കോളേജ് കുമാരൻ, നാടൻ പെണ്ണും നാട്ടുപ്രമാണിയും തുടങ്ങി പത്തോളം സിനിമകൾക്ക് തിരക്കഥ രചിച്ചിട്ടുള്ള സുരേഷ് പൊതുവാൾ ആദ്യമായി സംവിധായകനാവുന്ന സിനിമയാണ് ഉൾട്ട. എന്റർടൈൻമെന്റ് ആണ് ലക്ഷ്യം വെച്ചിരിക്കുന്നത്. ചിലയിടത്തൊക്കെ ചിരിപ്പിക്കുന്നുണ്ട്. പക്ഷെ പടത്തിന്റെ മൊത്തത്തിലുള്ള നിലവാരം പൊതുവാളിന്റെ സ്ക്രിപ്റ്റിലുള്ള മേല്പറഞ്ഞ രണ്ട് പടങ്ങളെ പോലെയൊക്കെ തന്നെ.

അനുശ്രീയും രമേശ്‌ പിഷാരടിയുമാണ് ഉൾട്ടയിലെ ലീഡിംഗ് പെയർ. പൊന്നാപുരം പഞ്ചായത്ത്‌ പ്രസിഡന്റ് പൗർണമിയും ഭർത്താവ് പുരുഷോത്തമനുമാണ് യഥാക്രമം അവർ. പ്രതിപക്ഷപാർട്ടിയായ പിപിപിയുടെ നേതാവ് കൂടിയാണ് പുരുഷു. അടിയും തടയുമായുള്ള ഇവരുടെ ബന്ധം വിചിത്രമാണ്.

കണ്ടിടത്തൊക്കെ അന്യോന്യം വച്ച് ആട്ടുക, പരസ്പരം കൊട്ടേഷൻ കൊടുക്കുക എന്നതൊക്കെയാണ് ഇവരുടെ സ്ഥിരം കലാപരിപാടി. ഇവർ മാത്രമല്ല, പൊന്നാപുരത്തെ മിക്കവാറും എല്ലാ ദമ്പതികളും പരസ്പരം ശത്രുക്കളായിട്ടാണ് കാണുന്നത്. അതിനിടയിലെ ഏക പ്രണയജോഡി അവിടെ എത്തിച്ചേരുന്ന ഗോകുൽ സുരേഷിന്റെ ചന്ദ്രുവും പ്രയാഗയുടെ പാറുവും മാത്രം.

താൻ സൃഷ്ടിച്ച സങ്കല്പികഗ്രാമത്തിലെ സ്ത്രീ പുരുഷ സംഘട്ടനം ഒഴിവാക്കാനും അവരെ സമാധാന ചിത്തരാക്കാനും സംവിധായകൻ ഉപദേശവുമായി ഇറങ്ങുന്നതാണ് സെക്കന്റ് ഹാഫിൽ കാണുന്നത്. അതായത് പറഞ്ഞുവരുമ്പോൾ പെണ്ണുങ്ങൾ ഒരു പൊടിക്ക് അടങ്ങണം എന്ന് തന്നെ.

തൊണ്ണൂറുകളിലെ ജയറാം സിനിമകളോടാണ് ഉൾട്ടയുടെ പ്രമേയത്തിനും അവതരണത്തിനുമൊക്കെ കൂടുതൽ സാമ്യം. അതിനാൽ ആ ഒരു നിലവാരത്തിലുള്ള ആസ്വാദനമേ സിനിമയിൽ നിന്ന് സാധ്യമാവുകയുള്ളൂ. അഭിരാമി നായികയായ ഇവർ സന്തുഷ്ടരാണ് ഒക്കെ ഓർക്കാം. പക്ഷെ കൊല്ലം 2019 ആയതുകൊണ്ട് സ്ത്രീ വിരുദ്ധത പരസ്യമായി പ്രകടിപ്പിക്കാതിരിക്കാനുള്ള പക്വത സംവിധായകൻ കാണിക്കുന്നു.

സലിം കുമാർ, ജാഫർ ഇടുക്കി, സുരഭിലക്ഷ്മി, ഷാജോൺ, സിദ്ദിഖ് തുടങ്ങി മുപ്പതില്പരം നടീനടന്മാർ സിനിമയിലുണ്ട്. ഗോപിസുന്ദർ പശ്ചാത്തലസംഗീതത്തിൽ പലപ്പോഴും അഴിഞ്ഞാടുന്നു. എന്തായാലും ഉൾട്ടയുടെ ടോട്ടാലിറ്റിയ അതൊന്നും ബാധിക്കുന്നേയില്ല.