ഞാനും ആ ടീമിലുണ്ടെന്ന അഭിമാനമുണ്ട്, വിനായകനെയും മണികണ്ഠനെയും അഭിനന്ദിച്ച് ദുല്‍ഖര്‍ സല്‍മാന്‍

വിനായകനെയും മണികണ്ഠനെയും അഭിനന്ദിച്ച് ഡിക്യു

സഹതാരങ്ങളായ വിനായകന്‍ ചേട്ടനും മണികണ്ഠന്‍ ചേട്ടനും അവാര്‍ഡ് ലഭിച്ചതില്‍ ഏറെ സന്തോഷമുണ്ടെന്ന് ദുല്‍ഖര്‍ സല്‍മാന്‍, ഫേസ്ബുക്ക് പേജിലൂടെയാണ് ദുല്‍ഖര്‍ തന്‍റെ പ്രതികരണം അറിയിച്ചിട്ടുള്ളത്. ഞാനും ആ ടീമിന്‍റെ ഭാഗമാണെന്നുള്ള കാര്യത്തില്‍ അഭിമാനമുണ്ടെന്നും ദുല്‍ഖര്‍ കുറിച്ചിട്ടുണ്ട്.

സംവിധായകനെ ആകര്‍ഷിച്ച ഘടകം

കമ്മട്ടിപ്പാടത്തിന്‍റെ ഹൃദയമിടിപ്പ് അറിയുന്നവനാണ് വിനായകന്‍. പതിവു നായകസങ്കല്‍പ്പങ്ങളില്‍ നിന്നു മാറി പ്രേക്ഷക ഹൃദയം കീഴടക്കിയ താരത്തിന് അവാര്‍ഡ് ലഭിക്കണമെന്ന് സിനിമാ പ്രേമികള്‍ ഒന്നടങ്കം ആഗ്രഹിച്ചിരുന്നു. സിനിമയില്‍ നായകന്‍ ദുല്‍ഖര്‍ സല്‍മാനായിരുന്നുവെങ്കിലും കൂടുതല്‍ തിളങ്ങിയത് വിനായകനാണ്.

പ്രേക്ഷക ഹൃദയത്തിലേക്ക് ഇടിച്ചു കയറിയ ഗംഗ

പുറന്പോക്കിനെ കിടപ്പാടമാക്കി ജീവിക്കുന്നവരുടെ കഥ പറഞ്ഞ ചിത്രത്തില്‍ ഗംഗയായി വിനായകന്‍ ജീവിക്കുക തന്നെയായിരുന്നു. വികസനത്തിന്‍റെ പേരില്‍ കിടപ്പാടം നഷ്ടപ്പെടുന്പോഴുള്ള വേദന അനുഭവിച്ചറിഞ്ഞ താരത്തിന് തന്‍റെ റോള്‍ അനായാസം മികച്ചതാക്കാന്‍ കഴിഞ്ഞു.

കഥാപാത്രത്തെക്കാളുപരി സ്വന്തം ജീവിതം

വിനായകന് ഇത് ഗംഗയെന്ന കഥാപാത്രത്തിനപ്പുറം അയാള്‍ ജനിച്ച, കളിച്ചുവളര്‍ന്ന, സ്വന്തം നാടിന്റെ ചരിത്രമായിരുന്നു കമ്മട്ടിപ്പാടം. കമ്മട്ടിപ്പാടത്തിനും അവിടെയുള്ള മനുഷ്യര്‍ക്കും എന്ത് സംഭവിച്ചുവെന്ന് നിങ്ങളൊന്ന് അന്വേഷിക്കൂ എന്ന് ആ സിനിമയെക്കുറിച്ച് ചര്‍ച്ച ചെയ്യാന്‍ സംഘടിപ്പിച്ച ഒരു വേദിയില്‍ വൈകാരികമായി വിനായകന്‍ പറയുന്നുണ്ട്.