അഞ്ച് മിനിട്ടിനുള്ളില്‍ കല്യാണം; വിചിത്രമായ ആചാരങ്ങളോടെ ധ്യാന്‍ ശ്രീനിവാസന്റെ കല്യാണം...

വിനീതിന്റെ പാട്ടോടെ തുടക്കം

കണ്ണൂര്‍ വാസവ ക്ലിഫ് ഹൈസില്‍ രാവിലെ 11.45 നും 12.15 നും ഇടയിലായിരുന്നു മുഹൂര്‍ത്തം. ധ്യാനിന്റെ ജ്യേഷ്ഠനും നടനും സംവിധായകനുമായ വിനീത് ശ്രീനിവാസന്റെ ഗാനാലാപനത്തോടെയാണ് വിവാഹച്ചടങ്ങ് ആരംഭിച്ചത്.

അഞ്ച് മിനിട്ടുകൊണ്ട് കല്യാണം

വളരെ ലളിതമായ വേഷമായിരുന്നു ധ്യാന്‍ ശ്രീനിവാസന്റേത്. ഒരു മുണ്ടും ഷര്‍ട്ടും മാത്രം. അര്‍പിത അത്യാവശ്യം ആഭരണങ്ങള്‍ അണിഞ്ഞിരുന്നെങ്കിലും ആര്‍ഭാടമായിരുന്നില്ല. താലികെട്ടിന് ശേഷം പുഷ്പഹാരം കൈമാറിയതോടെ അഞ്ച് മിനിട്ടുകൊണ്ട് വിവാഹ ചടങ്ങുകള്‍ പൂര്‍ത്തിയാക്കി.

വിവാഹ സദ്യ

ശ്രീനിവാസനും ഭാര്യ വിമലയും ജൈവകൃഷിയിലൂടെ വിളയിച്ചെടുത്ത അരിയും പച്ചക്കറികളുമായിരുന്നു വേറിട്ട വിവാഹ സദ്യ. തവിടു കളയാത്ത കുത്തരിച്ചോറും, ചക്കവിഭവങ്ങളും. കൂട്ടുകറിയും അവിയലും സാമ്പാറും തരാതരം. സ്‌പെഷ്യലായി വരിക്കച്ചക്കപ്പഴവും ഗോതമ്പു പായസവും.

ദീര്‍ഘനാളത്തെ പ്രണയം

പത്ത് വര്‍ഷം നീണ്ടു നിന്ന പ്രണയത്തിന് ശേഷമാണ് ധ്യാനും അര്‍പ്പിതയും വിവാഹിതരായത്. ധ്യാന്‍ മറ്റൊരു മതത്തില്‍ നിന്നും വിവാഹം കഴിക്കുന്നതില്‍ തനിക്കും ഭാര്യയ്ക്കും യാതൊരുവിധ എതിര്‍പ്പും ഇല്ലെന്ന് ശ്രീനിവാസന്‍ പറഞ്ഞു. ഇത് അവരുടെ ആഗ്രഹമാണ്. അതില്‍ നമ്മള്‍ ഇടപെടാന്‍ പാടില്ലെന്നാണ് മകന്റെ അച്ഛന്‍ പറഞ്ഞത്.

പത്തിന് സത്കാരം

ഏപ്രില്‍ ഏഴിന് നടന്ന വിവാഹത്തില്‍ അടുത്ത ബന്ധുക്കളും സുഹൃത്തുക്കളും സാമൂഹ്യ പ്രവര്‍ത്തകരും പങ്കെടുത്തിരുന്നു. നാളെ (ഏപ്രില്‍ 10) സിനിമാ സുഹൃത്തുക്കള്‍ക്ക് വേണ്ടി എറണാകുളത്ത് വിവാഹ സത്കാരം ഒരുക്കിയിട്ടുണ്ട്.