വിജയ്-മോഹന്‍ലാല്‍ ടീം ഒന്നിയ്ക്കുന്നു

അതേ കേട്ടത് ശരി തന്നെ.. തമിഴകത്തിന്റെ ഇളയദളപതി വിജയ് യും മലയാളത്തിന്റെ സൂപ്പര്‍താരം മോഹന്‍ലാലും ഒന്നിയ്ക്കുന്നു. മുതിര്‍ന്ന നിര്‍മാതാവ് ആര്‍ബി ചൗധരിയുടെ സൂപ്പര്‍ഗുഡ് ഫിലിംസ് നിര്‍മിയ്ക്കുന്ന ചിത്രത്തിന്റെ സംവിധായകന്‍ നവാഗതനായ നടേശനാണ്.

ജില്ല എന്ന പേരാണ് ചിത്രത്തിന് നല്‍കിയിരിക്കുന്നതെന്നാണ് ഇപ്പോള്‍ ലഭിയ്ക്കുന്ന റിപ്പോര്‍ട്ടുകള്‍. എന്നാലിക്കാര്യം സ്ഥിരീകരിയ്ക്കപ്പെട്ടിട്ടില്ല. സൂപ്പര്‍ഹിറ്റായ തുപ്പാക്കിയ്ക്ക് ശേഷം വിജയ് യുടെ നായികയായി കാജര്‍ അഗര്‍വാള്‍ എത്തുന്നുവെന്ന പ്രത്യേകതയും ഈ ചിത്രത്തിനുണ്ടാവും.

മോഹന്‍ലാലിന്റെ മെഗാഹിറ്റ് ചിത്രമായ കീര്‍ത്തിചക്രയുടെ നിര്‍മാതാവാണ് ആര്‍ബി ചൗധരി. ഇപ്പോള്‍ മോഹന്‍ലാലും വിജയ്‌യും ഒന്നിയ്ക്കുന്ന ചിത്രത്തിന് വഴിയൊരുക്കുന്നതും ചൗധരിയുടെ സൂപ്പര്‍ഗുഡ് ഫിലിംസാണ്.

തെന്നിന്ത്യന്‍ സിനിമയിലെ രണ്ട് പ്രമുഖര്‍ ഒന്നിയ്ക്കുന്നുവെന്ന വാര്‍ത്ത ഇരുതാരങ്ങളുടെയും ആരാധകര്‍ക്കും സന്തോഷം പകരുമെന്ന കാര്യത്തില്‍ സംശയമില്ല. ഏപ്രില്‍-മെയ് മാസങ്ങളിലായി ഈ മെഗാ ബജറ്റ് ചിത്രത്തിന്റെ വര്‍ക്കുകള്‍ ആരംഭിയ്ക്കുമെന്നാണ് അറിയുന്നത്.