മമ്മൂക്ക അന്ന് നോ പറഞ്ഞിരുന്നെങ്കില്‍ ഞാന്‍ എന്ന സംവിധായകന്‍ ഇല്ല, വെളിപ്പെടുത്തി ജോമോന്‍

അതേസമയം മമ്മൂട്ടിയെയും സാമ്രാജ്യത്തെ കുറിച്ച് സംവിധായകന്‍ ജോമോന്‍ പറഞ്ഞ കാര്യങ്ങള്‍ സോഷ്യല്‍ മീഡിയയില്‍ വൈറലായിരുന്നു. മമ്മൂട്ടി ടൈംസിന്റെ അഭിമുഖത്തിലാണ് മെഗാസ്റ്റാറിനെ കുറിച്ച് മനസുതുറന്ന് സംവിധായകന്‍ എത്തിയത്. മമ്മൂക്കയെ എന്നാണ് ആദ്യം കണ്ടതെന്ന് ഓര്‍മ്മയില്ലെന്ന് ജോമോന്‍ പറയുന്നു. അന്ന് ഞാന്‍ ഐവി ശശി സാറിന്‌റെ അസിസ്റ്റന്റ് ആയി വര്‍ക്ക് ചെയ്യുന്ന സമയത്ത് മമ്മൂക്കയുളള സിനിമയിലും ജോലി ചെയ്തിരുന്നു.

അപ്പോ മിക്ക ദിവസവും മമ്മൂക്കയെ കാണാറുണ്ട്. അദ്ദേഹത്തിനൊപ്പം സമയം ചെലവഴിച്ചിട്ടുണ്ട്. ആരുമായും പ്രത്യേകിച്ച് ഒന്നുമില്ല മമ്മൂക്കയ്ക്ക്. എല്ലാവരുമായും സൗഹൃദമുളള ആളാണ് മമ്മൂക്ക. എല്ലാ കാര്യങ്ങളിലും വ്യക്തമായ ധാരണയുണ്ട്. എല്ലാത്തിനെ കുറിച്ച് മനസിലാക്കുകയും ചെയ്യും. എനിക്ക് മമ്മൂക്കയെ ഭയങ്കര ഇഷ്ടമാണ്. ഷൂട്ടിംഗ് സമയത്തേക്കാളും അടുപ്പം മമ്മൂക്കയുമായി ഡബ്ബിംഗ് സമയത്താണ് ഉണ്ടായിട്ടുളളത്.

ആ സമയത്താണ് കൂടുതല്‍ സംസാരിക്കാനൊക്കെ പറ്റുക. ഞങ്ങള്‍ സൗഹൃദത്തിലായതും ആ സമയത്താണ്. പുതുമുഖ സംവിധായകരെ കൂടുതല്‍ കൊണ്ടുവന്നതില്‍ ഇന്ത്യയില്‍ മുന്നില്‍ നില്‍ക്കുന്ന ഹീറോയാണ് മമ്മൂക്കയെന്നും സംവിധായകന്‍ പറയുന്നു. സംവിധാനം ചെയ്ത ഒമ്പത് സിനിമകളില്‍ അഞ്ചിലും മമ്മൂക്കയാണ് നായകനായത്. അത് പ്രത്യേകിച്ച് തീരുമാനിച്ചൊന്നും ചെയ്തതല്ലെന്നും കഥയ്ക്ക് അദ്ദേഹം അനുയോജ്യനാണെന്ന് തോന്നിയപ്പോഴാണ് മമ്മൂക്കയുമായി സിനിമകള്‍ ചെയ്തതെന്നും ജോമോന്‍ പറഞ്ഞു.

മമ്മൂക്കയുമായി മറക്കാന്‍ പറ്റാത്ത അനുഭവം സാമ്രാജ്യം എന്ന സിനിമയാണ്. ഗുരുവായൂരില്‍ ഷൂട്ടിംഗ് സമയത്ത് കഥ പറയാന്‍ ചെന്നപ്പോള്‍ എനിക്ക് കഥ കേള്‍ക്കേണ്ട, നീയൊന്നും സിനിമ ചെയ്യാന്‍ ആയിട്ടില്ല എന്നെങ്ങാനും അദ്ദേഹം പറഞ്ഞിരുന്നെങ്കില്‍ എനിക്ക് ഈ കരിയര്‍ ഉണ്ടാവുമായിരുന്നില്ല. ജോമോന്‍ എന്ന ഡയറക്ടറും ഉണ്ടാവില്ല. ആ കഥ ഇന്ത്യയിലെ താരങ്ങളില്‍ വേറെ ആര്‍ക്കും ചെയ്യാനും കഴിയില്ല. ആരുമില്ല.

ചിരഞ്ജീവിക്ക് പോലും സാധിക്കില്ല. അന്ന് മമ്മൂക്ക നോ പറഞ്ഞിരുന്നെങ്കില്‍ ഒന്നും നടക്കില്ലായിരുന്നു. അപ്പോ സിനിമ യാഥാര്‍ത്ഥ്യമായതിനെ കുറിച്ച് തന്നെയാണ് എന്നും ഓര്‍ക്കേണ്ടത്. മമ്മൂക്ക സാമ്രാജ്യത്തിന്‌റെ കഥ വായിക്കുന്നത് ചെന്നൈയില്‍ വെച്ചിട്ടാണ്. അവിടെ മമ്മൂക്ക സ്ഥിരമായി താമസിക്കുന്ന ഒരു ഹോട്ടലുണ്ട്. അന്ന് കഥ പറഞ്ഞപ്പോള്‍ നന്നായിട്ടുണ്ട്. ഉടന്‍ ഷൂട്ടിംഗ് ആരംഭിക്കാം എന്ന് പറഞ്ഞു. അങ്ങനെയാണ് സാമ്രാജ്യം യാഥാര്‍ത്ഥ്യമായത്. അഭിമുഖത്തില്‍ സംവിധായകന്‍ പറഞ്ഞു.