എമിക്കല്ലാതെ മറ്റാര്‍ക്കും അതിന് കഴിയില്ലെന്ന് വിക്രം

'ബ്രഹ്മാണ്ഡ സംവിധായകന്‍ ശങ്കര്‍ വിക്രമിനെ നായകനാക്കി ഒരുക്കുന്ന ചിത്രം ഐ' എന്ന വിശേഷണത്തോടെയാണ് ചിത്രം തുടക്കം മുതല്‍ വാര്‍ത്തയില്‍ നിറയുന്നത്. എന്നാല്‍ ഐ എന്ന ചിത്രത്തില്‍ നായകനെന്നപോലെ നായികയ്ക്കും പ്രാധാന്യമുണ്ടെന്ന് വിക്രം പറയുന്നു.

എമി ജാക്‌സണല്ലാതെ ഐ യിലെ നായികാ വേഷം ഇത്രയും മനോഹരമാക്കാന്‍ മറ്റാര്‍ക്കും കഴിയില്ലെന്നാണ് വിക്രം പറയുന്നത്. ചിത്രത്തിന്റെ പ്രമോഷന് വേണ്ടി കൊച്ചി ലുലുമാളില്‍ വന്നപ്പോഴാണ് ഐ നായകന്‍ നായികയെ പ്രശംസിച്ചത്.

ചെന്നൈ തമിഴാണ് സിനിമയിലെ സംഭാഷണം. ഡയലോഗില്‍ ഒരു മാറ്റവും വരുത്താന്‍ പാടില്ലെന്ന നിഷ്‌കര്‍ഷത ശങ്കറിനുണ്ടായിരുന്നു. അതുകൊണ്ട് തന്നെ വിമാനത്തിലും കാറിലും സെറ്റിലുമൊക്കെ ഇരുന്ന ഡയലോഗുകള്‍ മനപാഠമാക്കുകയായിരുന്നത്രെ എമി.

2012 ലാണ് എമി ജാക്‌സണ് ഐ യില്‍ അഭിനയിക്കാന്‍ ക്ഷണം ലഭിക്കുന്നത്. അമ്മയുമൊത്ത് യു കെയില്‍ നിന്ന് ശങ്കറിനെ വന്ന് കാണുകയായിരുന്നു. ചിത്രം പൂര്‍ത്തിയാക്കാന്‍ സമയമെടുത്തെങ്കിലും അത്രമികച്ച വേഷമാണ് തനിക്ക് ലഭിച്ചതെന്ന് എമി പറയുന്നു. ഇന്ത്യയില്‍ തന്റെ പ്രിയപ്പെട്ട സ്ഥലം കേരളമാണെന്നും എമി പറഞ്ഞു.