കേരളത്തിലെ രജനികാന്ത് ആവണം: പണ്ഡിറ്റ്

കേരളത്തിലെ രജനികാന്താവുകയാണ് തന്റെ സ്വപ്‌നമെന്ന് കൃഷ്ണനും രാധയും ഫെയിം സന്തോഷ് പണ്ഡിറ്റ്. കൈരളി ടിവിയുടെ കേള്‍ക്കൂ കേള്‍പ്പിക്കൂ എന്ന ചര്‍ച്ചയില്‍ പങ്കെടുക്കുമ്പോഴാണ്‌ ഈ ആഗ്രഹം വെളിപ്പെടുത്തിയത്. കറുത്തുപോയത് എന്റെ കുറ്റമല്ല. കറുപ്പ് നിറമുള്ള രജനികാന്ത് സൂപ്പര്‍ സ്റ്റാറാണ്. അതുപോലെ ആവണമെന്നാണ് എന്റെയും ആഗ്രഹം-ഒരു ചോദ്യത്തിനു മറുപടിയായി പണ്ഡിറ്റ് വ്യക്തമാക്കി.

അഞ്ചു ലക്ഷം രൂപ മുടക്കിയെടുത്ത സിനിമ അഞ്ചുകോടിയാണ് നേട്ടമുണ്ടാക്കിയത്. മലയാള സിനിമകള്‍ മുഴുവന്‍ എട്ടുനിലയില്‍ പൊട്ടുമ്പോള്‍ എന്റെ സിനിമ എന്തുകൊണ്ട് വിജയിക്കുന്നുവെന്ന് പരിശോധിക്കണം. കോട്ടിടുന്നത് ആളുകളുടെ ശ്രദ്ധ ആകര്‍ഷിക്കാന്‍ തന്നെയാണ്. പരിപാടികളില്‍ പങ്കെടുക്കുമ്പോള്‍ ഒരു സാധാരണ മനുഷ്യനായ എന്നെ ആളുകള്‍ എളുപ്പത്തില്‍ തിരിച്ചറിയുന്നത് ഈ കോട്ടിലൂടെയാണ്.

കോട്ടിടുന്നവരെല്ലാം അബ്‌നോര്‍മലാണെങ്കില്‍ മലയാളസിനിമയിലെ ഒട്ടുമിക്ക നടന്മാരും പല ചാനല്‍ പ്രവര്‍ത്തകരും അബ്‌നോര്‍മലാണ്. ബാത്ത് റൂമില്‍ പോലും പാട്ടുപാടാതിരുന്ന ഞാന്‍ ആദ്യ സംരംഭത്തില്‍ ഇത്ര വിജയിച്ചെങ്കില്‍ അടുത്ത പടത്തില്‍ കൂടുതല്‍ മെച്ചപ്പെടുത്താന്‍ ശ്രമിക്കും.

പുതിയ പുതിയ പ്രൊജക്ടുകള്‍ പ്രഖ്യാപിക്കുന്നതിന് എനിക്ക് മടിയൊന്നുമില്ല. എന്റെ സിനിമകള്‍ക്കു കോടികളൊന്നും വേണ്ട. അഞ്ചു ലക്ഷത്തോളം രൂപയുണ്ടെങ്കില്‍ ഞാന്‍ സിനിമ പിടിക്കും. ചലച്ചിത്ര സംവിധായകനായ ശാന്തിവിള ദിനേശ്, ഈസ്റ്റ് കോസ്റ്റ് വിജയന്‍, സാങ്കേതികവിദഗ്ധനായ സത്യന്‍ എന്നിവര്‍ ചര്‍ച്ചയില്‍ പങ്കെടുത്തു.

അടുത്ത പേജില്‍
പണ്ഡിറ്റിന്റെ ലാഭക്കണക്ക് വെറും പുളു