യന്തിരന്‍- തിയറ്ററുകളില്‍ റെയ്ഡ്

By Ajith Babu

| Published: Saturday, October 9, 2010, 14:24 [IST]

ബാംഗ്ലൂരില്‍ യന്തിരന്‍ പ്രദര്‍ശിപ്പിയ്ക്കുന്ന തിയറ്ററുകളില്‍ ആദായനികുതി വകുപ്പിന്റെ റെയ്ഡ്. നികുതി നിയമം വ്യാപകമായി ലംഘിയ്ക്കപ്പെടുന്നുവെന്ന പരാതികള്‍ ഉയര്‍ന്നതിനെ തുടര്‍ന്നാണിത്. സെക്കന്റ് ക്ലാസ് തിയറ്ററുകളില്‍ പോലും 150-200 രൂപ വരെ ടിക്കറ്റുകള്‍ക്ക് ഈടാക്കുന്നുവെന്ന് പരാതിയുണ്ട്. മള്‍ട്ടിപ്ലെക്‌സുകളിലും ഇത് തന്നെയാണ് സ്ഥിതി. ഇവിടങ്ങളില്‍ 200-300 രൂപയാണ് നിരക്കത്രേ.

അന്യഭാഷാ ചിത്രങ്ങള്‍ക്ക് കര്‍ണാടകത്തില്‍ 30 ശതമാനമാണ് വിനോദ നികുതി. എന്നാല്‍, അമിത ടിക്കറ്റ് ചാര്‍ജ്ജ്് ഇടാക്കുന്ന തിയറ്ററുകള്‍ കൂടുതല്‍ ലഭിക്കുന്ന തുകയ്ക്ക് നികുതി അടയ്ക്കുന്നില്ലെന്ന് ആദായ നികുതി വകുപ്പ് കണ്ടെത്തി.

യന്തിരന്റെ വിതരണാവകാശത്തിന് നല്‍കിയ 9 കോടി എത്രയും പെട്ടെന്ന് തിരികെപ്പിടിയ്ക്കാനാണ് ഈ പകല്‍ക്കൊള്ളയെന്ന് ആരോപണമുണ്ട്.. ഇതിനെതിരെ പലയിടത്തും പ്രേക്ഷകരും പ്രതിഷേധമുയര്‍ത്തിയിരുന്നു. അന്യഭാഷാ ചിത്രങ്ങള്‍ സംസ്ഥാനത്ത് പരമാവധി 24 തിയറ്ററില്‍ മാത്രമേ പ്രദര്‍ശിപ്പിക്കാവൂ എന്ന കര്‍ണാടക ഫിലിം ചേംബര്‍ ഓഫ് കോമേഴ്‌സിന്റെ വിലക്കും യന്തിരന്റെ വിതരണക്കാര്‍ ലംഘിച്ചിരുന്നു.