പിതാവിന്റെ 271 കോടി സ്വത്തിന് വേണ്ടിയുള്ള തര്‍ക്കം; നടന്‍ ശിവാജി ഗണേശന്റെ കുടുംബത്തില്‍ നടക്കുന്നതിത്

നടന്‍ പ്രഭു, നിര്‍മാതാവ് രാംകുമാര്‍, ശാന്തി, രാജ്‌വി എന്നിങ്ങനെ നാല് മക്കളാണ് ശിവാജി ഗണേശനുള്ളത്. എന്നാല്‍ പിതാവിന്റെ സ്വത്തില്‍ പെണ്‍മക്കള്‍ക്കും അവകാശമുണ്ടെന്ന് ചൂണ്ടി കാണിച്ചാണ് ശാന്തിയും രാജ്‌വിയും രംഗത്ത് വന്നത്. പ്രഭുവും രാംകുമാറും അനധികൃതമായി സ്വത്ത് തട്ടിയെടുത്തു എന്നാണ് മദ്രാസ് കോടതിയില്‍ നല്‍കിയ ഹര്‍ജിയില്‍ പറയുന്നത്. തങ്ങളറിയാതെ ചില സ്വത്തുക്കള്‍ വിറ്റുവെന്നും സഹോദരന്മാര്‍ വ്യാജ വില്‍പ്പത്രം തയ്യാറാക്കി കബളിപ്പിച്ചതായും സഹോദരിമാര്‍ പറയുന്നു.

ഗോപാലപുരത്തുണ്ടായിരുന്ന ശിവാജിയുടെ വീട് പ്രഭുവും രാംകുമാറും അഞ്ച് കോടിയ്ക്ക് വിറ്റു. റോയപ്പേട്ടയിലെ നാല് വീടുകളുടെ വാടകയില്‍ഒരു വിഹിതം പോലും നല്‍കുന്നില്ല. അമ്മയുടെ സ്വത്തിന്റെയും പത്ത് കോടിയോളം വിലമതിക്കുന്ന ആയിരം പവന്‍ സ്വര്‍ണം, വജ്രം, വെള്ളി തുടങ്ങിയ ആഭരണങ്ങളുടെ വിഹിതവും തരാതെ വഞ്ചിച്ചതായും പരാതിയില്‍ പറയുന്നു.

അഭിനയത്തില്‍ തിളങ്ങി നിന്ന കാലത്ത് ശിവാജി ഗണേശന്‍ ചെന്നൈയില്‍ പലയിടത്തും സ്വത്തുക്കള്‍ വാങ്ങിയിരുന്നു. നിലവില്‍ 271 കോടി രൂപയോളം മൂല്യമുള്ള സ്വത്തുക്കള്‍ താരത്തിന് ഉണ്ടെന്നാണ് വിവരം. അതേ സമയം തങ്ങളുടെ പിതാവ് ഒരു വില്‍പ്പത്രവും തയ്യാറാക്കിയിട്ടില്ല. സഹോദരന്മാര്‍ ചേര്‍ന്നാണ് അതുണ്ടാക്കിയതെന്നുമാണ് താരപുത്രിമാര്‍ പറയുന്നത്. നിലവില്‍ തെന്നിന്ത്യന്‍ സിനിമാലോകത്ത് ഒന്നടങ്കം ഈ വിഷയം വലിയ ചര്‍ച്ചകള്‍ക്ക് കാരണമായിരിക്കുകയാണ്.

ഇതുവരെ പ്രഭുവോ സഹോദരൻ രാംകുമാറോ വിഷയത്തിൽ പ്രതികരിച്ചിട്ടില്ല. വൈകാതെ താരങ്ങളുടെ പ്രതികരണം ഉണ്ടാവുമെന്നാണ് പ്രതീക്ഷിക്കുന്നത്.

Recommended Video

Dilsha Lifestyle | സൗന്ദര്യത്തിന്റെ രഹസ്യം പ്ലാസ്റ്റിക് സർജറിയോ ? രഹസ്യം ദിലു പറയുന്നു | *Interview

ശിവാജി ഗണേശനെ പോലെ പേര് കേട്ട താരത്തിന് നാണക്കേടുണ്ടാവുന്ന പ്രവൃത്തിക്കളാണ് മക്കളില്‍ നിന്നും ഉയര്‍ന്ന് വരുന്നതെന്ന് ആരാധകര്‍ അഭിപ്രായപ്പെടുന്നു. പിതാവിന്റെ പാതയിലൂടെ അഭിനയ രംഗത്തേക്ക് വന്ന പ്രഭു ഇപ്പോഴും അഭിനയത്തില്‍ സജീവമായി തുടരുകയാണ്. ദളപതി വിജയിയ്‌ക്കൊപ്പം വാരിസു എന്ന സിനിമയിലും മറ്റ് നിരവധി പടങ്ങളിലും താരം അഭിനയിക്കുന്നുണ്ട്. സഹോദരന്‍ രാം കുമാര്‍ സിനമയിലും രാഷ്ട്രീയത്തിലും സജീവമാണ്.