അസുർ: വെൽകം ടു യുവർ ഡാർക്ക് സൈഡ് റിവ്യൂ: കലിയുഗമാണ്, നന്മയും തിന്മയും തമ്മിൽ യുദ്ധമാണ് — റിവ്യൂ

അസുരന്മാരെ പലവിധത്തിൽ കണ്ടിട്ടുണ്ടെങ്കിലും വൂട്ടിന്റെ അസുരൻ പുതിയതാണ്. സിബിഐ ഓഫീസർ ധനജയ് രാജ്പൂത്(അർഷാദ് വർസി) ഭാര്യയെ വളരെ ദുരൂഹ സാഹചര്യത്തിൽ കൊല്ലപ്പെടുന്നു. സിറ്റിയിൽ മുൻപ് നടന്ന സീരിയൽ കൊലപാതക രീതിയിലാണ് കൊല്ലപ്പെടുന്നത്. അന്വേഷണം ധനജയിലേക്ക് തിരിയുന്ന സാഹചര്യത്തിൽ സിബിഐലെ പഴയ ഓഫീസറും ധനജയുടെ പഴയ ശിഷ്യനുമായ നിഖിൽ നായർ(ബരുൺ സോബ്തി) എഫ്ബിഐ ൽ നിന്നും വരുന്നു. അന്വേഷണത്തിൽ ധനഞ്ജയ് കുറ്റക്കാരനാണെന്ന് കണ്ടുപിടിക്കുകയും ജയിലിൽ അടയ്ക്കുകയും ചെയ്യുന്നു. പക്ഷെ വീണ്ടും സീരിയൽ കൊലപാതകങ്ങൾ അരങ്ങേറുന്നതും നിഖിൽ അന്വേഷിക്കുന്നതും ആണ് കഥ.

അർഷാദ് വർസി, ബരുൺ സോബ്തി തുടങ്ങിയവരെ കൂടാതെ ഷാരിബ് ഹാഷ്മി( ലോലർക് ദുബൈ), രിധി ദോഗ്ര(നുഷ്രത്‌), അനുപ്രിയ ഗോയെങ്ക(നൈന നായർ), വിഷബ് ബൻസാൽ(ശുബ്) തുടങ്ങിയവരും വളരെ നല്ല പ്രകടനം കാഴ്ചവയ്ക്കുന്നുണ്ട്. സ്ഥിരം സീരിയൽ കില്ലർ സബ്ജെക്ട് ആണെങ്കിലും അതിനെ ഹിന്ദു മിത്തോളജിയുമായി കോർത്തിണക്കി വളരെ നല്ലൊരു ത്രില്ലെർ സമ്മാനിക്കാൻ സംവിധായകൻ ഒനി സെന്നിന് കഴിഞ്ഞിട്ടുണ്ട്.

വരാണസിയും ഡൽഹിയും മുഖ്യ സഥലങ്ങളാകുന്ന അസുർ എഴുതിയിരിക്കുന്നത് ഗൗരവ് ശുക്ലയാണ്. മറ്റു സീരിയൽ കില്ല്ലിങ് സീരിസിനെ അപേക്ഷിച്ചു ഹിന്ദു മിത്തോളജിയെ കോർത്തിണക്കിയാണ് അസുറിനെ വ്യത്യസ്തമാക്കുന്നത്. നെറ്റ്ഫ്ലിക്സിന്റെ സേക്രഡ് ഗെയിംസിന് ശേഷം ഹിന്ദു മിത്തോളജി അടിസ്ഥാനമാക്കി പറയുന്ന ത്രില്ലെർ സീരീസ് ആണ് അസുർ.

അർഷാദ് വർസിയും ബരുൺ സോബ്തിയും മികച്ച അഭിനയം കാഴ്ചവയ്ക്കുമ്പോൾ ശുബ് എന്ന കഥാപാത്രമായി അഭിനയിച്ച വിഷബ് ബന്സാലിന്റെ പ്രകടനം അഭിനന്ദനാർഹമാണ്. ഒരു സൈക്കോപാത്തിന്റെ മാനസിക വ്യവഹാരം വളരെ നല്ല രീതിയിൽ പ്രകടിപ്പിക്കുന്നുണ്ട് വിഷബ്. മേക്കിങ് കൊണ്ട് മികച്ച സീരിസ് തന്നെയാണ് അസുർ. പശ്ചാത്തല സംഗീതവും ഛായാഗ്രഹണവും വളരെ മുന്നിട്ടു നിൽക്കുണ്ട്.

എട്ട് എപ്പിസോഡുകളുള്ള അസുർ ആദ്യ എപ്പിസോഡുകളിൽ പുലർത്തിയിരുന്ന ത്രില്ലെർ മൂഡ് നിലനിർത്താൻ കഴിയാതെ വരുന്നുണ്ട്. അവസാന എപ്പിസോഡുകളാകുമ്പോഴേക്കും കാഴ്ചക്കാർക്ക് ഊഹിക്കാവുന്ന ഒരു ക്ലൈമാക്സ് ആണ് അസുർ മുന്നോട്ട് വയ്ക്കുന്നത്. ഇത് മൊത്തം സീരിസിനെയും പിന്നോട്ട് വലിക്കുന്ന തരത്തിലുള്ള ഒരു രീതിയായി കാഴ്ചക്കാരന് അനുഭവപ്പെടാം.

കൊറോണക്കാലം ഒറ്റിറ്റി പ്ലാറ്റുഫോമുകൾക്ക് ചാകരയാണ് കൊണ്ടുവന്നത്. നെറ്റ്ഫ്ലിക്സ്, ആമസോൺ പ്രൈം, ഹോട്സ്റ്റാർ മുതലായ മുൻകിട പ്ലാറ്റുഫോമുകൾ കാഴ്ചക്കാർക്ക് വ്യത്യസ്തമായ പരിപാടികൾ മുന്നോട്ടു വയ്ക്കുമ്പോൾ എടുത്തുപറയാൻ വലിയ സീരിസുകൾ ഒന്നും തന്നെയില്ലാത്ത വൂട്ട് സെലെക്ടിനു അസുർ ഒരു മുതൽക്കൂട്ട് തന്നെയാണ്.