മമ്മൂട്ടിയും മോഹന്‍ലാലും വിളിക്കാത്തതില്‍ സുരഭി ലക്ഷ്മി ആരോടാണ് പരാതി പറഞ്ഞത് ?

അവര്‍ രണ്ട് പേരും വിളിച്ചില്ല

പുരസ്‌കാരലബ്ധിയ്ക്ക് ശേഷം നടത്തിയ ഒരു ചാനല്‍ അഭിമുഖത്തില്‍ ആരൊക്കെ വിളിച്ച് അഭിനന്ദിച്ചു എന്ന് ചോദ്യത്തിനോട് പ്രതികരിക്കവെ മോഹന്‍ലാലും മമ്മൂട്ടിയും വിളിച്ചില്ല എന്ന് സുരഭി പറഞ്ഞിരുന്നു. അതൊരിക്കലും പരാതിയോ പരിഭവമോ ആയിരുന്നില്ല. സിനിമയില്‍ നിന്ന് മോഹന്‍ലാലും മമ്മൂട്ടിയും വിളിച്ചോ എന്ന് ചോദിച്ചപ്പോള്‍ ഇല്ല എന്ന് പറഞ്ഞു എന്ന് മാത്രം.

വാര്‍ത്തകള്‍ വന്നത്

എന്നാല്‍ ഈ അഭിമുഖം കേട്ടപാതി കേള്‍ക്കാത്തപാതി, ദേശീയ പുരസ്‌കാരം ലഭിച്ചിട്ടും മോഹന്‍ലാലും മമ്മൂട്ടിയും സുരഭിയെ വിളിച്ചില്ല അഭിനന്ദിച്ചില്ല, വിഷയത്തില്‍ സുരഭി പരാതി പറഞ്ഞു എന്നിങ്ങെയൊക്കെ വാര്‍ത്തകള്‍ പ്രചരിയ്ക്കാന്‍ തുടങ്ങി.

സുരഭി പ്രതികരിയ്ക്കുന്നു

ഈ പ്രചരിയ്ക്കുന്ന വാര്‍ത്തകള്‍ക്ക് മറുപടിയുമായി എത്തിയിരിയ്ക്കുകയാണ് ഇപ്പോള്‍ സുരഭി. അങ്ങനെ ഒരു പരാതി ഞാന്‍ ആരോടും പറഞ്ഞിട്ടില്ല എനിക്കൊരു പരിഭവവുമില്ല എന്നും സുരഭി വ്യക്തമാക്കി. ഇത്തരമൊരു കാര്യം ഞാന്‍ സ്വപ്‌നത്തില്‍ പോലും വിചാരിക്കാത്തതാണ്.

ആരുടെയോ സൃഷ്ടി മാത്രം

അല്ലെങ്കില്‍ തന്നെ അങ്ങനെ പരാതിപ്പെടുന്നതില്‍ എന്ത് യുക്തിയും അര്‍ത്ഥവുമാണുള്ളത്. സാമാന്യ ബോധമുള്ള ആരെങ്കിലും അങ്ങനെയൊരു പരാതി ഉന്നയിക്കുമോ. ഇത് ആരുടെയോ സൃഷ്ടിയാണ്. സാമൂഹ്യ മാധ്യമങ്ങളുടെ കാലമല്ല. അങ്ങനെ പലതും വരാം.

ഞാനറിയുന്നുണ്ട്

ഭാരതത്തിലെ പ്രതിഭാധനരായ രണ്ട് നടന്മാരാണ് മോഹന്‍ലാലും മമ്മൂട്ടിയും. അവര്‍ക്ക് അവരുടേതായ ധാരാളം തിരക്കുകളുണ്ട്. നേരിട്ട് വിളിച്ചില്ലെങ്കിലും അവരുടെ അനുഗ്രഹവും മനസ്സും ഞാനറിയുന്നുണ്ട് - സുരഭി ലക്ഷ്മി പറഞ്ഞു.