നയന്‍താരയെ തോല്‍പ്പിച്ച് താരപുത്രിയുടെ മാസ് എന്‍ട്രി! കീര്‍ത്തിയുടെ സമ്മാനം കണ്ട് ആരാധകരും ഞെട്ടി..

കീര്‍ത്തിയുടെ വളര്‍ച്ച

കരിയറിന്റെ ആദ്യകാലങ്ങളില്‍ വളരെയധികം വിമര്‍ശനങ്ങള്‍ നേടിയ നടിയായിരുന്നു കീര്‍ത്തി സുരേഷ്. എന്നാല്‍ സ്വന്തം കഴിവ് പുറത്തെടുത്ത് ഉയരങ്ങള്‍ കീഴടക്കിയാണ് കീര്‍ത്തിയുടെ ഇപ്പോഴത്തെ യാത്ര. സൂര്യ, വിജയ്, ശിവകാര്‍ത്തികേയന്‍, വിശാല്‍ തുടങ്ങി തമിഴിലെ പ്രമുഖ താരങ്ങളുടെയെല്ലാം നായികയാണ് കീര്‍ത്തിയിപ്പോള്‍. ഓരോ ദിവസം കഴിയുംതോറും കീര്‍ത്തി അതിശയിപ്പിക്കുകയാണെന്നാണ് ആരാധകര്‍ പറയുന്നത്. അത്തരത്തിലൊരു സംഭവം വീണ്ടും നടന്നിരിക്കുകയാണ്.

150 സ്വര്‍ണ നാണയങ്ങള്‍...

വിശാല്‍ നായകനായി അഭിനയിക്കുന്ന ഏറ്റവും പുതിയ സിനിമയാണ് സണ്ടക്കോഴി രണ്ടാം ഭാഗത്തിന്റെ ചിത്രീകരണം പൂര്‍ത്തിയായിരിക്കുകയാണ്. അവസാന ദിവസം നായകനേക്കാള്‍ തിളങ്ങിയത് സിനിമയിലെ നായികയായ കീര്‍ത്തി സുരേഷായിരുന്നു. കീര്‍ത്തിയ്‌ക്കൊപ്പം ഫോട്ടോ എടുക്കാനായി ആരാധകര്‍ എത്തിയിരുന്നു. നടിയ്ക്ക് വേണ്ടി പ്രത്യേകമായി കേക്ക് മുറിയും സെറ്റില്‍ നടന്നിരുന്നു. അതിനിടെയാണ് സംവിധായകനും നായകനും മറ്റ് താരങ്ങള്‍ക്കും സെറ്റിലുള്ള അണിയറ പ്രവര്‍ത്തകര്‍ക്കുമായി 150 ഓളം സ്വര്‍ണ നാണയം സമ്മാനമായി നടി നല്‍കിയത്. ഒരു ഗ്രാം ഗോള്‍ഡ് കോയിനായിരുന്നു കീര്‍ത്തിയുടെ സമ്മാനം.

വൈറലായ വീഡിയോ

സിനിമയുടെ സെറ്റുകളിൽ കീര്‍ത്തിയുടെ ആത്മാര്‍ത്ഥയും ഡെഡിക്കേഷനും മറ്റുള്ളവരോടുള്ള പെരുമാറ്റവും എല്ലാവരെയും അത്ഭുതപ്പെടുത്തുന്ന തരത്തിലാണ്. അതിനാല്‍ തന്നെ നടിയ്ക്ക് വലിയ പിന്തുണയാണ് ആരാധകരുടെ ഭാഗത്ത് നിന്നും ഉണ്ടാവാറുള്ളത്. കഴിഞ്ഞ ദിവസം സെറ്റില്‍ നടന്ന പരിപാടികളുടെയെല്ലാം വീഡിയോ സോഷ്യല്‍ മീഡിയയിലൂടെ വൈറലായിരുന്നു. അതില്‍ കീര്‍ത്തിയ്ക്ക് കൊടുക്കുന്ന പ്രത്യേക സ്വീകരണവും ഉണ്ടായിരുന്നു.

അനുകരണമാണോ?

മുന്‍കാല നടി സാവിത്രിയും ഇതുപോലെയായിരുന്നു. സിനിമയുടെ ചിത്രീകരണം പൂര്‍ത്തിയായി കഴിഞ്ഞാല്‍ തന്റെ സിനിമയുടെ അണിയറ പ്രവര്‍ത്തകര്‍ക്ക് സ്വര്‍ണം നല്‍കുന്ന പതിവ് സാവിത്രിയ്ക്കുണ്ടായിരുന്നു. തെന്നിന്ത്യന്‍ ലേഡി സൂപ്പര്‍ സ്റ്റാര്‍ നയന്‍താരയും ഇക്കാര്യത്തില്‍ മുന്നിലാണ്. ശീരാമ രാജ്യം എന്ന സിനിമയിലെ സഹതാരങ്ങള്‍ക്കായി നയന്‍താര വാച്ച് ആയിരുന്നു സമ്മാനമായി കൊടുത്തിരുന്നത്. ഇവരുടെയെല്ലാം പാത പിന്തുടര്‍ന്നാണ് കീര്‍ത്തിയും സമ്മാനങ്ങള്‍ നല്‍കുന്നത്.

സാവിത്രിയായ കീര്‍ത്തി

സാവിത്രിയുടെ ജീവിതകഥ പറഞ്ഞ മഹാനടിയില്‍ അതിശയിപ്പിക്കുന്ന പ്രകടനമായിരുന്നു കീര്‍ത്തി നടത്തിയത്. പ്രേക്ഷകര്‍ വിചാരിക്കുന്നതിലും അപ്പുറം രൂപമാറ്റമായിരുന്നു കീര്‍ത്തിയിലുണ്ടായിരുന്നത്. അഭിനയത്തിന്റെ കാര്യത്തിലും മികച്ചത് എന്ന് മാത്രമേ പറയാനുള്ളു. സിനിമയ്ക്കുള്ളില്‍ മാത്രമല്ല, പുറത്തും സാവിത്രിയെ അനുകരിക്കാനുള്ള നടിയുടെ ശ്രമം വിജയിച്ചിരുന്നു. മുന്‍പ് മഹാനടിയുടെ ലൊക്കേഷനിലും കീര്‍ത്തി സ്വര്‍ണ നാണയങ്ങള്‍ വിതരണം ചെയ്തിരുന്നു.