'മാഡം ഇവനെ കാണാൻ പ്രഭുദേവയെ പോലെയില്ലേ'; നയൻതാര-വിഘ്നേശ് പ്രണയം തുടങ്ങിയത് അതിന് ശേഷമെന്ന് നടൻ

കഴിഞ്ഞ ജൂൺ മാസത്തിലായിരുന്നു നയൻതാരയും വിഘ്നേശ് ശിവനും തമ്മിലുള്ള വിവാഹം. മഹാബലിപുരത്ത് ആഘോഷ പൂർവം നടന്ന വിവാഹത്തിൽ തമിഴ്നാട് മുഖ്യമന്ത്രി എംകെ സ്റ്റാലിൻ, സൂപ്പർ സ്റ്റാർ രജനീകാന്ത്, ഷാരൂഖ് ഖാൻ തുടങ്ങിയ പ്രമുഖരെല്ലാം പങ്കെടുത്തിരുന്നു. നയൻതാര അഭിനയിച്ച നാനും റൗഡി താൻ, കാതുവാക്കുല രണ്ട് കാതൽ എന്നീ സിനിമകളുടെ സംവിധായകനാണ് വിഘ്നേശ് ശിവൻ. 2017 ൽ പുറത്തിറങ്ങിയ നാനും റൗഡി താൻ എന്ന സിനിമയുടെ സെറ്റിൽ വെച്ചാണ് നയൻതാരയും വിഘ്നേശും പ്രണയത്തിലാവുന്നത്.

ഇപ്പോൾ ഇരുവരും പ്രണയത്തിലായതിനെ പറ്റി സംസാരിക്കുകയാണ് നാനും റൗഡി താനിൽ അഭിനയിച്ച നടൻ രാഹുൽ താത്ത. വിഘ്നേശും നയൻസും തമ്മിൽ പ്രണയത്തിലാവാൻ പ്രധാന കാരണം താനാണെന്ന് ഇദ്ദേഹം പറയുന്നു. സെറ്റിൽ വിഘ്നേശിനെ വിക്കി എന്നാണ് നയൻതാര വിളിച്ചിരുന്നത്. നിന്നെ കാണാൻ പ്രഭുദേവയെ പോലെയുണ്ടല്ലോ എന്ന് വിഘനേശിനോട് ഞാൻ ഒരിക്കൽ പറഞ്ഞു'

'ഞാൻ നയൻതാരയോട് നേരിട്ട് ഇക്കാര്യം പറയുകയും ചെയ്തു. എന്താ മാഡം വിക്കിയെ കാണുമ്പോൾ പ്രഭുദേവയെ തോന്നുന്നുണ്ടല്ലോ എന്ന്,' രാഹുൽ താത്ത ചിരിച്ചു കൊണ്ട് പറഞ്ഞു. അതിന് ശേഷമാണ് ഇരുവരും തമ്മിൽ പ്രണയത്തിലായതെന്ന് ഇദ്ദേഹം തമാശ രൂപേണ പറഞ്ഞു.

നയൻതാരയുടെ മുൻ കാമുകനായിരുന്നു പ്രഭുദേവ. 2009 ൽ വില്ല് എന്ന സിനിമയുടെ സെറ്റിൽ വെച്ചാണ് നയൻസും പ്രഭുദേവയും പ്രണയത്തിലാവുന്നത്. എന്നാൽ മൂന്നര വർഷത്തിനുള്ളിൽ ഇരുവരും വേർപിരിഞ്ഞു. നയൻസുമായി പ്രണയത്തിലാവുന്ന സമയത്ത് പ്രഭുദേവ വിവാഹിതനും രണ്ട് കുട്ടികളുടെ അച്ഛനുമായിരുന്നു. ഇത് വലിയ കോളിളക്കം അന്നുണ്ടാക്കി.

Recommended Video

Dhyan Sreenivasan On Nayanthara Wedding | നയൻതാരയുടെ കല്യാണത്തെ കുറിച്ച് ധ്യാൻ ശ്രീനിവാസൻ

നയൻതാരയ്ക്കെതിരെ പ്രഭുദേവയുടെ ഭാര്യ റംലത്ത് പരസ്യമായി രം​ഗത്ത് വരികയും ചെയ്തിരുന്നു. ഇതിനിടെ റംലത്തുമായുള്ള വിവാഹ ബന്ധം പ്രഭുദേവ ഒഴിവാക്കുകയും ചെയ്തിരുന്നു. എന്നാൽ പിന്നീട് ഒരു വർഷത്തിനുള്ളിൽ നയൻസും പ്രഭുദേവയും വേർപിരിഞ്ഞു. പാടെ തകർന്ന നയൻതാര ലൈം ലൈറ്റിൽ നിന്നും കുറച്ചു കാലത്തേക്ക് മാറി നിൽക്കുകയും ചെയ്തു. ഒടുവിൽ 2013 ൽ അറ്റ്ലി സംവിധാനം ചെയ്ത രാജാ റാണി എന്ന ചിത്രത്തിലൂടെ വൻ തിരിച്ചു വരവ് നയൻതാര നടത്തുകയും ചെയ്തു.