പടത്തിനു കേറുംമുമ്പ് പ്രൊഡക്ഷൻ കമ്പനിയുടെ പേര് ആണ്l😜 കൗതുകമുണർത്തിയത്. ഡബിൾ മീനിംഗ് പ്രൊഡക്ഷൻസ്. നിർമ്മാതാവ് അരുൾ മൊഴി മാണിക്യം. നായകൻ ഉദയനിധി സ്റ്റാലിൻ.. (അടി... സക്കെ.) കൂട്ടിന് അദിതി റാവു, നിത്യ മേനോൻ!

ഉദയനിധിയെ ഉപയോഗപ്പെടുത്തിയിട്ടുണ്ടാവുക എന്നറിയാനുള്ള കൗതുകത്തോട് കൂടി സീറ്റിൽ ചെന്നിരിക്കുമ്പോൾ ബ്ലൈൻഡ് ആയ ഗൗതം എന്ന വെൽ ഡ്രെസ്സ്‌ഡ് ക്യാരക്ടറായി ഉദയനിധി തലങ്ങും വിലങ്ങും മേഞ്ഞു നടക്കുന്നു. ആർ ജെ ആയ ഡാകിനിയോട് ഓന് മുടിഞ്ഞ ക്രഷാണ്. ഓള് ചെല്ലുന്നിടത്തെല്ലാം അന്ധനാണെന്ന നഗ്ന സത്യം മറന്നുകൊണ്ട് ഗൗതം എത്തിച്ചേരുമ്പോൾ ഡാകിനിക്ക് മാത്രമല്ല നമ്മക്ക് പോലും ഒരു എടങ്ങേറു തോന്നും.

പിന്നെ സില്മയല്ലേ... നായികയ്ക്ക് ചായാതെ വേറെ വഴിയില്ലല്ലോ. ചെറിയ ഒരു പസിലും കൊടുത്ത് ഉദയനിധിയെങ്കിൽ ഉദയനിധി എന്ന മട്ടിൽ പ്രണയിക്കാൻ തയ്യാറെടുക്കുമ്പോഴാവും അവരുടെ ജീവിതത്തിൽ മറ്റേ പണ്ടാരക്കാലൻ കയറിവരുന്നത്. സൈക്കോ .

സൈക്കോക്കാരൻ സ്റ്റാമ്പ്, തീപ്പെട്ടിചിത്രം , കോയിൻ, കറൻസി, സ്ത്രീകളുടെ അടിവസ്ത്രം, എന്നിവയൊക്കെ ശേഖരിക്കുന്നവരെ പ്രത്യേക തരം ഒരു കളക്ഷൻ ഹോബിയാക്കിയവൻ ആണ്. തട്ടിക്കൊണ്ടുവന്ന ആളുകളുടെ തലയാണ് ഓൻ വെട്ടിയെടുത്ത് ആൽബത്തിൽ ഒട്ടിച്ച് വച്ചിരിക്കുന്നത്.. കൊച്ചുകള്ളൻ.. അതിന് അവനുള്ള സെറ്റപ്പും ഇൻഫ്രാ സ്ട്രക്ച്ചറും സൈക്കോകളുടെ സ്ഥിരം ബാക്ക്ഗ്രൗണ്ട് തന്നെ..

നായികയെ തട്ടിക്കൊണ്ടുവന്നതോടു കൂടി ഓന്റെ അധോഗതിയും ദുഃഖവെള്ളിയാഴ്ചയും ഒന്നിച്ചാരംഭിച്ചു എന്ന് നമ്മക്കറിയാലോ. അതിനി ഇപ്പൊ നായകൻ അന്ധനും ബധിരനും മൂകനുമാണെങ്കിലും വിധിഹിതത്തെ തടുക്കുക അസാധ്യം. Who എന്നതും how എന്നതുമല്ല why എന്നതിനെ കൂട്ടുപിടിച്ചാണ് മിഷ്കിൻ പടത്തെ രക്ഷപ്പെടുത്താൻ നോക്കുന്നത് . പക്ഷെ ഇത് ഇതുപോലൊക്കെ തന്നെ എവിടെയോ കണ്ട ദേ ജാവു അപ്പോഴും നമ്മക്ക് ഉണ്ടാവും . (ഗൗതം മേനോന്റെ നടുനിശി നായ്ക്കളിൽ ഒക്കെയാണ് പെട്ടെന്ന് ഓർമ വരുന്നത്) .

ആൽഫ്രെഡ് ഹിച്കോക്കിന് ട്രിബ്യൂട്ട് എന്ന നിലയിൽ മിഷ്കിൻ ബുദ്ധമത മിത്തുകളെ കൂടി കൂട്ടുപിടിച്ചു തയാർ ചെയ്തതാണ് സ്ക്രിപ്റ്റ് എന്ന് എവിടെയോ വായിച്ചു. ഒറിജിനൽ അംഗുലീമാലൻ മനുഷ്യരുടെ വിരൽ ആയിരുന്നു കളക്റ്റ് ചെയ്തിരുന്നതെങ്കിൽ യെവൻ തലയാക്കി. ഗൗതം എന്ന നായകൻ ഗൗതമബുദ്ധൻ . ഡാകിനിയും അവിടന്ന് വന്നത് തന്നെ . ബുദ്ധനെ അന്ധനാക്കിയത് ഉദയനിധിയുടെ പ്രകടനപരമായ അവശത പരിഗണിച്ചു ആയിരിക്കും . തെറി നിറഞ്ഞ ഡയലോഗുകൾ തന്റേത് മാത്രമായ റെൻഡറിംഗിൽ പറയുന്ന നിത്യാ മേനോന്റെ ക്യാരക്ടർ കമല. ഇളയരാജയുടെ സുവർണകാലത്തെ അനുസ്മരിപ്പിക്കുന്ന ഒരു ഡ്യുയറ്റ് ഉള്ളതും പ്രസ്താവ്യം. ഇത് തന്നെ സൈക്കോ .. ഒടുവിൽ ബുദ്ധകാരുണ്യം വഴിഞ്ഞൊഴുകും .