ഹോം

റിവ്യൂ

ഒരിക്കല്‍ കൂടി മോഹന്‍ലാല്‍ മീശ പിരിച്ചെത്തുകയാണ്. ആറാം തമ്പുരാനും നരസിംഹവും ഒരുക്കിയ ഷാജി കൈലാസാണ് വീണ്ടും മോഹന്‍ലാലിന് മറ്റൊരു മീശ പിരിയന്‍ വേഷം നല്‍കിയിരിക്കുന്നത്.

ഇതിനുമുമ്പ് ലാല്‍ മീശ പിരിച്ചെത്തിയത് നരനിലാണ്. നരന്‍ അതുവരെ കണ്ട മോഹന്‍ലാലിന്റെ മീശ പിരിയന്‍ വേഷങ്ങളില്‍ നിന്ന് വ്യത്യസ്തമായിരുന്നു. ഗ്രാമത്തിന്റെ അന്തരീക്ഷത്തില്‍ ഒരു കെട്ടുകഥക്ക് സമാനമായ വേലായുധന്‍ എന്ന കഥാപാത്രം ലാല്‍ ചെയ്ത മറ്റു വീരസാഹസിക വേഷങ്ങളില്‍ നിന്ന് വേറിട്ടുനിന്നു.

അലിഭായിയും മറ്റൊരു കെട്ടുകഥയാണ്. നരന്‍ പോലെ അലിഭായിയും മറ്റൊരു സൂപ്പര്‍ഹിറ്റായേക്കാം. പക്ഷേ നരനില്‍ കണ്ടതു പോലെ വ്യത്യസ്തതകളൊന്നും ഈ അലിഭായിക്കില്ല. മോഹന്‍ലാലിന്റെ മറ്റു മീശ പിരിയന്‍ വേഷങ്ങളെ ചേര്‍്ന്നുനില്‍ക്കുന്നു അലിഭായിയും. അതിനിടയില്‍ മോഹന്‍ലാലിന്റെ പല വീരസാഹസ പ്രകടനങ്ങളും കണ്ടിരിക്കുകയെന്നത് പ്രേക്ഷകനെ സംബന്ധിച്ചിടത്തോളം ഒരു സാഹസമാവുന്നു.

കോഴിക്കോട് പാളയം മാര്‍ക്കറ്റിന്റെ സംരക്ഷകനായ അന്‍വര്‍ അലി എന്ന കഥാപാത്രമാണ് ഈ ചിത്രത്തില്‍ മോഹന്‍ലാല്‍‍. മാര്‍ക്കറ്റിലെ തൊഴിലാളികള്‍ അയാളെ സ്നേഹത്തോടെ അലിഭായി എന്നുവിളിക്കും. കേരളത്തിലെത്തിയ ബറാമി കുടുംബത്തിന്റെ പാരമ്പര്യമുള്ള അലിഭായി പാളയം മാര്‍ക്കറ്റിന്റെ നെടുംതൂണാണ്. (കേരളത്തിലോ ഇങ്ങനൊരു മാര്‍ക്കറ്റെന്ന ചോദ്യം വേണ്ട. ചോദ്യങ്ങള്‍ ചോദിക്കാതെ സിനിമ കാണാനിഷ്ടപ്പെടുന്ന ആരാധകര്‍ക്കായുള്ളതാണ് ഈ ചിത്രം)

മാര്‍ക്കറ്റ് തകര്‍ത്ത് അവിടെ ഒരു ഷോപ്പിംഗ് കോംപ്ലക്സ് പണിയാനും കോഴിക്കോട് നഗരത്തെ മദ്യവും മദിരാക്ഷിയും സുലഭമായി കിട്ടുന്ന ഒരു ടൂറിസ്റ്റ് കേന്ദ്രമാക്കി മാറ്റാനും പദ്ധതിയിട്ടിരിക്കുന്ന ചില ശക്തികള്‍ക്കെതിരെയാണ് അലിഭായിയുടെ പോരാട്ടം. മാര്‍ക്കറ്റിനെയും തൊഴിലാളികളെയും സംരക്ഷിക്കുകയെന്നതാണ് അയാളുടെ ദൗത്യം.

വില്ലന്‍മാരെ അടിച്ചുനിരത്താനെത്തുന്ന ഈ നായകനും ഒരു നായിക വേണ്ടേ.. അതുമുണ്ട്. മാര്‍ക്കറ്റില്‍ പൂ വിറ്റ് നടക്കുന്ന ചെന്താമര (നവ്യനായര്‍) സ്വയം വിശേഷിപ്പിക്കുന്നത് താന്‍ അലിഭായിയുടെ പെണ്ണാണെന്നാണ്. പക്ഷേ അനീതിയെവിടെ കണ്ടാലും തല്ലിനിരത്താന്‍ നടക്കുന്ന നമ്മുടെ നായകന് പ്രേമിക്കാനും സൊള്ളാനുമൊന്നും സമയമില്ല.