മാരി 2ന്റെ സെറ്റില്‍ എല്ലാരും എന്നെ കളിയാക്കി, ആരും വിട്ടുവീഴ്ച ചെയ്തില്ല എന്ന് സായി പല്ലവി

മലയാളവും തെലുങ്കും പയറ്റി തെളിഞ്ഞ സായി പല്ലവി ഇപ്പോള്‍ തന്റെ ആദ്യ തമിഴ് ചിത്രത്തിന്റെ റലീസിങ് തിരക്കിലാണ്. ധനുഷിനൊപ്പം മാരി 2 യിലൂടെയാണ് സായി പല്ലവിയുടെ തമഴ് അരങ്ങേറ്റം. ചിത്രത്തിന്റെ ഓഡിയോ ലോഞ്ച് കഴിഞ്ഞ ദിവസം നടന്നു.

ഓഡിയോ ലോഞ്ചില്‍ സംസാരിക്കവെ സെറ്റിലെ ചില മനോഹര നിമിഷങ്ങള്‍ സായി പല്ലവി ഓര്‍ത്തെടുത്തു. ഓരോ ഷെഡ്യൂള്‍ കഴിയുമ്പോഴും അടുത്തതിന് വേണ്ടി കാത്തിരിയ്ക്കുകയായിരുന്നു. കുടുംബം പോലെയായിരുന്നു മാരി 2 ന്റെ സെറ്റ് എന്നും സായി പല്ലവി പറഞ്ഞു.

സെറ്റില്‍ എല്ലാവരും എന്നെ കളിയാക്കുമായിരുന്നു. സംവിധായകനോട് ചെന്ന് പരാതി പറഞ്ഞാല്‍ അദ്ദേഹവും കളിയാക്കും. എന്നെ കളിയാക്കുന്ന കാര്യത്തില്‍ ആരും വിട്ടുവീഴ്ച ചെയ്തില്ല-സായി പല്ലവി പറഞ്ഞു.

ധനുഷ് വളരെ അധികം പിന്തുണ നല്‍കി. ഒരുപാട് കാര്യങ്ങള്‍ അദ്ദേഹത്തില്‍ നിന്ന് പഠിച്ചു. തന്റെ ഭാഗം മാത്രം ചെയ്ത് മിണ്ടാതിരിക്കുന്ന ആളല്ല, തനിക്കൊപ്പമുള്ള ആളുടെ ഓരോ രംഗവും പെര്‍ഫക്ട് ആക്കാനും അദ്ദേഹം ശ്രദ്ധിക്കുമെന്ന് സായി പറയുന്നു.