സെക്കന്റ് ഷോയും കോപ്പിയടി?

By Ajith Babu

| Published: Tuesday, February 14, 2012, 14:16 [IST]

മോളിവുഡില്‍ വീണ്ടുമൊരു കോപ്പിയടി വിവാദം കൊഴുക്കുന്നു. സൂപ്പര്‍താരം മമ്മൂട്ടിയുടെ മകന്‍ ദുല്‍ഖര്‍ സല്‍മാന്റെ അരങ്ങേറ്റ ചിത്രമായ സെക്കന്റ് ഷോയാണ് കോപ്പിയടി വിവാദത്തില്‍ കുരുങ്ങുന്നത്. എന്നാല്‍ മലയാളത്തിലെ മറ്റു കോപ്പിയടി സിനിമകളില്‍ നിന്നും വ്യത്യസ്തമായൊരു പാതയിലൂടെയാണ് സെക്കന്റ് ഷോ സഞ്ചരിയ്ക്കുന്നതത്രേ.

ഹോളിവുഡ്-ബോളിവുഡ് സിനിമകളുടെ കഥകള്‍ അതേപടി മലയാളത്തിലേക്ക് പറിച്ചുനടുന്ന രീതിയില്‍ നിന്നും മാറി, ഒരു സംവിധായകന്റെ ശൈലി അപ്പാടെ അനുകരിയ്ക്കുന്ന രീതിയാണ് സെക്കന്റ് ഷോയില്‍ അവലംബിച്ചിരിയ്ക്കുന്നതെന്നാണ് ആക്ഷേപം.യ

ഹോളിവുഡ് ആക്ഷന്‍-ത്രില്ലര്‍ സിനിമകളിലൂടെ പ്രശസ്തനായ ഗൈ റിച്ചിയുടെ റിവോള്‍വര്‍, സ്‌നാച്ച്, ഷെര്‍ലക്ക് ഹോംസ് എന്നീ ചിത്രങ്ങളിലെ കഥ പറയുന്ന രീതിയും സംഗീതവും എഡിറ്റിങ് സ്റ്റൈലുമൊക്കെയാണ് സെക്കന്റ് ഷോയില്‍ അനുകരിച്ചിയ്ക്കുന്നതത്രേ.

സാദാ അധോലോകകഥയെ ഹോളിവുഡ്-ലാറ്റിനമേരിയ്ക്കന്‍ സ്‌റ്റൈലില്‍ ഒരുക്കിയാണ് സംവിധായകന്‍ ശ്രീനാഥ് രാജേന്ദ്രന്‍ കയ്യടി നേടുന്നതെന്നും പ്രേക്ഷകര്‍ ചൂണ്ടിക്കാണിയ്ക്കുന്നു. അത്രയധികം കണ്ടുപരിചയമില്ലാത്ത ടെക്‌നിക്ക് പ്രേക്ഷകര്‍ക്ക ഇഷ്ടപ്പെട്ടുവെന്നാണ് ബോക്‌സ് ഓഫീസ് റിപ്പോര്‍ട്ടുകള്‍ സൂചിപ്പിയ്ക്കുന്നത്. കഥയും കഥാപാത്രങ്ങളും അതേപടി കോപ്പിയടിച്ച് റീമേക്കെന്ന ഓമനപ്പേരില്‍ സിനിമയെടുക്കുന്നതിനെക്കാളും ഭേദമാണിതെന്നും പ്രേക്ഷകര്‍ അഭിപ്രായപ്പെടുന്നുണ്ട്.