കുട്ടികള്‍ ഇപ്പോള്‍ വേണ്ടെന്നുള്ള തീരുമാനം മോശം സ്ത്രീയാക്കുന്നില്ല, തുറന്നെഴുത്തുമായി ഗായിക ജ്യോത്സ്ന

സ്ത്രീകളോടാണ് ജ്യോത്സ്നയ്ക്ക് പറയാനുള്ളത്. പരിപൂര്‍ണത എന്നത് ഒരു മിഥ്യയാണ്. നിങ്ങള്‍ എല്ലാം തികഞ്ഞ ഒരു ഭാര്യയോ, അമ്മയോ, മകളോ, മരുമകളോ, കരിയറിലെ തികഞ്ഞ സ്ത്രീയോ ആയില്ലെങ്കിലും കുഴപ്പമില്ല. നിങ്ങളുടെ വീട് വൃത്തിയായി കിടന്നാലോ, ആഗ്രഹിക്കുന്ന കാലത്തോളം കുഞ്ഞിനെ മുലയൂട്ടാന്‍ കഴിഞ്ഞില്ലെങ്കിലോ കുഴപ്പമില്ല. കുട്ടികള്‍ ഇപ്പോള്‍ വേണ്ടെന്ന തീരുമാനമാണ് എടുക്കുന്നതെങ്കിലും കുഴപ്പമില്ല. ജോലിത്തിരക്കു കാരണം കുട്ടിയുടെ സ്‌കൂള്‍ പ്രവര്‍ത്തനങ്ങള്‍ മിസ് ചെയ്താലും കുഴപ്പമില്ല. ഇതൊന്നും നിങ്ങളെ ഒരു ഭീകര സ്ത്രീയാക്കുന്നില്ല. നിങ്ങള്‍ മനുഷ്യര്‍ മാത്രമാണ്. എല്ലാം തികഞ്ഞ സ്ത്രീ എന്നത് ഒരു മിഥ്യയാണ്.

പുരുഷന്മാരോട് പ്രിയ ഗായികയാക്ക് പറയാനുള്ളത്.നിങ്ങളുടെ വികാരങ്ങള്‍ പ്രകടിപ്പിക്കുന്നതില്‍ തെറ്റില്ല. അത്താഴത്തിന്റെ പണം നിങ്ങളുടെ സ്ത്രീ കൊടുക്കുന്നതില്‍ തെറ്റില്ല. നിങ്ങള്‍ വീട്ടിലിരിക്കുന്ന പങ്കാളിയാകാന്‍ താല്‍പര്യപ്പെടുന്നതില്‍ തെറ്റില്ല. നിങ്ങള്‍ക്ക് ഇഷ്ടമുള്ള പിങ്ക് വസ്ത്രങ്ങള്‍ ധരിക്കുന്നതില്‍ കുഴപ്പമില്ല. നിങ്ങള്‍ എന്താണ് തോന്നുന്നത് എന്നതിനെക്കുറിച്ച് പറയുന്നതില്‍ കുഴപ്പമില്ല.എല്ലാം തികഞ്ഞ പുരുഷന്‍ എന്നത് ഒരു മിഥ്യയാണ്.

സന്തോഷമായിരിക്കുന്നുണ്ടോ എന്നത് മാത്രമാണ് കണക്കിലെടുക്കേണ്ടതെന്നും ജ്യോത്സ്‌ന കുറിപ്പില്‍ പറയുന്നു. നിങ്ങളുടെ ശരീരത്തിൽ ഒരു കിലോ കൂടുന്നതോ പ്രധാനപ്പെട്ട ഏതെങ്കിലും പദ്ധതികൾ മുടങ്ങുന്നതോ ഒന്നുമല്ല നിങ്ങൾ ആരാണെന്നു നിശ്ചയിക്കുന്ന ഘടകങ്ങൾ. നിങ്ങൾ സന്തോഷമായിരിക്കുന്നുണ്ടോ എന്നത് മാത്രമാണ് കണക്കിലെടുക്കേണ്ടത്. പരിപൂർണതയിലേയ്ക്ക് എത്തിപ്പെടാൻ നിങ്ങൾക്കു മേലുണ്ടാകുന്ന സമ്മര്‍ദ്ദം ഒരിക്കലും നിങ്ങളെ നിങ്ങളല്ലാതാക്കരുത്. ഈ വാക്കുകൾ ഇന്ന് ആർക്കെങ്കിലും പ്രചോദനമാകുമെങ്കിൽ അങ്ങനെയാകട്ടെ- എന്ന് പറഞ്ഞു കൊണ്ടാണ് കുറിപ്പ് അവസാനിപ്പിക്കുന്നത്.

ജ്യോത്സ്‌നയുടെ കുറിപ്പ് ആരാധകരുടെ ഇടയിൽ വലിയ ചർച്ചയായിരിക്കുകയാണ്. മികച്ച പ്രതികരണമാണ് ഗായികയുടെ ഈ പോസ്റ്റിന് ലഭിച്ചിരിക്കുന്നത്. താരങ്ങൾ ഉൾപ്പെടെ തങ്ങളുടെ പ്രതികരണം പങ്കുവെച്ച് രംഗത്തെത്തിയിട്ടുണ്ട്. ജ്യോത്സ്നയുടെ കുറിപ്പിന് പിന്നിലെ കാരണമാണ് ആരാധകർക്ക് അറിയേണ്ടത്. ഇത് പ്രേക്ഷകർ ചോദിക്കുന്നുമുണ്ട്.കൂടാതെ ലിംഗവിവേചനമില്ലാതെ ഇരു വിഭാഗക്കാരുടേയും സമർദ്ദങ്ങളെ കുറിച്ച് ജ്യോത്സ്ന കൃത്യമായി കുറിച്ചുവെന്നാണ് ആരാധകർ പറയുന്നത്. പോസിറ്റീവ് കമന്റുകളാണ് പോസ്റ്റിന് ലഭിക്കുന്നത്.