ടെലികാസ്റ്റിന് മുമ്പ് വിവരങ്ങൾ ചോർന്നു; സോഷ്യൽ മീഡിയ പ്ലാറ്റ്‌ഫോമുകൾക്കെതിരെ മുന്നറിയിപ്പുമായി മോഹൻലാൽ!

ബിഗ് ബോസ് മലയാളം സീസൺ 7 എപ്പിസോഡുകളുമായി ബന്ധപ്പെട്ട വിവരങ്ങൾ പ്രത്യേകിച്ച് എവിക്ഷൻ വിവരങ്ങൾ ടെലികാസ്റ്റിന് മുൻപായി ചില സോഷ്യൽ മീഡിയ പ്ലാറ്റ്‌ഫോമുകൾ ചോർന്നുവിടുന്നുവെന്ന ആരോപണത്തെ തുടർന്ന് സൂപ്പർസ്റ്റാർ മോഹൻലാൽ കടുത്ത മുന്നറിയിപ്പ് നൽകി. വീക്കെൻഡ് എപ്പിസോഡിന് മുന്നോടിയായി പുറത്തിറങ്ങിയ പ്രൊമോയിലാണ് മോഹൻലാൽ ഈ പ്രതികരണം രേഖപ്പെടുത്തിയത്. ഒരു സസ്പെൻസ് ത്രില്ലർ മൂവി കാണുമ്പോൾ അതിന്റെ ക്ലൈമാക്സ് വിളിച്ച് പറഞ്ഞ് രസം കളയുന്നവരെപ്പോലെയാണ് ഇവർ എന്ന് അദ്ദേഹം താരതമ്യം ചെയ്തു.

Photo Credit: Asianet / Youtube

ഒരു സസ്പെൻസ് ത്രില്ലർ മൂവി ആസ്വദിച്ച് കാണുമ്പോൾ അതിന്റെ ക്ലൈമാക്സ് വിളിച്ച് പറഞ്ഞ് രസം കളയുന്നവർ നമുക്കിടയിലുണ്ടാകും. ഞാൻ പറഞ്ഞുവരുന്നത് സോഷ്യൽ മീഡിയയിലെ ചില രസംകൊല്ലികളെ കുറിച്ചാണ്. ധാരളം പ്രേക്ഷകർ ബിഗ് ബോസ് ഷോയ്ക്ക് വേണ്ടി വലിയ ആകാംക്ഷയോടെയാണ് കാത്തിരിക്കുന്നത്. പക്ഷേ ചില സോഷ്യൽ മീഡിയ പ്ലാറ്റ്‌ഫോമുകൾ ഊഹാപോഹങ്ങളുടെയും ചോർത്തിയെടുക്കുന്ന വിവരങ്ങളുടെയും അടിസ്ഥാനത്തിൽ ടെലികാസ്റ്റിന് മുൻപേ വിവരങ്ങൾ പുറത്തുവിടുന്നു. അത് പ്രേക്ഷകരുടെ ആസ്വാദനാനുഭവം കളയുന്നു മോഹൻലാൽ പറഞ്ഞു.

അദ്ദേഹം തുടർന്നു പറഞ്ഞു... പ്രേക്ഷകരുടെ പരാതികൾ വളരെ ശരിയാണ്. എന്നാൽ സോഷ്യൽ മീഡിയ വഴി ഈ ഷോയെ ഉപജീവനമാർഗമാക്കിയവർ തന്നെയാണ് അതിനെതിരെ പ്രവർത്തിക്കുന്നത് എന്നതാണ് വാസ്തവം. ആധുനിക സാങ്കേതിക വിദ്യകളുടെ ഈ കാലത്ത് അതിനെ കൃത്യമായി നിയന്ത്രിക്കാനും തടയാനും ഞങ്ങൾക്കറിയാം. അത് ഞങ്ങൾ ചെയ്തിരിക്കും. കാത്തിരിപ്പിന്റെ രസം നമുക്ക് കളയാതിരിക്കാം.

മോഹൻലാലിന്റെ ഈ പ്രസ്താവന സോഷ്യൽ മീഡിയയിൽ അനധികൃതമായ വിവര ചോർച്ചയും ഊഹാപോഹങ്ങളുമുള്ള പോസ്റ്റുകൾ വർധിക്കുന്നതിനെതിരെ ശക്തമായ മുന്നറിയിപ്പായി വിലയിരുത്തപ്പെടുന്നു. ബിഗ് ബോസ് മലയാളം ടീം ഇതുസംബന്ധിച്ച് കഠിന നടപടികൾ പരിഗണിക്കുന്നുവെന്നതായും വിവരം.