തമിഴില്‍ വീണ്ടും മമ്മൂട്ടിയുടെ വിസ്മയം? ഇന്ത്യന്‍ 2 വില്‍ ദുല്‍ഖറും മമ്മൂട്ടിയും? വമ്പന്‍ പ്രഖ്യാപനം

ഹിറ്റ് സിനിമയായ ഇന്ത്യന്‍

1996 ല്‍ എസ് ശങ്കര്‍ തിരക്കഥ ഒരുക്കി സംവിധാനം ചെയ്ത ഹിറ്റ് സിനിമയായിരുന്നു ഇന്ത്യന്‍. കമല്‍ ഹാസന്‍ ഇരട്ടവേഷത്തിലെത്തിയ സിനിമയില്‍ മനീഷ കൊയ്രാളയായിരുന്നു നായിക. എംഎം രത്നമായിരുന്നു സിനിമ നിര്‍മ്മിച്ചത്. എആര്‍ റഹ്മാനായിരുന്നു സംഗീത സംവിധാനം നിര്‍വ്വഹിച്ചത്. ഒരു മുന്‍ സ്വാതന്ത്ര്യ സമരസേനാനി അഴിമതിക്കെതിരെ നടത്തുന്ന പോരാട്ടമാണ് സിനിമയുടെ ഇതിവൃത്തം. അഴിമതിക്കാരെ ശിക്ഷിച്ച് നീതി നടപ്പാക്കുന്ന അദ്ദേഹത്തിന് തന്റെ മകനെയും ശിക്ഷിക്കേണ്ടി വരുന്നു.

ഇന്ത്യന്‍ 2 വരുന്നു

മര്‍മ്മകല എന്ന പഴയകാല ആയോധന വിദ്യ അഭ്യസിച്ചിട്ടുള്ള കഥാനായകന്‍ അതേ വിദ്യ ഉപയോഗിച്ച് ശത്രുക്കളെ നേരിടുന്നതാണ് സിനിമയിലെ പ്രധാന ആകര്‍ഷണം. അക്കാലത്ത് തമിഴ്നാട്ടിലടക്കം ബ്ലോക്ബസ്റ്റര്‍ മൂവിയായ ഇന്ത്യന് രണ്ടാം ഭാഗം കൂടി വരികയാണെന്ന് നേരത്തെ തന്നെ പ്രഖ്യാപിച്ചിരുന്നു. എസ് ശങ്കര്‍ തന്നെ തിരക്കഥ ഒരുക്കി സംവിധാനം ചെയ്യുന്ന സിനിമയുടെ ചിത്രീകരണം ഈ മാസം തന്നെ ആരംഭിക്കാന്‍ പോവുകയാണ്.

വമ്പന്‍ താരങ്ങളോ?

കമല്‍ ഹാസന്‍ നായകനാവുമ്പോള്‍ കാജല്‍ അഗര്‍വാളാണ് നായിക. ദുല്‍ഖര്‍ സല്‍മാനും ചിമ്പുവും സിനിമയില്‍ ഉണ്ടെന്നായിരുന്നു റിപ്പോര്‍ട്ടുകള്‍. ദുല്‍ഖറിന്റെ കാര്യം ഏറെ കുറെ ഉറപ്പിക്കാമെന്നാണ് കോളിവുഡിലെ സംസാരം. എന്നാല്‍ മലയാളത്തിന്റെ മെഗാസ്റ്റാര്‍ മമ്മൂട്ടിയും ഇന്ത്യന്‍ 2 വില്‍ ഉണ്ടാവാന്‍ സാധ്യതയുള്ളതായി റിപ്പോര്‍ട്ടുകള്‍ വന്ന് കൊണ്ടിരിക്കുകയാണ്. ഔദ്യോഗികമായ അനൗണ്‍സ്‌മെന്റുകള്‍ ഒന്നും ഇനിയും വന്നിട്ടില്ലെങ്കിലും ദുല്‍ഖറോ മമ്മൂട്ടിയോ സിനിമയിലുണ്ടാവുമെന്നാണ് സൂചന.

2.0 പോലെയോ?

തമിഴില്‍ നിന്നും നിര്‍മ്മിച്ച ബ്രഹ്മാണ്ഡ ചിത്രമായിരുന്നു 2.0. രജനികാന്ത് നായകനായി അഭിനയിച്ച സിനിമ നവംബര്‍ 29 നായിരുന്നു തിയറ്ററുകളിലേക്ക് എത്തിയത്. ബോക്‌സോഫീസില്‍ കോടികള്‍ വാരിക്കൂട്ടി സിനിമ ഉയരങ്ങള്‍ കീഴടക്കി കൊണ്ടിരിക്കുകയാണ്. അതുപോലെ തന്നെ ഇന്ത്യന്‍ 2 വിലും വിസ്മയിപ്പിക്കാനുള്ള തയ്യാറെടുപ്പിലാണ് സംവിധായകനെന്നാണ് റിപ്പോര്‍ട്ട്. 2.0 യില്‍ അക്ഷയ് കുമാര്‍ വന്നത് പോലെ പ്രധാന കഥാപാത്രങ്ങളെ അവതരിപ്പിക്കാന്‍ വലിയ താരങ്ങള്‍ ഇന്ത്യന്‍ 2 വില്‍ ഉണ്ടാവുമെന്നുമാണ് സൂചന.

മമ്മൂട്ടി വരുന്നതിങ്ങനെയോ?

ചിത്രത്തില്‍ ഒരു അന്വേഷണ ഉദ്യാഗസ്ഥനായി മമ്മൂട്ടി എത്തിയേക്കുമെന്നാണ് വാര്‍ത്തകള്‍ പ്രചരിക്കുന്നത്. നായകവേഷത്തിലോ അല്ലെങ്കില്‍ മുഖ്യമായ ഏതെങ്കിലും ഒരു വേഷത്തിലോ ഉണ്ടാവും. അത് എന്തായിരിക്കും എന്നറിയാനുള്ള ആകാംഷയിലാണ് ആരാധകര്‍. ഇന്ത്യന്‍ 2 കഴിഞ്ഞാല്‍ താന്‍ സിനിമയില്‍ നിന്നും മാറി നില്‍ക്കുകയാണെന്ന കമല്‍ ഹാസന്റെ വെളിപ്പെടുത്തല്‍ കൂടി വന്നതോടെ ആരാധകര്‍ നിരാശയിലാണ്. കൂടുതല്‍ വിവരങ്ങള്‍ അണിയറ പ്രവര്‍ത്തകര്‍ തന്നെ പുറത്ത് വിടുമെന്നാണ് പ്രതീക്ഷിക്കുന്നത്.