താരപുത്രി സൗഭാഗ്യ വെങ്കിടേഷ് വിവാഹിതയാവുന്നു! വരന്‍ അര്‍ജുന്‍, വിവാഹനിശ്ചയ ചിത്രങ്ങള്‍ പുറത്ത്

നേരത്തെ ഇന്‍സ്റ്റാഗ്രാമിലൂടെ പുറത്ത് വന്ന സൗഭാഗ്യയുടെ ചിത്രം അതിവേഗമാണ് തരംഗമായത്. ഇതിലൂടെ താരപുത്രിയുടെ വിവാഹത്തിനുള്ള സൂചനകളെല്ലാം നല്‍കിയിരുന്നു. ഇപ്പോഴിതാ തന്റെ വിവാഹനിശ്ചയം കഴിഞ്ഞെന്ന കാര്യം സൗഭാഗ്യ തന്നെ അറിയിച്ചിരിക്കുകയാണ്. ഇന്‍സ്റ്റാഗ്രാമിലൂടെ ഭാവി വരനായ അര്‍ജുന്‍ സോമശേഖറിനൊപ്പമുള്ള ചിത്രം പങ്കുവെച്ച് കൊണ്ടാണ് വിവാഹത്തെ കുറിച്ച് താരപുത്രി ആരാധകരെ അറിയിച്ചത്.

ഒപ്പം സൗഭാഗ്യയുടെ അമ്മയും നടിയുമായ താരകല്യാണിനൊപ്പമുള്ള ഫോട്ടോയും ഉണ്ടായിരുന്നു. നന്ദി അമ്മേ... ഞാന്‍ ആഗ്രഹിച്ചത് എന്താണോ അതുപോലൊരാളെ കണ്ടെത്തി തന്നിരിക്കുകയാണെന്ന് പറഞ്ഞ് അമ്മയ്ക്ക് നന്ദിയും പറഞ്ഞിരിക്കുകയാണ് താരപുത്രിയിപ്പോള്‍. നിശ്ചയം കഴിഞ്ഞെങ്കിലും വിവാഹം എപ്പോഴാണെന്നുള്ള കാര്യത്തെ കുറിച്ച് കൂടുതല്‍ വിവരങ്ങളില്ല. അധികം വൈകാതെ തന്നെ വിവാഹമുണ്ടെന്നാണ് അറിയുന്നത്.

അന്തരിച്ച അഭിനേതാവും നര്‍ത്തകനുമായ രാജാറാമിന്റെയും നര്‍ത്തകിയും നടിയുമായ താര കല്യാണിന്റെയും മകളാണ് സൗഭാഗ്യ. മാത്രമല്ല മലയാള സിനിമയിലെ പ്രിയപ്പെട്ട മുത്തശ്ശി സുഭ ലക്ഷ്മിയുടെ ചെറുമകള്‍ കൂടിയാണ് സൗഭാഗ്യ വെങ്കിടേഷ്. 2017ലായിരുന്നു രാജറാം അന്തരിക്കുന്നത്. പനി കൂടി ആശുപത്രിയില്‍ പ്രവേശിപ്പിച്ച അദ്ദേഹം ശ്വാസകോശ അണുബാധയെ തുടര്‍ന്ന് ആശുപത്രിയില്‍ നിന്ന് തന്നെ മരിച്ചു. മലയാള സിനിമയില്‍ ജൂനിയര്‍ ആര്‍ട്ടിസ്റ്റ് ആയിട്ടായിരുന്നു രാജറാം കരിയര്‍ ആരംഭിക്കുന്നത്.

താരകല്യാണും അഭിനയത്തിലും നൃത്തത്തിലും കഴിവ് തെളിയിച്ച നടിയാണ്. മകള്‍ സിനിമയിലേക്ക് എത്തിയിട്ടില്ലെങ്കിലും ടിക് ടോക് വീഡിയോകളിലൂടെ കേരളത്തില്‍ തരംഗമുണ്ടാക്കി. അമ്മയും മകളും തമ്മിലുള്ള നൃത്ത വീഡിയോസ് പലപ്പോഴായി വാര്‍ത്തകളില്‍ നിറയാറുമുണ്ട്. എന്തായാലും താരപുത്രിയുടെ വിവാഹവിശേഷങ്ങള്‍ അറിയാന്‍ വേണ്ടിയാണ് ഇനി എല്ലാവരും കാത്തിരിക്കുന്നത്.