ഇളയദളപതിയുടെ നായികയായി സോനം കപൂര്‍

ഒടുവില്‍ ബോളിവുഡിന്റെ യുവസുന്ദരി സോനം കപൂര്‍ തമിഴകത്തേയ്ക്ക്. പലസംവിധായകരും ശ്രമിച്ച് നടക്കാത്തകാര്യമാണ് തമിഴിലെ സ്റ്റാര്‍ സംവിധായകനായ എആര്‍ മുരുഗദോസ് സാധിച്ചെടുത്തിരിക്കുന്നത്. വിജയ് നായകനാകുന്ന ചിത്രത്തിലേയ്ക്കാണ് സോനം നായികയായി എത്തുന്നത്.

ഏഴാം അറിവ് എന്ന സൂര്യച്ചിത്രത്തിന് ശേഷം ഒരുക്കുന്ന വമ്പന്‍ പ്രൊജക്ടിലേയ്ക്കാണ് മുരുഗദോസ് സോനത്തെ കൊണ്ടുവരുന്നത്. നൂറുകോടിയോളം രൂപ മുതല്‍ മുടക്കി ഒരുക്കുന്ന ഈ ചിത്രം ഒരു ആക്ഷന്‍ എന്റര്‍ടെയ്‌നറായിരിക്കുമെന്നാണ് സൂചന.

ആസ്‌കാര്‍ ഫിലിംസ് നിര്‍മ്മിക്കുന്ന ഈ ചിത്രത്തില്‍ വിജയ്‍യുടെ പിതാവ് ചന്ദ്രശേഖറും നിര്‍മ്മാണപങ്കാളിയാവുന്നുണ്ട്. ഗജിനി എന്ന ചിത്രത്തിലൂടെ തരംഗം സൃഷ്ടിച്ച മുരുഗദോസ് തമിഴില്‍ ഏറ്റവും ഡിമാന്റുള്ള സംവിധായകനാണ്. ബോളിവുഡ് താരങ്ങള്‍ വരെ അദ്ദേഹത്തിന്റെ ചിത്രത്തില്‍ നായകവേഷം കിട്ടാന്‍ മത്സരമാണ്. ഈ അവസരത്തിലാണ് മുരുഗദോസ് വിജയ്‌യ്ക്കുവേണ്ടി ചിത്രമൊരുക്കുന്നത്.