ഏത് വര്‍ക്കൗട്ടായാലും ലാലേട്ടന്‍ കട്ടയ്ക്ക് നില്‍ക്കും, നൂറ് ശതമാനം ആത്മാര്‍ത്ഥതയാണ്: ഫിറ്റ്‌നെസ് ട്രെയിനര്‍

നാലാം ക്ലാസില്‍ പഠിക്കുമ്പോള്‍ നരസിംഹത്തിന്‌റെ പോസ്റ്ററിലാണ് ഞാന്‍ അദ്ദേഹത്തെ ശ്രദ്ധിച്ചുതുടങ്ങിയത്. ആ ലാലേട്ടന്‍ 27 വയസുളള എനിക്കൊപ്പം ഇന്നും ഓടും ഏത് വര്‍ക്കൗട്ടിലും കട്ടയ്ക്ക് നില്‍ക്കും. രാവിലെ ആറരയ്ക്ക് സെറ്റിലെത്തി രാത്രി ക്ഷീണിച്ച് ഇറങ്ങിയാലും ആഞ്ഞ് ഒരു നടപ്പെങ്കിലും നടന്നിട്ടേ അദ്ദേഹം വീട്ടിലേക്ക് പോകാറൂളളൂ.

വീട്ടിലും ജിം സെറ്റ് ചെയ്തിട്ടുണ്ട്. ഒടിയന്‍ സിനിമയുടെ സമയത്താണ് ലാലേട്ടനെ പരിചയപ്പെടുന്നത്. പിന്നീട് കുഞ്ഞാലി മരക്കാര്‍ മുതല്‍ ട്രെയിനറായി ഒപ്പമുണ്ട്. ഓരോ സിനിമയെ കുറിച്ച് ലാലേട്ടന്‍ പറയുമ്പോഴും അതിലെ കഥാപാത്രമായി ലാലേട്ടന്‍ എങ്ങനെ വേണം എന്ന് ഞാന്‍ ഭാവനയില്‍ കാണും. ലൂസിഫറിലെ സ്റ്റീഫന് വേണ്ടി ബോഡി കുറച്ച് ഹാര്‍ഡ് ആക്കി.

അതിലെ ഹിറ്റായ ആ കിക്ക് സീന്‍ പോസ്റ്ററിന് വേണ്ടി നന്നായി വര്‍ക്കൗട്ട് ചെയ്തു. ഇട്ടിമാണിയില്‍ തമാശ നിറഞ്ഞ ക്യാരക്ടറാണല്ലോ. അപ്പോള്‍ കുറച്ച് സ്ലിം ആക്കി. ദൃശ്യം 2വില്‍ ഒരു കൃഷിക്കാരന്‌റെ ശരീരത്തിന് ചേരുന്ന രീതിയിലുളള വര്‍ക്കൗട്ട് പ്ലാന്‍ ചെയ്തൂ. കൃത്യനിഷ്ടയാണ് അദ്ദേഹത്തിന്‌റെ പ്രത്യേകതയെന്നും ഐനസ് പറയുന്നു.

ലാലേട്ടന് ഇഷ്ടമുളള ഭക്ഷണത്തെ കുറിച്ചും ഐനസ് പറഞ്ഞു. റവ ദോശയും ചെമ്മീന്‍ കറിയും പോലെ ഒരുപാട് ഇഷ്ടമുളള സ്‌പെഷ്യല്‍ നാടന്‍ ഐറ്റങ്ങളുണ്ട്. ഫുഡി ആണെങ്കിലും എത്ര ഇഷ്ടമുളള ഭക്ഷണവും ചെറിയ അളവിലെ കഴിക്കൂ. അതുകൊണ്ട് ഇഷ്ടമുളളതൊന്നും ഒഴിവാക്കേണ്ട ലാലേട്ടാ കാലറി ബേണ്‍ ചെയ്താല്‍ മതി എന്ന് പറയും.

100 ശതമാനം ആത്മാര്‍ത്ഥത, 110% സമയനിഷ്ട വര്‍ക്കൗട്ട് കാര്യത്തില്‍ അതാണ് ലാലേട്ടന്‍. ന്യൂട്രീഷനും ഡയറ്റും ശ്രദ്ധിക്കും. കാലുവേദന പേടിച്ച് ലോവര്‍ ബോഡി എക്‌സസൈസുകള്‍ ചെയ്യാന്‍ ചിലര്‍ മടിക്കാറുണ്ട്. വെയ്റ്റ് ലിഫ്റ്റിങ് പോലെ തന്നെ ലോവര്‍ ബോഡി അപ്പര്‍ ബോഡി എക്‌സര്‍സൈസുകളും ആസ്വദിച്ച് ചെയ്യും. ലാലേട്ടന് ഒരു ഷെയ്ക്ക് ഹാന്‍ഡ് കൊടുത്തൂനോക്കൂ. എത്ര ഡൗണ്‍ ആണെങ്കിലും നമ്മുടെ എനര്‍ജി ലെവല്‍ കുത്തനെ കുതിക്കും. അഭിമുഖത്തില്‍ ഐനസ് ആന്റണി പറഞ്ഞു.