16 വര്‍ഷം ഒരുമിച്ച് ജീവിച്ചു, പക്ഷെ...; പ്രകാശ് രാജുമായി വേര്‍പിരിഞ്ഞതിനെക്കുറിച്ച് ലളിത കുമാരി

തമിഴ്‌നാട്ടില്‍ മാത്രമല്ല, മലയാളികള്‍ക്കിടയിലും ഏറെ ആരാധകരുള്ള നടനാണ് പ്രകാശ് രാജ്. ഇന്ദ്രപ്രസ്ഥം, ദ പ്രിന്‍സ്, ഒരു യാത്രാമൊഴി, പാണ്ടിപ്പട, അന്‍വര്‍, കീര്‍ത്തിചക്ര, ഇലക്ട്ര തുടങ്ങി ഒരുപിടി മലയാളം സിനിമകളിലും പ്രകാശ് രാജ് അഭിനയിച്ചിട്ടുണ്ട്. പക്ഷെ മലയാളികളുടെ ഏറ്റവും പ്രിയപ്പെട്ട കഥാപാത്രം പാണ്ടിപ്പടയിലെതായിരിക്കും.

ഡാന്‍സ് കൊറിയോഗ്രാഫര്‍ ആയ പോണി വര്‍മയാണ് പ്രകാശ് രാജിന്റെ ഭാര്യ. ഇരുവര്‍ക്കും ഒരു മകനുമുണ്ട്. എന്നാല്‍ പ്രകാശ് രാജ് നടി ലളിത കുമാരിയുമായുള്ള വിവാഹ ബന്ധം വേര്‍പെടുത്തിയ ശേഷമാണ് പോണിയുമായി അടുക്കുന്നതും വിവാഹം കഴിക്കുന്നതും.

സിനിമാ കുടുംബമാണ് ലളിത കുമാരിയുടേത്. തമിഴ് നടന്‍ സി എല്‍ ആനന്ദന്റെ മകളും നടി ഡിസ്‌കോ ശാന്തിയുടെ സഹോദരിയുമാണ് ലളിത. പ്രകാശ് രാജും ലളിത കുമാരിയും പ്രണയിച്ചാണ് വിവാഹം കഴിച്ചത്. ഏകദേശം മുപ്പതോളം സിനിമകളില്‍ അഭിനയിച്ച ലളിത കുമാരി 1994ല്‍ പ്രകാശ് രാജുമൊത്തുള്ള വിവാഹത്തിന് പിന്നാലെ സിനിമ അഭിനയം ഉപേക്ഷിക്കുകയും ചെയ്തു.

16 വര്‍ഷം ഒരുമിച്ചു ജീവിച്ചെങ്കിലും 2009ല്‍ ഇരുവരും വിവാഹ മോചിതരായി. ഇപ്പോഴിതാ നടന്‍ പ്രകാശ് രാജിന്റെ മുന്‍ ഭാര്യ ലളിത കുമാരി തങ്ങളുടെ വിവാഹത്തെക്കുറിച്ചും വേര്‍പിരിയലിനെക്കുറിച്ചും ഒരു ഒരു യൂട്യൂബ് ചാനലിനോട് പറഞ്ഞ വാക്കുകളാണ് ശ്രദ്ധ നേടുന്നത്.

സിനിമയില്‍ അഭിനയിക്കാന്‍ താത്പര്യമില്ലാതെയാണ് ഈ രംഗത്തേക്ക് കടന്നുവന്നതെന്ന് പറയുകയാണ് ലളിത കുമാരി. ബാലകൃഷ്ണന്‍ സാറിനെ കാണാനാണ് പ്രകാശ് രാജ് ആദ്യമായി വരുന്നത്. അങ്ങനെയാണ് അദ്ദേഹത്തെ കാണുന്നത്. അത് പിന്നെ പ്രണയമായി മാറുകയായിരുന്നുവെന്നും ലളിത കുമാരി പറയുന്നു. മൂന്ന് മാസത്തിന് ശേഷം നിശ്ചയം കഴിഞ്ഞു. അതിന്റെ ഇടയില്‍ ഒരുമിച്ച് ഒരു സിനിമ വന്നു. അതും കഴിഞ്ഞ് ഇരുവരും വിവാഹം കഴിക്കുകയായിരുന്നു.

' 16 വര്‍ഷത്തോളം ഒരുമിച്ച് ജീവിച്ചു. അത് കഴിഞ്ഞ് ഞങ്ങള്‍ക്കിടയില്‍ ഒരു ചെറിയ അഭിപ്രായ വ്യത്യാസമുണ്ടായി. അത് കഴിഞ്ഞ് രണ്ട് പേരും ഒരുമിച്ചിരുന്ന് സംസാരിച്ചു. കുട്ടികളുടെ കാര്യത്തിലായിരുന്നു ഞങ്ങള്‍ക്ക് ആശങ്ക. അവരോടും കൂടി കാര്യങ്ങള്‍ എല്ലാം സംസാരിച്ചു. അങ്ങനെ രണ്ട് പേരും ഒരുമിച്ച് പിരിയാന്‍ തീരുമാനിക്കുകയായിരുന്നു,' ലളിത കുമാരി പറഞ്ഞു.

ഒരുമിച്ചു ജീവിക്കുമ്പോഴത്തെ പോലെ അല്ല, അതില്‍ നിന്ന് വെളിയില്‍ വന്ന് മറ്റേ ആളെ കുറ്റപ്പെടുത്തുന്നത് ന്യായമല്ല. അല്ലെങ്കില്‍ താന്‍ ജീവിക്കുന്ന ജീവിതത്തിന് അര്‍ത്ഥമുണ്ടാവില്ല എന്നാണ് താന്‍ വിശ്വസിക്കുന്നതെന്നും ലളിത കുമാരി അഭിമുഖത്തില്‍ പറയുന്നു.

രണ്ട് രീതിയില്‍ നമുക്ക് പിരിയാം. ഒന്നുകില്‍ അടിയുണ്ടാക്കി, പരസ്പരം കുറ്റം പറഞ്ഞ് പിരിയാം. ഇല്ലെങ്കില്‍ സമാധാനത്തോടെ പരസ്പരം സംസാരിച്ച് പിരിയാം. രണ്ടാമത്തെ വഴി ആരും തെരഞ്ഞെടുക്കുന്നില്ലെന്നത് ഒരു പ്രധാനപ്പെട്ട പ്രശ്‌നമാണെന്നും ലളിത കുമാരി പറയുന്നു.

2010ലാണ് നടന്‍ പ്രകാശ് രാജ് പോണി വര്‍മയെ വിവാഹം കഴിക്കുന്നത്. ഇരുവരുടെതും പ്രണയ വിവാഹമായിരുന്നു. ഇരുവര്‍ക്കും ഇപ്പോള്‍ ആറ് വയസുള്ള ഒരു മകനുണ്ട്.