ശങ്കര്‍ രാമകൃഷ്ണന്റെ ഡിസ്‌ക്കോ

മമ്മൂട്ടി മോഹന്‍ലാല്‍ സിനിമകളില്‍ പ്രത്യക്ഷപ്പെട്ടതിന് പിന്നാലെ നടനും തിരക്കഥാകൃത്തുമായ ശങ്കര്‍ രാമകൃഷ്ണന്‍ നായകനായി അരങ്ങേറ്റം കുറിയ്ക്കുന്നു. ലിജോ പല്ലിശേരി സംവിധാനം ചെയ്യുന്ന ഡിസക്കോയിലൂടെയാണ് ശങ്കര്‍ നായകനാവുന്നത്.

മോഹന്‍ലാല്‍ നായകനായ സ്പിരിറ്റും മമ്മൂട്ടിയുടെ ബാവുട്ടിയുടെ നാമത്തിലും ശങ്കര്‍ രാമകൃഷ്ണന്‍ പ്രധാനപ്പെട്ട വേഷങ്ങള്‍ ചെയ്ത ശ്രദ്ധ നേടിയിരുന്നു. ഇതാണ് നായക റോളിലേക്ക് ശങ്കറിന് വഴിയൊരുക്കിയത്.

നിരൂപകരുടെ ശ്രദ്ധനേടിയ സിറ്റി ഓഫ് ഗോഡ്, നായകന്‍ തുടങ്ങിയ സിനിമകളുടെ സംവിധായകനായ ലിജി പല്ലിശേരി ചിത്രത്തിലേക്ക് ശങ്കര്‍ രാമകൃഷ്ണന്‍ എത്തുന്നത് ഏറെ പ്രതീക്ഷ നല്‍കുന്നുണ്ട്. ഡിസ്‌ക്കോയില്‍ ശങ്കറിനൊപ്പം തുല്യപ്രധാന്യമുള്ള വേഷത്തില്‍ ഇന്ദ്രജിത്തും അഭിനയിക്കുന്നുണ്ട്. 2013 മാര്‍ച്ചില്‍ ചിത്രീകരണം തുടങ്ങുന്ന ഡിസ്‌ക്കോയുടെ പ്രധാന ലൊക്കേഷന്‍ ഗോവയായിരിക്കും.

അതേസമയം, ഫഹദ് ഫാസില്‍-സ്വാതി ടീം ഒന്നിയ്ക്കുന്ന ആമേന്റെ അവസാന ജോലികളിലാണ് ലിജോ. ജനുവരി അവസാനം ഈ ചിത്രം തിയറ്ററുകളിലെത്തും.