ഒന്നുകില്‍ ക്യാമറാമാനെ മാറ്റണം അല്ലെങ്കില്‍ എന്നെ, ഷാജി കൈലാസിന് മോഹന്‍ലാല്‍ നല്‍കിയ വെല്ലുവിളി!

ജഗന്നാഥന്‍ ഉണ്ണിമായയെ വിരട്ടുന്ന രംഗം

ആറാം തമ്പുരാന്‍ ചിത്രീകരണത്തിനിടയിലെ അനുഭവങ്ങളെക്കുറിച്ചാണ് സംവിധായകന്‍ വിവരിച്ചിട്ടുള്ളത്. ഫേസ്ബുക്ക് പോസ്റ്റ് ഇതിനോടകം തന്നെ സോഷ്യല്‍ മീഡിയയിലൂടെ വൈറലായിട്ടുണ്ട്. സിനിമയില്‍ ജഗന്നാഥന്‍ ഉണ്ണിമായയെ വിരട്ടുന്ന രംഗം ചിത്രീകരിക്കുന്നതിനിടയിലെ സംഭവത്തെക്കുറിച്ചാണ് അദ്ദേഹം വിവരിച്ചിട്ടുള്ളത്.

എത്ര ശ്രമിച്ചിട്ടും ശരിയാവുന്നില്ല

ശങ്കരാടി, കുതിരവട്ടം പപ്പു, കുഞ്ചന്‍, തുടങ്ങിയ താരങ്ങളെല്ലാം രംഗത്തുണ്ട്. അവരുടെ മുന്നില്‍ വെച്ച് മോഹന്‍ലാല്‍ ഡയലോഗ് പറയുന്ന രംഗമായിരുന്നു ചിത്രീകരിച്ചുകൊണ്ടിരുന്നത്. എന്നാല്‍ ചിത്രീകരണത്തിനിടയില്‍ സാങ്കേതികമായി ചില പിഴവുകള്‍ സംഭവിക്കുകയും നിരവധി തവണ ശ്രമിച്ചിട്ടും അത് ശരിയാകാതെ വരികയും ചെയ്തു.

മോഹന്‍ലാലിന്റെ കുഴപ്പമായിരുന്നില്ല

സാങ്കേതികമായ കുഴപ്പങ്ങളായിരുന്നു അത്. കുറേ ശ്രമിച്ചിട്ടും ശരിയാകാതെ വന്നപ്പോള്‍ ഇനി പെര്‍ഫെക്ടായിട്ട് റിഹേഴ്‌സല്‍ എടുത്തിട്ട് ചെയ്താല്‍ മതിയെന്നായിരുന്നു താന്‍ നിര്‍ദേശിച്ചതെന്ന് ഷാജി കൈലാസ് വിവരിക്കുന്നു.

മോഹന്‍ലാലിന്റെ അസാമാന്യ പ്രകടനം

രണ്ടാമത്തെ ടേക്ക് തുടരുന്നതിനിടയില്‍ മോഹന്‍ലാല്‍ അസാമാന്യ പ്രകടനം നടത്തിയിരുന്നു. ഒന്‍പതാമത്തെ ടേക്കിലേക്ക് കടക്കുന്നതിനിടയില്‍ അക്കാര്യത്തെക്കുറിച്ച് താരത്തോട് സൂചിപ്പിച്ചിരുന്നു.

എന്ത് ചെയ്തുവെന്ന് പിടിയില്ല

രണ്ടാമത്തെ ടേക്കില്‍ താന്‍ എന്താണ് ചെയ്തതെന്നതിനെക്കുറിച്ച് ഒരു പിടിയുമില്ലെന്നായിരുന്നു മോഹന്‍ലാലിന്റെ പ്രതികരണം. ക്യാമറയ്ക്ക് മുന്നില്‍ നില്‍ക്കുമ്പോള്‍ അഭിനയം വരുന്നതാണെന്നും അത് അപ്പോള്‍ മാത്രമേ വരൂയെന്നുമായിരുന്നു താരം പറഞ്ഞത്.

ഒന്നുകില്‍ എന്നെ അല്ലെങ്കില്‍ ക്യാമറമാനെ മാറ്റണം

ഈ ടേക്കിലും നന്നായില്ലെങ്കില്‍ ഒന്നുകില്‍ എന്നെ അല്ലെങ്കില്‍ ക്യാമറമാനെ മാറ്റണമെന്നും മോഹന്‍ലാല്‍ നിര്‍ദേശിച്ചിരുന്നു. രണ്ടുപേരെയും മാറ്റുന്നില്ലെന്ന് പറഞ്ഞ് പോയി ഷോട്ടെടുത്തു. അത് ഓക്കെയാവുകയും ചെയ്തു.

സംവിധായകന് ലഭിക്കുന്ന പുണ്യം

അന്ന് മുതല്‍ ഇന്നുവരെ ചിന്തിച്ചിട്ടും ഉത്തരം കിട്ടാത്ത ചോദ്യമാണ് എന്തുകൊണ്ട് അദ്ദേഹം ആ ഷോട്ട് മാറ്റാന്‍ ആവശ്യപ്പെട്ടില്ലെന്ന കാര്യം. സംവിധായകനെ അത്രത്തോളം ബഹുമാനിക്കുകയും വിശ്വസിക്കുകയും ചെയ്യുന്ന ആര്‍ടിസ്റ്റാണ് അദ്ദേഹമെന്നും സംവിധായകന്‍ കുറിച്ചിട്ടുണ്ട്.

സംവിധായകന്റെ നടന്‍

സംവിധായകന്റെ നടനാണ് മോഹന്‍ലാല്‍. അദ്ദേഹത്തെ എപ്രകാരം ഉപയോഗിക്കുന്നുവെന്നതിലാണ് സംവിധായകന്റെ മിടുക്ക്. അദ്ദേഹത്തെ പൂര്‍ണ്ണമായി ഉപയോഗിച്ച ചിത്രമാണ് വില്ലന്‍.

വില്ലന്റെ വിജയം

തുടക്കം മുതല്‍ ഒടുക്കം വരെ മോഹന്‍ലാലിന്റെ മൂഡ് നില നിര്‍ത്തിയ ചിത്രമാണ് വില്ലന്‍. കണ്ണ് നിറഞ്ഞിരിക്കുമ്പോള്‍ പോലും ചിരിക്കുന്ന ആ മുഖം വല്ലാത്തൊരു ഫീലാണ് നല്‍കുന്നത്. ഇത് പ്രേക്ഷകര്‍ക്ക് കൂടി അനുഭവമായി തോന്നിയിടത്താണ് വില്ലന്റെ വിജയം എന്നും ഷാജി കൈലാസ് കുറിച്ചിട്ടുണ്ട്.