ബാഹുബലി 2 ബ്രഹ്മാണ്ഡമെങ്കില്‍ കെജിഎഫ് 2 അതുക്കും മേലെ! ഹോളിവുഡ് ലെവലില്‍ ചിത്രമൊരുങ്ങുന്നു!

കെജിഎഫ്

കോളാര്‍ ഗോള്‍ഡ് ഫാക്ടറിയുടെ പശ്ചാത്തലത്തില്‍ കഥ പറഞ്ഞ ചിത്രമായിരുന്നു കെജിഎഫ്. കന്നഡത്തിലെ റോക്കിംഗ് സൂപ്പര്‍സ്റ്റാര്‍ യഷ് നായകനായി എത്തിയതു തന്നെയായിരുന്നു ചിത്രത്തിന്റെ മുഖ്യ ആകര്‍ഷണമായി മാറിയത്. യഷിന്റെ ഗംഭീര പ്രകടനം പ്രകടനം ചിത്രത്തിന്റെ വലിയ വിജയത്തില്‍ നിര്‍ണായകമായി മാറി. തെന്നിന്ത്യന്‍ സിനിമാ ലോകം ഇതുവരെ പറയാത്ത തരത്തിലുളള ഒരു പ്രമേയം പറഞ്ഞതും സിനിമ ശ്രദ്ധിക്കപ്പെടാന്‍ കാരണമായി.

പ്രഭാസിന് ലഭിച്ച അതേ ജനപ്രീതി

പ്രശാന്ത് നീല്‍ തിരക്കഥയെഴുതി സംവിധാനം ചെയ്ത ചിത്രം കന്നഡത്തിന്റെ മാത്രമല്ല ഇന്ത്യന്‍ സിനിമയുടെ തന്നെ അഭിമാനമാകുകയും ചെയ്തു. ഹോംബിള്‍ ഫിലിംസിന്റെ ബാനറില്‍ വിജയ് കിരഗണ്ടൂര്‍ നിര്‍മ്മിച്ച സിനിമ 50 കോടിയോളം മുതല്‍ മുടക്കുളള ബിഗ് ബഡ്ജറ്റ് ചിത്രം കൂടിയായിരുന്നു. ബാഹുബലിയിലൂടെ പ്രഭാസിന് ലഭിച്ച അതേ ജനപ്രീതി യഷിനും ലഭിച്ചിരുന്നു. സൂപ്പര്‍താരത്തിന്റെ കരിയറില്‍ തന്നെ വലിയ വഴിത്തിരിവായി സിനിമ മാറുകയും ചെയ്തു.

നൂറ് കോടി ക്ലബിലെത്തിയ കന്നഡ ചിത്രം

കന്നഡത്തിലെ ആദ്യ നൂറ് കോടി ക്ലബിലെത്തിയ ചിത്രമായും കെജിഎഫ് മാറിയിരുന്നു. റിലീസിനെത്തി വെറും അഞ്ച് ദിവസം കൊണ്ടായിരുന്നു സിനിമയുടെ ഈ നേട്ടം. കന്നഡത്തിനു പുറമെ മലയാളം,തമിഴ്, തെലുങ്ക്, ഹിന്ദി തുടങ്ങിയ ഭാഷകളിലും സിനിമ റിലീസ് ചെയ്തിരുന്നു. കന്നഡത്തില്‍നിന്നുളള ആദ്യ ആഗോളഹിറ്റ് മൂവീ എന്ന റൊക്കോര്‍ഡും കെജിഎഫ് സ്വന്തമാക്കിയിരുന്നു. വമ്പന്‍ ഹൈപ്പുമായി എത്തിയ ചിത്രത്തിന് പ്രേക്ഷക പ്രതീക്ഷകള്‍ക്കൊത്ത് ഉയരാനും സാധിച്ചിരുന്നു.

കെജിഎഫ് 2

കെജിഎഫിന്റെ ആദ്യ ഭാഗത്തിനു പിന്നാലെ ചിത്രത്തിന് തുടര്‍ച്ചയുണ്ടാകുമെന്ന് അണിയറ പ്രവര്‍ത്തകര്‍ തുറന്നുപറഞ്ഞിരുന്നു. ഇപ്പോഴിതാ രണ്ടാം ഭാഗത്തിനെക്കുറിച്ച് കൂടുതല്‍ വെളിപ്പെടുത്തലുമായി എത്തിയിരിക്കുകയാണ് ഛായാഗ്രാഹകനായ ഭൂവന്‍ ഗൗഡ. ദൃശ്യപരമായി കെജിഎഫ് ആദ്യ ഭാഗത്തേക്കാള്‍ മുന്നില്‍നില്‍ക്കുന്നതാവും രണ്ടാം ഭാഗമെന്ന് ഭുവന്‍ ഗൗഡ പറയുന്നു. ചിത്രം ഹോളിവുഡ് നിലവാരത്തിലാകും പുറത്തിറങ്ങുകയെന്നും അദ്ദേഹം വെളിപ്പെടുത്തി.

പ്രതീക്ഷകള്‍ക്ക് അപ്പുറത്തുളള പ്രതികരണം

ഞങ്ങളുടെ പ്രതീക്ഷകള്‍ക്ക് അപ്പുറത്തുളള പ്രതികരണമായിരുന്നു ആദ്യ ഭാഗത്തിന് ലഭിച്ചിരുന്നത്. അതിനാല്‍ തന്നെ രണ്ടാം ഭാഗത്തെക്കുറിച്ച് പ്രേക്ഷകര്‍ക്കുളള പ്രതീക്ഷകള്‍ പൂര്‍ത്തീകരിക്കുക എന്നത് വലിയ വെല്ലുവിളിയാണ്. ആദ്യ ഭാഗത്തിന്റെ ചിത്രീകരണത്തിനിടെ രണ്ടാം ഭാഗത്തിനായുളള അഞ്ച് ശതമാനം രംഗങ്ങളേ ഷൂട്ട് ചെയ്തിരുന്നുളളു. 95 ശതമാനം ചിത്രീകരണം ഇനിയും പൂര്‍ത്തീകരിക്കാനുണ്ട്. ഭൂവന്‍ ഗൗഡ അഭിമുഖത്തില്‍ വ്യക്തമാക്കി.