ഒളിമ്പ്യൻ അന്തോണി ആദത്തിൽ ബാല താരമായി വന്ന് സ്‌കേറ്റിങ് പെർഫോമൻസിലൂടെ ശ്രദ്ധ നേടിയ അരുൺ ആണ് ധമാക്കയിലെ നായകൻ. യുവ എന്ന എഫ്എം പ്രോഗ്രാമിലൂടെ ആർജെ ശംഭു അരുണിനെ പരിചയപ്പെടുത്തുന്ന 'വറൈറ്റിയിലൂടെ' ആണ് ധമാക്ക തുടങ്ങുന്നത്. തുടർന്ന് ധർമ്മജന്റെ ശിവ വരുന്നു. ഒമർ സ്വയം ട്രോളുന്ന ഡയലോഗിടുന്നു.

ആദ്യമേ പറയാല്ലോ ശോകമാണ് അരുണിന്റെ കാര്യം. അത്യാവശ്യം സ്മാർട്നെസ്സ് ഒക്കെ ആവശ്യമുള്ള ഒരു ക്യാരക്റ്റർ ആയിരുന്നു. പക്ഷെ പയ്യൻ നശിപ്പിച്ചു പണ്ടാരടങ്ങി കളഞ്ഞു. ഡബിൾ മീനിംഗ് പറയാനും വേണമല്ലോ ഒരു എനർജി. ബാലു വർഗീസിന്റെയൊക്കെ വില അറിയുന്നത് ഇങ്ങനെയാണ്.

പതിവുപോലെ ബിടെക്ക് (അതും മെക്ക് തന്നെ) പൊട്ടി അന്തവും കുന്തവുമില്ലാതെ നിക്കുന്നവനാണ് നായകൻ. ഉഡായിപ്പുകാരൻ അപ്പൻ. ഇത്തവണ ലാൽ അല്ല മുകേഷ് ആണ് ഈ റോളിൽ വരുന്നത്. അമ്മയായി ഉർവശിയും അപ്പാപ്പനായി ഇന്നസെന്റുമുണ്ട്.

മുകേഷ് ഉർവശി ജോഡിയെ കുറെ കാലം കഴിഞ്ഞ് സ്‌ക്രീനിൽ കാണുന്നതിന്റെ ഒരു സന്തോഷം ധമാക്ക തരുന്നുണ്ട്. അത്ര കിടിലൻ ക്യാരക്ടറുകൾ ഒന്നുമല്ലെങ്കിലും ദോഷം പറയരുതല്ലോ രണ്ടാളും നല്ല ഫോമിലാണ്. പടത്തിന്റെ ചെറിയ ചില ആശ്വാസങ്ങൾ ഇതൊക്കെയാണ്.

ഗോപി സുന്ദറിനെ അഴിഞ്ഞാടാൻ വിട്ടുകൊണ്ടുള്ള ധാരാളം പാട്ടുകൾ ധമാക്കയിൽ ഉടനീളം വാരി വിതറിയിട്ടുണ്ട്. കളറുകൾ വാരിയെറിഞ്ഞ് കൊണ്ടുള്ള ശബ്ദമുഖരിത കോലാഹലങ്ങൾ. ഇതിനിടയിൽ നിലവാരം തീരെ കുറഞ്ഞ വളിപ്പുകളുടെ കുത്തൊഴുക്ക് കൂടി ആവുമ്പോൾ ധമാക്ക നല്ലൊരു പരിധി വരെ അസഹനീയമാണ്.

നിക്കി ഗൽറാണിയാണ് നായിക. ഉടലിന് പ്രാധാന്യം നൽകിക്കൊണ്ട് വേറെയും ഒരുപാട് നടികളെ അണിനിരത്തുന്നത് ആർക്കെങ്കിലുമൊക്കെ ആനന്ദം പകരുന്നുണ്ടാവും. ശാലിൻ സോയ, നേഹ സക്‌സേന തുടങ്ങിയ പേരുകൾ സിനിമയിൽ കാണാം. ഹരീഷ് കണാരന്റെയും സലിം കുമാറിന്റെയും റോളുകൾ നന്നായിട്ടുണ്ട്. സർക്കാർ ആശുപത്രികളെ പ്രൊമോട്ട് ചെയ്യുന്ന അവസാനഭാഗവും പടത്തിന്റെ പൊതുനിലവാരത്തിനപ്പുറമുള്ള പോസിറ്റീവാണ്.