കാജലിന്റെ മെല്ലപ്പോക്ക് നയം

തുപ്പാക്കിയുടെ വിജയം കാജല്‍ അഗര്‍വാളിന് ചില്ലറ സന്തോഷമൊന്നുമല്ല നല്‍കുന്നത്. ഇതിനൊപ്പം തന്നെ നടിയെ തേടി കോളിവുഡില്‍ നിന്ന് ഒട്ടേറെ ഓഫറുകളും എത്തിയിട്ടുണ്ട്. എന്നാല്‍ സാവധാനം മുന്നോട്ടു നീങ്ങാനാണ് നടിയുടെ തീരുമാനം. സിങ്കത്തിന് ശേഷം ബി ടൗണില്‍ നിന്നും ഏറെ ഓഫറുകള്‍ വന്നെങ്കിലും അക്ഷയ് കുമാര്‍ നായകനായ ചിത്രം മാത്രമാണ് കാജല്‍ ഏറ്റെടുത്തിട്ടുള്ളത്.

ടോളിവുഡിലും കാജലിന് നല്ല സമയമാണ്. എന്നാല്‍ അവിടേയും ഒരു ചിത്രത്തിന് മാത്രമാണ് നടി ഡേറ്റ് നല്‍കിയിട്ടുള്ളത്.

നല്ല പ്രൊജക്ടുകളുടെ ഭാഗമാവാനായി നടി ക്ഷമയോടെ കാത്തിരിക്കുകയാണെന്ന് കാജലിനോട് അടുത്തവൃത്തങ്ങള്‍ പറയുന്നു. ചില പ്രൊജക്ടുകളുടെ ചര്‍ച്ച നടന്നു കഴിഞ്ഞു. ഒരാഴ്ചയ്ക്കുള്ളില്‍ ഒരു ബിഗ് ബജറ്റ് ചിത്രത്തില്‍ നടി ഒപ്പുവയക്കുമെന്നും ഇവര്‍ വെളിപ്പെടുത്തി. നിലവില്‍ മൂന്ന് ചിത്രങ്ങളിലേയ്ക്കാണ് നടി ഡേറ്റ് നല്‍കിയിരിക്കുന്നത്. ഇതിനിടയില്‍ തന്നെ തേടിയെത്തുന്ന നല്ല ഓഫറുകള്‍ മാത്രം സ്വീകരിക്കുക എന്നതാണ് കാജലിന്റെ നയം.