ കാണുന്നു

By Ajith Babu

| Published: Thursday, May 24, 2012, 13:22 [IST]

പ്രാഞ്ചിയേട്ടന്‍ ആന്റ് ദി സെയിന്റിന് ശേഷം മമ്മൂട്ടിയും രഞ്ജിത്തും വീണ്ടുമൊന്നിയ്ക്കുമ്പോള്‍ പ്രേക്ഷക പ്രതീക്ഷകള്‍ വാനോളമുയരുമെന്നുറപ്പാണ്. അതേസമയം തന്റെ എല്ലാ തിരക്കുകളും മാറ്റിവച്ചു കൊണ്ട് രഞ്ജിത്ത് ചിത്രം ജൂണില്‍ ചെയ്യാന്‍ തയ്യാറാവുന്നതിലൂടെ മമ്മൂട്ടി ലക്ഷ്യമിടുന്നത് മറ്റുചിലതെന്ന് വ്യക്തമാവുകയാണ്.

ഉറുമി ഫെയിം ശങ്കര്‍ രാമകൃഷ്ണന്‍ തിരിക്കഥയൊരുക്കുന്ന രഞ്ജിത്ത് ചിത്രം തനിയ്‌ക്കൊരു തിരിച്ചുവരവിന് വഴിയൊരുക്കുമെന്നാണ് മമ്മൂട്ടിയുടെ പ്രതീക്ഷ. കയ്യൊപ്പ്, പാലേരി മാണിക്യം, പ്രാഞ്ചിയേട്ടന്‍ ആന്റ് ദി സെയിന്റ് എന്നീ സിനിമകള്‍ തനിയ്ക്ക് സമ്മാനിച്ച രഞ്ജിത്തില്‍ ഒരു രക്ഷകനെയാണ് മമ്മൂട്ടി കാണുന്നതെന്ന് ചുരുക്കം.

നേരത്തെ ചില ഇമേജുകളില്‍ തളച്ചിടപ്പെട്ട പൃഥ്വിയെ ഇന്‍ഡ്യയില്‍ റുപ്പിയിലൂടെ തിരിച്ചുകൊണ്ടുവരാന്‍ രഞ്ജിത്തിന് സാധിച്ചിരുന്നു. ഇതുപോലൊരു ഇമേജ് ബ്രേക്കിങ് തന്നെയാണ് മമ്മൂട്ടിയും ആഗ്രഹിയ്ക്കുന്നത്.

മോഹന്‍ലാലിനെ നായകനാക്കിയൊരുക്കിയ സ്പിരിറ്റിന് ശേഷമാണ് രഞ്ജിത്ത് മമ്മൂട്ടി ചിത്രത്തിന്റെ ജോലികള്‍ ആരംഭിയ്ക്കുക.