പോടാ പോടിയിലൂടെ ശോഭന വീണ്ടും

രണ്ട് വര്‍ഷത്തെ ഇടവേളയ്ക്ക് ശേഷം ശോഭന വീണ്ടും ക്യാമറയുടെ മുന്നിലേക്ക്. ചിമ്പു നായകനാവുന്ന 'പോടോ പോടി'യിലൂടെയാണ് ദേശീയ പുരസ്‌കാര ജേത്രി കൂടിയായ താരം വീണ്ടും വെള്ളിത്തിരയിലേക്കെത്തുന്നത്.

ശരത്കുമാറിന്റെ മകള്‍ വരലക്ഷ്മി നായികയാവുന്ന പോടാ പോടിയില്‍ വരലക്ഷ്മിയുടെ ഡാന്‍സ് ടീച്ചറുടെ വേഷത്തിലാണ് ശോഭന എത്തുന്നത്. 2009ല്‍ പുറത്തിറങ്ങിയ സാഗര്‍ ഏലിയാസ് ജാക്കിയാണ് ശോഭനയുടെ അവസാന ചിത്രം. തമിഴില്‍ ഏറെക്കാലത്തിന് ശേഷമാണ് ശോഭന ഒരു ഓഫര്‍ സ്വീകരിയ്ക്കുന്നത്. നൃത്താധ്യപികയുടെ വേഷത്തില്‍ ഏറെ അഭിനയസാധ്യതകളുണ്ടെന്ന് കണ്ടാണ് തീരുമാനം.

നവാഗതനായ വിഘ്‌നേഷ് ശിവ സംവിധാനം ചെയ്യുന്ന പോടാ പോടിയുടെ ഷൂട്ടിങ് പോണ്ടിച്ചേരിയില്‍ പുരോഗമിയ്ക്കുകയാണ്. ലണ്ടന്‍, സ്‌പെയന്‍ എന്നിവിടങ്ങളും സിനിമയുടെ ലൊക്കേഷനാണ്. ആഗസ്റ്റില്‍ ചിത്രം തിയറ്ററുകളിലെത്തും.