ആര്‍എസ് വിമലിന്റെ അഹങ്കാരമോ, പൃഥ്വിരാജിന്റെ കര്‍ണന്‍ ഇനി സംഭവിയ്ക്കുമോ?

പ്രവാസി മലയാളി

പ്രവാസി മലയാളിയായ വേണു കുന്നപ്പിള്ളിയാണ് കര്‍ണന്‍ എന്ന ആര്‍എസ് വിമല്‍ - പൃഥ്വിരാജ് ചിത്രം നിര്‍മിയ്ക്കാനിരുന്നത്. വേണുവിന്റെ ആദ്യ നിര്‍മാണ സംരംഭമായിരുന്നു. സിനിമയെ കുറിച്ച് ഒന്നും അറിയാത്ത വേണു കര്‍ണന്റെ കഥയിലും, പൃഥ്വി - വിമല്‍ കൂട്ടുകെട്ടിലും വിശ്വസിച്ചാണ് നിര്‍മാണം ഏറ്റെടുത്തത്.

പിന്മാറ്റം

എന്നാല്‍ ഇപ്പോള്‍ കേള്‍ക്കുന്ന നിര്‍മാണച്ചുമതലയില്‍ നിന്ന് വേണു കുന്നപ്പള്ളി മാറി എന്ന്. വ്യക്തമായ പ്ലാനിംഗുമായാണ് കര്‍ണന്‍ മുന്നോട്ടുകൊണ്ടുപോയതെങ്കിലും പിന്നീട് പല പ്രശ്‌നങ്ങളും ഉയര്‍ന്നുവന്നു. ഇനിയും ഇതുമായി മുമ്പോട്ടുപോയാല്‍ കൂടുതല്‍ പണം ചെലവാകുമെന്നു മനസിലായതോടെയാണ് കര്‍ണനില്‍ നിന്ന് പിന്‍മാറിയതെന്ന് വേണു വ്യക്തമാക്കുന്നു.

300 കോടിയല്ല ബജറ്റ്

കര്‍ണന്‍ ഒരു സ്വപ്‌ന പദ്ധതിയായിരുന്നു. എഴുപത്, എണ്‍പത് കോടി ബജറ്റിലാണ് ചിത്രം പ്രഖ്യാപിച്ചത്. 300 കോടിയെന്നൊക്കെ പല മാധ്യമങ്ങളിലും വാര്‍ത്തകള്‍ വന്നു. എന്നാല്‍ അത് എങ്ങനെയാണെന്ന് അറിയില്ല എന്നും വേണു പറഞ്ഞിട്ടുണ്ട്.

മാമാങ്കമല്ല കാരണം

കര്‍ണനില്‍ നിന്ന് പിന്മാറിയ വേണു മമ്മൂട്ടിയുടെ ബിഗ് ബജറ്റ് ചിത്രമായ മാമാങ്കം നിര്‍മിക്കാന്‍ ഒരുങ്ങുകയാണ്. മാമാങ്കത്തിന് വേണ്ടിയല്ല കര്‍ണനില്‍ നിന്ന് പിന്മാറിയത് എന്നും, കര്‍ണന്‍ ഉപേക്ഷിച്ച ശേഷമാണ് മാമാങ്കത്തില്‍ എത്തിയത് എന്നും വേണു വ്യക്തമാക്കി. ഈ സിനിമയുടെ കാര്യത്തില്‍ ആശങ്ക വേണ്ട എന്നും നിര്‍മാതാവ് പറയുന്നു.

ഇനി കര്‍ണന്‍ സംഭവിയ്ക്കുമോ?

ഇനി പൃഥ്വിരാജിന്റെ കര്‍ണന്‍ സംഭവിയ്ക്കുമോ എന്നാണ് ആരധകരുടെ ആശങ്ക. നിര്‍മാതാവ് ബജറ്റിനെ ചൊല്ലി പിന്മാറിയ സാഹചര്യത്തില്‍ പുതിയ നിര്‍മാതാവിനെ കിട്ടുക പ്രയാസമാണ്. നിര്‍മാതാവിനെ തപ്പിയെടുത്ത് കര്‍ണന്‍ ആരംഭിയ്ക്കുമ്പോഴേക്കും പൃഥ്വി അനുവദിച്ച ഡേറ്റ് തീരും. അതോടെ ഇല്ലാതെയാവുന്നത് രണ്ട് രണ്ടര വര്‍ഷത്തെ വിമലിന്റെ സ്വപ്‌നവും അധ്വാനവുമാണ്.