ഹാസ്യ വേഷങ്ങളില്‍ നിന്നും സുരാജ് അപ്രത്യക്ഷമാകുന്നോ? മറ്റൊരു വ്യത്യസ്ത കഥാപാത്രം, വേലായുധന്‍!

വേലായുധന്‍

വിനീത് ശ്രീനിവസാന്‍ നായകനാകുന്ന ആന അലറലോടലറല്‍ എന്ന ചിത്രത്തിലാണ് സുരാജ് വേലായുധന്‍ എന്ന വ്യത്യസ്ത കഥാപാത്രവുമായി എത്തുന്നത്. പതിവ് കഥാപാത്രങ്ങളില്‍ നിന്ന് വ്യത്യസ്തമായി അല്പം പ്രായമേറിയ കഥാപാത്രമാണ് വേലായുധന്‍. സുരാജിന്റെ കരിയറില്‍ വഴിത്തിരിവാകുമെന്ന് പ്രതീക്ഷിക്കുന്ന കഥാപാത്രമാണ് വേലായുധന്‍.

ആന അലറലോടലറല്‍

വിനീത് ശ്രീനിവാസന്‍, അനു സിത്താര എന്നിവരെ കേന്ദ്ര കഥാപാത്രങ്ങളാക്കി നവാഗതനായ ദിലീപ് മേനോന്‍ സംവിധാനം ചെയ്യുന്ന ചിത്രമാണ് ആന അലറലോടലറല്‍. ശരത് ബാലന്റേതാണ് തിരക്കഥ. ശേഖരന്‍കുട്ടി എന്ന് വിളിക്കുന്ന ആനയാണ് ചിത്രത്തിലെ കേന്ദ്ര കഥാപാത്രം.

ആന കേന്ദ്രകഥാപാത്രം

ആനക്കഥകള്‍ പറയുന്ന നിരവധി ചിത്രങ്ങള്‍ മലയാളത്തില്‍ ഇറങ്ങിയിട്ടുണ്ട്. അവയില്‍ ഏറിയ പങ്കും ബോക്‌സ് ഓഫീസില്‍ വിജയം നേടുകയും ചെയ്തു. ഒരു ചെറിയ ഇടവേളയ്ക്ക് ശേഷമാണ് ആന കേന്ദ്രകഥാപത്രമാകുന്ന ചിത്രം മലയാളത്തില്‍ ഇറങ്ങുന്നത്.

ആക്ഷേപ ഹാസ്യം

ഗ്രാമീണ പശ്ചാത്തലത്തിലുള്ള ചിത്രം ആക്ഷേപ ഹാസ്യമായിട്ടാണ് ഒരുക്കിയിരിക്കുന്നത്. ആനന്ദം ഫെയിം വിശാഖ്, ഇന്നസെന്റ്, ഇന്ദ്രന്‍സ്, വിജയരാഘവന്‍, ഹരീഷ് കണാരന്‍, മാമുക്കോയ, അപ്പുണ്ണി ശശി, തെസ്‌നി ഖാന്‍ എന്നിവരാണ് ചിത്രത്തിലെ മറ്റ് അഭിനേതാക്കള്‍.

ജിമ്മിക്കി കമ്മലിന് ശേഷം

ഭാഷയുടെ അതിര്‍ വരമ്പുകള്‍ക്കപ്പുറത്ത് തരംഗമായി മാറിയ ജിമ്മിക്കി കമ്മല്‍ എന്ന ഗാനത്തിന് ശേഷം ഷാന്‍ റഹ്മാനും വിനീത് ശ്രീനിവാസനും ഒന്നിക്കുകയാണ് ഈ ചിത്രത്തിലൂടെ. ചിത്രത്തിന് സംഗീതം നല്‍കിയിരിക്കുന്നത് ഷാന്‍ റഹ്മാനാണ്. പൊയട്രി ഫിലിംസിന്റെ ബാനറില്‍ സിബി തോട്ടുപുറം, നേവിസ് സേവ്യര്‍ എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്.