മമ്മൂട്ടിയുടെ കോസ്റ്റ്യൂം അണിഞ്ഞാണ് ആ ബ്ലോക്ക്ബസ്റ്റര്‍ ചിത്രത്തില്‍ അഭിനയിച്ചത്: വിജയരാഘവന്‍

മുന്‍പൊരു സിനിമയില്‍ മമ്മൂട്ടി അണിഞ്ഞിരുന്ന കോസ്റ്റ്യൂം ആണ് താന്‍ ആ സിനിമയ്ക്ക് വേണ്ടി ഉപയോഗിച്ചതെന്ന് വിജയരാഘവന്‍ പറയുന്നു. റാംജിറാവ് എന്ന സിനിമയിലേക്ക് എന്നെ വിളിക്കുന്നത് സംവിധായകന്‍ സിദ്ധിഖാണ്. ആദ്യം മൂന്ന് വില്ലന്മാര്‍ ഉണ്ടെന്നാണ് പറഞ്ഞത്. പിന്നീട് ഞാന്‍ മാത്രമാണ് സിനിമയിലെ വില്ലനെന്നും വില്ലന്റെ പേരിലാണ് സിനിമയുടെ ടൈറ്റിലെന്നും പറഞ്ഞു.

അതോടെ എനിക്ക് ടെന്‍ഷനായി. എന്റെ മനസില്‍ റാംജിറാവുവിന്റെ രൂപം വളരെ പൊക്കമുളള ഒരാളാണ്. ഞാന്‍ ആ സിനിമയില്‍ അതിനനുസരിച്ച് എന്റെ ലുക്കില്‍ മാറ്റം വരുത്തി. അന്ന് ലാല്‍ ധരിച്ചിരുന്ന ഒരു ഷര്‍ട്ടാണ് ഞാന്‍ റാംജി റാവുവിന് വേണ്ടി തിരഞ്ഞെടുത്തത്. അത് ലാല്‍ മമ്മൂട്ടിയുടെ കയ്യില്‍ നിന്ന് സ്വന്തമാക്കിയതാണ്.

ഫാസിലിന്റെ ഏതോ ഒരു സിനിമയില്‍ മമ്മൂട്ടി അണിഞ്ഞ ഷര്‍ട്ടായിരുന്നു അത്. അങ്ങനെ മമ്മൂട്ടിയില്‍ നിന്ന് ലാലിലെത്തി. പിന്നീട് അത് റാംജിറാവുവിന്റെ കോസ്റ്റ്യൂമായി മാറി, വിജയരാഘവന്‍ പറഞ്ഞു. 1989ലായിരുന്നു സിദ്ധിഖ് ലാലിന്റെ വിജയചിത്രമായ റാംജിറാവ് സ്പീക്കിംഗ് പുറത്തിറങ്ങിയത്. ഫാസില്‍ നിര്‍മ്മിച്ച ചിത്രത്തിന്റെ തിരക്കഥയും സിദ്ധിഖ് ലാല്‍ കൂട്ടുകെട്ടിന്റേത് തന്നെയായിരുന്നു.

റാംജിറാവുവിന് പിന്നീട് തമിഴ്, തെലുങ്ക്, കന്നഡ, ഹിന്ദി ഭാഷകളിലെല്ലം റീമേക്ക് ചിത്രങ്ങളും വന്നിരുന്നു. റാംജിറാവുവിന്റെ രണ്ടാം ഭാഗമായ മന്നാര്‍ മത്തായി സ്പീക്കിംഗ് 1995ലാണ് പുറത്തിറങ്ങിയത്. റാംജിറാവുവിന്റെ തമിഴ് റീമേക്കിലും വിജയരാഘവന്‍ തന്നെയായിരുന്നു തന്റെ കഥാപാത്രത്തെ വീണ്ടും അവതരിപ്പിച്ചത്.

Recommended Video

Mammootty's new photo goes viral | FilmiBeat Malayalam

മലയാളത്തില്‍ നായകനായും സഹനടനായും വില്ലന്‍ വേഷങ്ങളിലുമൊക്കെ തിളങ്ങിയ താരമാണ് വിജയരാഘവന്‍. സൂപ്പര്‍താര സിനിമകളിലെല്ലാം പ്രാധാന്യമുളള വേഷങ്ങളില്‍ നടനും അഭിനയിച്ചിരുന്നു. വിജയരാഘവന്റെ കഥാപാത്രങ്ങള്‍ മിക്കപ്പോഴും ശ്രദ്ധിക്കപ്പെടാറുണ്ട്. വര്‍ഷങ്ങള്‍ നീണ്ട കരിയറില്‍ നിരവധി ശ്രദ്ധേയ സിനിമകളില്‍ നടന്‍ അഭിനയിച്ചിരുന്നു. സിനിമകള്‍ക്ക് പുറമെ നാടകരംഗത്തും തിളങ്ങിയ അഭിനേതാവാണ് വിജയരാഘവന്‍