60കാരന്റെ അമ്മയായി 50കാരി, നായികയായി 20കാരി; റിമ കല്ലിങ്കല്‍ പൃഥ്വിരാജിന്റെ ഭാര്യയോട് പറഞ്ഞത്

സ്ത്രീ സുരക്ഷ മാത്രമല്ല

വുമണ്‍ ഇന്‍ മലയാളം സിനിമ കലക്ടീവ് എന്ന സംഘടന, കൊച്ചിയില്‍ നടി ആക്രമിയ്ക്കപ്പെട്ട പശ്ചാത്തലത്തില്‍ സ്ത്രീകളെ സംരക്ഷിക്കാന്‍ മാത്രമുള്ള സംഘടന അല്ല എന്നും, സിനിമയില്‍ സ്ത്രീ സമത്വം ഉറപ്പ് വരുത്തുന്നതിന് വേണ്ടിയുള്ളതാണെന്നും അംഗങ്ങള്‍ പറയുന്നതായി സുപ്രിയ എഴുതി.

റിമ കല്ലിങ്കല്‍ പറഞ്ഞത്

മലയാള സിനിമയില്‍ നായകന്മാരും നായികമാരും തമ്മില്‍ വലിയ അന്തരമാണുള്ളത്. സിനിമയില്‍ അറുപത് വയസ്സുള്ള നായകന് 20 വയസ്സുള്ളവരെ നായികയെ കാസ്റ്റ് ചെയ്യുന്നു. അതുപോലെ തന്നെ 60 വയസ്സുള്ള നായകന്റെ അമ്മയുടെ റോള്‍ ചെയ്യുന്നത് 50 വയസ്സുള്ള നടിയാണെന്ന സിനിമാ താരം റിമ കല്ലിങ്കലിന്റെ പ്രതികരണവും സുപ്രിയയുടെ ലേഖനത്തിലുണ്ട്.

പാര്‍വ്വതിയ്ക്ക് കുറഞ്ഞ പ്രതിഫലം

ടേക്ക് ഓഫ് എന്ന ചിത്രത്തില്‍ മുഴുനീള കഥാപാത്രമായി എത്തിയിട്ടും നായകനടന്മാരെക്കാള്‍ വളരെ കുറഞ്ഞ പ്രതിഫലമാണ് തനിക്ക് കിട്ടിയത് എന്ന് നടി പാര്‍വ്വതി വെളിപ്പെടുത്തിയതായും സുപ്രിയ എഴുതി. എഡിറ്റര്‍ എന്നനിലയില്‍ പേരെടുത്ത മഹേഷ് നാരായണന്‍ ആദ്യമായി സംവിധാനം ചെയ്ത 'ടേക്ക് ഓഫില്‍ പാര്‍വതിക്കൊപ്പം കുഞ്ചാക്കോ ബോബന്‍, അസിഫ് അലി, ഫഹദ് ഫാസില്‍ എന്നിവരും അണിനിരന്നിരുന്നു. ഇറാഖിലെ തിക്രിത്തില്‍ വിമതരുടെ പിടിയിലായി ആശുപത്രികളില്‍ ബന്ദികളാക്കപ്പെട്ട നഴ്‌സുമാരുടെ ജീവിതം പശ്ചാത്തലമാക്കിയ ചിത്രത്തില്‍ പാര്‍വതിയുടെ പ്രകടനം ഏറെ ചര്‍ച്ചയായിരുന്നു. ബോക്‌സ് ഓഫീസില്‍ മികച്ച കളക്ഷന്‍ നേടിയ സിനിമയുമായിരുന്നു ടേക്ക് ഓഫ്.

വലിയ മാറ്റം സംഭവിയ്ക്കുമോ?

ഒറ്റ രാത്രികൊണ്ട് വലിയ വലിയ മാറ്റങ്ങള്‍ സംഭവിയ്ക്കും എന്നൊന്നും പ്രതീക്ഷിയ്ക്കുന്നില്ല. പക്ഷെ ഇതൊരു പോസിറ്റീവായ തുടക്കമായിരിയ്ക്കും എന്ന് മഞ്ജു വാര്യര്‍ പറയുന്നു. സ്ത്രീകള്‍ക്ക് അര്‍ഹിയ്ക്കുന്ന സുരക്ഷയും ബഹുമാനവും നല്‍കണം എന്നാണ് വുമണ്‍ ഇന്‍ മലയാളം സിനിമ കലക്ടീവിന്റെ ആവശ്യം.

സുപ്രിയയുടെ എഴുത്ത്

വുമണ്‍ ഇന്‍ മലയാളം സിനിമ കലക്ടീവിന്റെ ലക്ഷ്യം ലിംഗ സമത്വം (In Malayalam Cinema, A Women's Collective Takes Aim At The Gender Gap) എന്ന തലക്കെട്ടോടുകൂടെയാണ് സുപ്രിയ മേനോന്‍ ഹഫിങ്ടണ്‍ പോസ്റ്റില്‍ ലേഖനം എഴുതിയിരിയ്ക്കുന്നത്. രേവതി, അഞ്ജലി മേനോന്‍, ബീനാ പോള്‍ തുടങ്ങി ഡബ്ല്യുസിസി അംഗങ്ങളുടെ അഭിപ്രായങ്ങളോടുകൂടെയാണ് ലേഖനം പൂര്‍ത്തിയാക്കിയിരിയ്ക്കുന്നത്.

വെല്ലുവിളി നേരിട്ട് ഡബ്യുസിസി

അതേ സമയം ഈ സ്ത്രീ സംഘടനയ്‌ക്കെതിരെ മലയാളത്തിലെ പ്രമുഖ താരങ്ങള്‍ രംഗത്തെത്തിയിട്ടുണ്ട് എന്നാണ് അറിയുന്നത്. അമ്മ, ഫെഫ്ക എന്നീ സംഘടനകളെ ഭിന്നിപ്പിയ്ക്കുകയാണ് എന്ന ആരോപണവും ഉയരുന്നു. ഇക്കാരണത്താല്‍ സ്ത്രീ സംഘടനയില്‍ അംഗങ്ങളായ പല നായികമാരെയും കാരണമില്ലാതെ വിലക്കുകയും ഭീഷണിപ്പെടുത്തുകയും ചെയ്യുന്നുണ്ട് എന്നാണ് വാര്‍ത്തകള്‍ പുറത്ത് വരുന്നത്. ഈ സാഹചര്യത്തിലാണ് വെട്ടിത്തുറന്ന് അഭിപ്രായങ്ങള്‍ പറഞ്ഞ് റിമയും പാര്‍വ്വതിയുമൊക്കെ രംഗത്തെത്തിയിരിയ്ക്കുന്നത്. സംഘടന രൂപപ്പെട്ടപ്പോള്‍ തന്നെ പൃഥ്വിരാജ്, ദുല്‍ഖര്‍ സല്‍മാന്‍ തുടങ്ങിയവരെ പോലുള്ള താരങ്ങള്‍ പിന്തുണ അറിയിച്ചിരുന്നു.