ശാന്തികൃഷ്ണയ്ക്ക് പിന്നാലെ ഉര്‍വ്വശിയും തിരിച്ചെത്തുന്നു... വിനീത് ശ്രീനിവാസന്‍ ചിത്രത്തിലൂടെ!

അരവിന്ദന്റെ അതിഥികള്‍

അരവിന്ദന്റെ അതിഥികള്‍ എന്ന ചിത്രത്തിലൂടെയാണ് ഉര്‍വ്വശി മലയാളത്തിലേക്ക് തിരിച്ചുവരവ് നടത്തുന്നത്. വിനീത് ശ്രീനിവാസന്‍ നായകനാകുന്ന ചിത്രത്തില്‍ ഏറെ പ്രധാനപ്പെട്ട ഒരു കഥാപാത്രത്തെയാണ് ഉര്‍വ്വശി അവതരിപ്പിക്കുന്നത്.

എം മോഹന്‍

പ്രേക്ഷകര്‍ ഇരുകൈയും നീട്ടി സ്വീകരിച്ച കഥ പറയുമ്പോള്‍ എന്ന ചിത്രത്തിലൂടെ സംവിധായകനായി അരങ്ങേറിയ എം മോഹനാണ് ചിത്രം സംവിധാനം ചെയ്യുന്നത്. മാണിക്യക്കല്ല്, 916 എന്നീ ചിത്രങ്ങള്‍ക്ക് ശേഷം അദ്ദേഹം സംവിധാനം ചെയ്യുന്ന ചിത്രമാണ് അരവിന്ദന്റെ അതിഥികള്‍.

ഉര്‍വ്വശി മാത്രമല്ല ശാന്തി കൃഷ്ണയും

ഉര്‍വ്വശി മാത്രമല്ല ശാന്തി കൃഷ്ണയും അരവിന്ദന്റെ അതിഥികളില്‍ പ്രധാനപ്പെട്ട വേഷത്തിലെത്തുന്നുണ്ട്. ശ്രീനിവാസന്‍, അജു വര്‍ഗീസ്, ഷമ്മി തിലകന്‍ എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. ഉര്‍വ്വശിയുടെ കഥാപാത്രത്തേക്കുറിച്ചുള്ള മറ്റ് വിവരങ്ങള്‍ പുറത്ത് വിട്ടിട്ടില്ല.

നായികയായി നിഖില വിമല്‍

ദിലീപ് ചിത്രം ലൗ 24x7 എന്ന ചിത്രത്തിലൂടെ നായികയായി എത്തിയ നിഖില വിമലാണ് ചിത്രത്തിലെ നായിക. അരങ്ങേറ്റം മലയാളത്തിലായിരുന്നെങ്കിലും തമിഴ്, തെലുങ്ക് സിനിമകളിലാണ് നിഖില ഇപ്പോള്‍ അഭിനയിക്കുന്നത്. നിഖിലയുടേയും മടങ്ങി വരവാണ് ഈ ചിത്രത്തിലൂടെ സംഭവിക്കുന്നത്.

മൂന്ന് വര്‍ഷത്തെ ഇടവേള

മൂന്ന് വര്‍ഷത്തെ ഇടവേളയ്ക്ക് ശേഷമാണ് ഉര്‍വ്വശി ഒരു മലയാളം സിനിമയില്‍ അഭിനയിക്കുന്നത്. 2014ല്‍ ഇറങ്ങിയ മൈ ഡിയര്‍ മമ്മി എന്ന ചിത്രത്തില്‍ ഒരു മുഴുനീള കഥാപാത്രത്തെ അവതരിപ്പിച്ചിരുന്നു. കഴിഞ്ഞ വര്‍ഷം തെലുങ്കില്‍ പുറത്തിറങ്ങിയ മോഹന്‍ലാല്‍ ചിത്രം മനവന്തയിലും ഉര്‍വ്വശി അഭിനയിച്ചിരുന്നു. വിസ്മയം എന്ന പേരില്‍ ചിത്രം മലയാളത്തിലും മൊഴിമാറ്റി എത്തിയിരുന്നു.

മറ്റ് ഭാഷകളില്‍ സജീവം

മലയാളത്തില്‍ അത്ര സജീവമല്ലെങ്കിലും ഉര്‍വ്വശി മറ്റ് തെന്നിന്ത്യന്‍ ഭാഷകളില്‍ സജീവമാണ്. തമിഴ്, തെലുങ്ക്, കന്നട ഭാഷകളിലെ ചിത്രങ്ങളില്‍ ഉര്‍വ്വശി ശ്രദ്ധേയ സാന്നിദ്ധ്യമാണ്. ജ്യോതിക നായികയായി എത്തിയ മഗിളര്‍മട്ടും എന്ന ചിത്രത്തിലെ പ്രകടനം പ്രേക്ഷക പ്രശംസ നേടിയിരുന്നു.