നിഗൂഢതകള്‍ ഒളിഞ്ഞിരിക്കുന്ന 'സ്വാതന്ത്ര്യം അര്‍ദ്ധരാത്രിയില്‍', ആന്റണിയുടെ പുതിയ അവതാരം കാണാം...

നിഗൂഢതകള്‍ നിറഞ്ഞ ടീസര്‍

ആദ്യമദ്ധ്യാന്തം നിഗൂഢതകള്‍ നിറഞ്ഞ് നില്‍ക്കുന്നതാണ് 1.43 മിനിറ്റ് ദൈര്‍ഘ്യമുള്ള ടീസര്‍. ടൊവിനോ തോമസ് തന്റെ ഔദ്യോഗിക ഫേസ്ബുക്ക് പേജിലൂടെയാണ് ടീസര്‍ പുറത്ത് വിട്ടത്. ചിത്രത്തേക്കുറിച്ചുള്ള പ്രേക്ഷകരുടെ പ്രതീക്ഷയും ആകാംഷയും വര്‍ദ്ധിപ്പിക്കുന്നതാണ് ടീസര്‍.

ഒറ്റ രാത്രിയിലെ സംഭവങ്ങള്‍

കോട്ടയത്തിന്റെ പശ്ചാത്തലത്തിലാണ് ചിത്രം ഒരുങ്ങുന്നത്. ഒറ്റ രാത്രിയില്‍ നടക്കുന്ന സംഭവങ്ങളും അതിനേ തുടര്‍ന്നുള്ള പ്രശ്‌നങ്ങളുമാണ് ചിത്രത്തിന്റെ ഇതിവൃത്തം. ടിനു പാപ്പച്ചന്‍ ആദ്യമായി സംവിധാനം ചെയ്യുന്ന ചിത്രത്തിന് തിരക്കഥ ഒരുക്കുന്നത് നവാഗതനായ ദിലീപ് കുര്യനാണ്.

അങ്കമാലി ഡയറീസ് ടീം

ആന്റണി വര്‍ഗീസിന്റെ രണ്ടാമത് ചിത്രത്തിന് പിന്നിലും അങ്കമാലി ഡയറീസ് ടീം തന്നെയാണുള്ളത്. അങ്കമാലി ഡയറീസിന്റെ ചീഫ് അസോസിയേറ്റ് ആയിരുന്നു ടിനു പാപ്പച്ചന്‍. സംവിധായകന്‍ ലിജോ ജോസി പല്ലിശ്ശേരിയും തിരക്കഥകൃത്ത് ചെമ്പന്‍ വിനോദും സഹനിര്‍മാതാക്കളായും എത്തുന്നു.

ഇരുനൂറോളം തിരക്കഥകള്‍

ആന്റണിയുടെ ആദ്യ കഥാപാത്രമായ വിന്‍സെന്റ് പെപ്പെ പ്രേക്ഷകരുടേയും നിരൂപകരുടേയും ശ്രദ്ധനേടിയ ചിത്രമായിരുന്നു. അതുകൊണ്ട് തന്നെ കരുതലോടെയായിരുന്നു രണ്ടാമത്തെ ചിത്രത്തിന്റെ തിരഞ്ഞെടുപ്പും. അങ്കമാലി ഡയറീസിന് ശേഷം ഇരുനൂറോളം കഥകള്‍ ആന്റണി കേട്ടിരുന്നു.

ബി ഉണ്ണികൃഷ്ണന്റെ പുതിയ വേഷം

തിരക്കഥാകൃത്തും സംവിധായകനുമായ ബി ഉണ്ണികൃഷ്ണന്‍ ആദ്യമായി നിര്‍മാതാവാകുന്ന ചിത്രം കൂടെയാണ് സ്വാതന്ത്ര്യം അര്‍ദ്ധരാത്രിയില്‍. മാടമ്പി, പ്രമാണി എന്നീ ചിത്രങ്ങളുടെ നിര്‍മാതാവായ ബിസി ജോഷിയും ബി ഉണ്ണികൃഷ്ണനൊപ്പമുണ്ട്.

പുതിയ നായിക

സ്വതന്ത്ര്യം അര്‍ദ്ധരാത്രിയില്‍ എന്ന ചിത്രത്തില്‍ ആന്റണിയുടെ നായിക പുതുമുഖമായിരിക്കുമെന്നാണ് റിപ്പോര്‍ട്ട്. അങ്കമാലി ഡയറീസ് താരം ടിറ്റോ വില്‍സണനൊപ്പം വിനായകന്‍, ചെമ്പന്‍ വിനോദ് എന്നിവരും ചിത്രത്തില്‍ പ്രധാന വേഷത്തിലെത്തുന്നു.