നിർമ്മാതാക്കളോട് ഖേദം പ്രകടിപ്പിച്ച് ഷെയിൻ! പ്രൊഡ്യൂസേഴ്‌സ് അസോസിയേഷന് കത്ത്

നിർമ്മാതാക്കളെ മനോരോഗികൾ എന്ന് വിളിച്ചതിനാണ് താരം മാപ്പ് പറഞ്ഞിരിക്കുന്നത്. തന്റെ പ്രസ്താവനയിൽ ആർക്കെങ്കിലും വിഷമമുണ്ടായിട്ടുണ്ടെങ്കിൽ ഖേദം പ്രകടിപ്പിക്കുന്നു. കത്തിലൂടെയായിരുന്നു താരത്തിന്റെ മാപ്പ് അപേക്ഷ. കത്ത് കിട്ടിയതായി പ്രൊഡ്യൂസേഴ്സ് ആസോസിയേഷൻ അധ്യക്ഷൻ എം രഞ്ജിത്ത് അറിയിച്ചിട്ടുണ്ട്. എന്നാൽ ജനുവരിയിൽ നടക്കുന്ന അമ്മ എക്സിക്യൂട്ടീവ് യോഗത്തിനു ശേഷം മാത്രമേ ഈ വിഷയത്തിൽ തുടർനടപടിയുണ്ടാകുകയുള്ളൂ.

അന്തരാഷ്ട്ര ചലച്ചിത്ര മേളയിൽ വെച്ചായിരുന്നു താരത്തിന്റെ വിവാദ പരാമർശം. നിർമ്മാതാക്കൾക്ക് മനോവിഷമമാണോ മനോരോഗമാണോ എന്നാണ് തന്റെ സംശയമെന്നുള്ള ഷെയിന്റെ വിവാദ പരാമർശമാണ് വൻ വിവാദമായത്. ഇതിനെതിരെ നിർമ്മാതാക്കളുടെ സംഘടന രംഗത്തെത്തിയിരുന്നു. താരത്തിനെതിരെ കടുത്ത നടപടി വേണമെന്ന് ആവശ്യപ്പെട്ട് നിർമ്മാതാക്കളുടെ സംഘടന രംഗത്തെത്തിയിരുന്നു. അന്യഭാഷ ചിത്രങ്ങളിലും താരത്തെ സഹകരിപ്പിക്കരുതെന്ന് അവശ്യപ്പെട്ട് ദക്ഷിണേന്ത്യൻ ഫിലം ചേമ്പറിന് നിർമ്മാതാക്കളുടെ സംഘടന കത്ത് നൽകിയിരുന്നു.

സംഭവം വിവാദമായപ്പോൾ ഫേസ്ബുക്കിലൂടെ താരം ഖേദം പ്രകടിപ്പിച്ചിരുന്നു. എന്നാൽ ഇത് അംഗീകരിക്കില്ലെന്ന് നിർമ്മാതാക്കളുടെ സംഘടന അറിയിച്ചിരുന്നു. പരസ്യമായി മാപ്പ് പറയണമെന്നു സംഘടന ആവശ്യപ്പെട്ടിരുന്നു. ഇതിനെ തുടർന്നാണ് ഷെയിൻ താരം കത്ത് നൽകിയത്. താരവും നിർമ്മാതാക്കളുടെ സംഘടനയുമായുളള പ്രശ്നത്തിൽ അമ്മയും ഫെഫ്ക്കയും രംഗത്തെത്തിയിരുന്നു. പ്രശ്നപരിഹാരത്തിന് മുൻകൈ എടുത്തിരുന്നുവെങ്കിലും താരത്തിന്റെ വിവാദ പരാമർശം പ്രശ്നം വഷളാക്കുകയായിരുന്നു.

താരം മാപ്പ് പറയാതെ ഈ വിഷയത്തിൽ ചർച്ചയ്ക്ക് തയ്യാറല്ലെന്നെന്നും ഒത്ത് തീർപ്പ് ചർച്ച നിർത്തി വയ്ക്കാനും നിർമ്മാതാക്കളുടെ സംഘടന ആവശ്യപ്പെട്ടിരുന്നു. തുടർന്ന് ചർച്ച നിർത്തി വയ്ക്കുകയായിരുന്നു. ഷെയിൻ ചിത്രമായ വലിയ പെരുന്നാളിന് മികച്ച പ്രേക്ഷാഭിപ്രായമാണ് ലഭിക്കുന്നത്. ചിത്രത്തിൽ പ്രെഫഷണൽ ഡാൻസറായിട്ടാണ് ഷെയിൻ എത്തുന്നത്.