റിവ്യൂ; ഹം ആപ്കെ ഹെ കോൻ- 100 കോടിക്കു മുകളിൽ നേടിയ ആദ്യ ഇന്ത്യൻ സിനിമ

മാതൃകാകുടുംബത്തെ കാട്ടിതന്ന സിനിമ

ആക്ഷനും, വില്ലനും, നന്മ- തിന്മ പോരാട്ടവും ഒന്നുമില്ലാതെ ഒരു കുടുംബകഥയായിരുന്നു ചിത്രം പറഞ്ഞത്. പ്രേം - നിഷ എന്നിവരുടെ പ്രണയവും പിന്നീട് രണ്ട് കുടുംബങ്ങളുടെയും സന്തോഷത്തിനു വേണ്ടി തങ്ങളുടെ പ്രണയം ത്യാഗം ചെയ്യാൻ തയാറാകുന്നതുമാണ് സിനിമയുടെ ഉള്ളടക്കം. ബോളിവുഡ് സിനിമകൾ അക്കാലം വരെ തുടർന്നുപോനിരുന്ന രീതിയിൽ നിന്നും വ്യത്യസ്തമായി സഞ്ചരിച്ച ചലച്ചിത്രം കുടുംബങ്ങൾ ഒന്നടങ്കം ഏറ്റെടുക്കുകയായിരുന്നു.

മറ്റ് കഥാപാത്രങ്ങളെ അവതരിപ്പിച്ച താരങ്ങൾ -

പ്രേം എന്ന മുഖ്യ കഥാപാത്രത്തെ സൽമാൻ ഖാൻ അവതരിപ്പിച്ചപ്പോൾ സൽമാന്റെ നായികയായി മാധുരി ദീക്ഷിത് - നിഷ എന്ന ശക്തമായ വേഷത്തിൽ എത്തി, ഹം ആപ്കെ ഹെ കോൻ തൊട്ട് 2002 വരെ ഏറ്റവും താരമൂല്യമുള്ള നായികയായി മാധുരി ദീക്ഷിത് മാറുകയും ചെയ്തു.

സൽമാന്റെ ജ്യേഷ്ഠനായ രാജേഷ് നാഥ് എന്ന വേഷത്തിൽ മോനിഷ് ബ്ഭാലും, ജ്യേഷ്ഠഭാര്യയുടെ വേഷത്തിൽ രേണുക ഷഹാനയും അഭിനയിച്ചപ്പോൾ മറ്റൊരു പ്രധാന കഥാപാത്രമായെത്തിയത് അനുപം ഖേർ ആണ്.

ചിത്രത്തിന്റെ ദൈർഘ്യം ഏകദേശം മുന്നേകാൽ മണിക്കൂറാണ്. (ഒറിജിനൽ വെർഷൻ ).

14 ഗാനങ്ങളാണ് ചിത്രത്തിൽ ഉള്ളത്.ഈ രണ്ട് കാര്യങ്ങൾ ചിത്രത്തിന്റെ മേന്മയായും പോരാന്മയായും പലരും അഭിപ്രായപ്പെട്ടു എന്നാലും സിനിമയ്ക്ക് ഒട്ടേറെ ആരാധകരെ ഉണ്ടാക്കാൻ സാധിച്ചു. ബോളിവുഡിലെ പ്രശസ്ത സംവിധായകനും നിർമ്മാതാവുമായ കരൺ ജോഹർ പറഞ്ഞിട്ടുണ്ട് താൻ സിനിമ ചെയ്യണം എന്ന് ആഗ്രഹിച്ചത് ഹം ആപ്കെ ഹെ കോൻ - കണ്ടതിനു ശേഷമാണെന്ന്‌.

വിവാഹ വേദികളിലെ തരംഗം!

പ്രേമലയനം - എന്ന പേരിൽ തെലുങ്കിലും മൊഴിമാറ്റിയെത്തിയ ഹം ആപ്കെ ഹെ കോൻ- ൽ രാംലക്ഷമൺ ന്റെ സംഗീതത്തിൽ ഒരുങ്ങിയ 14 ഗാനങ്ങളിൽ പതിനൊന്നും ലതാ മങ്കേഷ്കറിന്റെ ശബ്ദത്തിലൂടെ ഹിറ്റായവയാണ്.

ചിത്രത്തിലെ ഗാനങ്ങൾ വർഷങ്ങളോളം വിവാഹവേദികളിലും, സൽക്കാരങ്ങൾക്കിടയിലുമെല്ലാം തരംഗമായി മാറി.

സൂരജ് ബർജാത്യ തന്നെ കഥയെഴുതി സംവിധാനം ചെയ്ത ചിത്രം അദ്ദേഹത്തിന്റെകൂടി ഉടമസ്ഥതയിലുള്ള രാജശ്രീ പ്രൊഡക്ഷൻസ് ആണ് നിർമ്മിച്ചതും വിതരണം ചെയ്തതും.

കളക്ഷൻ കൊണ്ട് മാത്രമല്ല ചിത്രം ഞെട്ടിച്ചത്, മികച്ച ജനപ്രിയ ചിത്രത്തിനുള്ള ദേശീയ പുരസ്കാരത്തിനൊപ്പം മികച്ച സിനിമ, സംവിധാനം, നായിക തുടങ്ങിയവയ്ക്കുള്ള ഫിലിം ഫെയർ പുരസ്കാരങ്ങളും നേടിക്കൊണ്ടുകൂടിയാണ്.

ബോളിവുഡിലെ എക്കാലത്തെയും മികച്ച കുടുംബചിത്രം അവസാനിക്കുന്നത് കുടുംബത്തിന്റെ സന്തോഷത്തിനു വേണ്ടി തങ്ങളുടെ പ്രണയം പ്രേമും, നിഷയും ത്യാഗം ചെയ്യുകയാണെന്ന് അറിയുന്ന സഹോദരനും കുടുംബത്തിലെ മറ്റ് അംഗങ്ങളും സന്തോഷത്തോടെ അവരുടെ വിവാഹം നടത്തിക്കൊടുക്കുന്നിടത്താണ്

അവിടെ ചിത്രത്തിന്റെ പേര് തെളിയുന്നു:

ഹം ആപ്കെ ഹെ കോൻ (ഞാൻ താങ്കൾക്ക് ആരാണ്?)

പിന്നീട് അത് മാറി പകരം തെളിയുന്നു:

ഹം ആപ്കെ ഹെ (ഞാൻ താങ്കളുടെ യാണ് ).