തരം​ഗം തീർത്ത പഴയ ന​ഗ്മയാണോ ഇത്? എന്ത് പറ്റി?; താരത്തെക്കണ്ട് ആരാധകരുടെ ചോദ്യങ്ങൾ

തെന്നിന്ത്യൻ‍‌ സിനിമാ രം​ഗത്തെ താര റാണിയായിരുന്നു ഒരു കാലത്ത് ന​ഗ്മ. മുംബൈക്കാരിയായ ന​ഗ്മയ്ക്ക് ബോളിവുഡിലേക്കാൾ അവസരങ്ങൾ ലഭിച്ചത് തമിഴ്, തെലുങ്ക് സിനിമകളിലാണ്. ​അതീവ ​ഗ്ലാമറസായി പ്രേക്ഷകർക്ക് മുമ്പിലെത്തിയ ന​ഗ്മയ്ക്ക് കൈ നിറയെ അവസരങ്ങൾ ലഭിച്ചു. രജിനികാന്ത് ഉൾപ്പെടെയുള്ള സൂപ്പർതാരങ്ങളുടെ നായികയായി ന​ഗ്മ തിളങ്ങി. കരിയറിലെ പ്രശസ്തിക്കൊപ്പം ​ഗോസിപ്പുകളും ന​ഗ്മയെ വിടാതെ പിന്തുടർന്നു.

നടിയുടെ പ്രണയ ബന്ധങ്ങൾ വലിയ തോതിൽ ചർച്ചയായി. നടൻ ശരത് കുമാറിനെയും ന​ഗ്മയെയും കുറിച്ചുള്ള കഥകൾ ഒരു കാലത്ത് സിനിമാ ലോകത്ത് വ്യാപകമായി പ്രചരിച്ചിരുന്നു. സൗരവ് ​ഗാം​ഗുലിമായുള്ള ബന്ധവും വലിയ തോതിൽ ചർച്ചയായി. കരിയറിന്റെ ഒരു ഘട്ടത്തിൽ ന​ഗ്മയുടെ താരത്തിളക്കം കുറഞ്ഞു. അക്കാലത്തെ മിക്ക നടിമാരെയും പോലെ പുതിയ നായികമാർ വന്നപ്പോൾ ന​ഗ്മയ്ക്ക് വഴി മാറിക്കൊടുക്കേണ്ടി വന്നു.

രാഷ്ട്രീയത്തിലേക്ക് നടി ശ്രദ്ധ തിരിച്ചു. ഇന്ന് ലൈം ലൈറ്റിൽ ന​ഗ്മയെ അധികം കാണാറില്ല. ന​ഗ്മയുടെ പുതിയ ഫോട്ടോകളാണ് സോഷ്യൽ മീഡിയയിൽ ഇപ്പോൾ വൈറലാകുന്നത്. പഴയ ന​ഗ്മയിൽ നിന്നും നടി വല്ലാതെ മാറിപ്പോയെന്ന് ആരാധകർ പറയുന്നു. വണ്ണം വെച്ചപ്പോൾ നടിയുടെ സൗന്ദര്യം കുറഞ്ഞെന്നും അഭിപ്രായമുണ്ട്. പഴയ ന​ഗ്മ തന്നെയാണോ ഇതെന്നാണ് മിക്കവരുടെയും ചോദ്യം. മാധ്യമങ്ങൾക്ക് മുന്നിൽ ന​ഗ്മ സംസാരിച്ചിട്ടും നാളുകൾ ഏറെയായി.

ഭോജ്പുരി സിനിമകളിൽ വരെ നിറ സാന്നിധ്യമായിരുന്നു ഒരു കാലത്ത് ന​ഗ്മ. രാഷ്ട്രീയത്തിലേക്ക് വന്ന ശേഷവും ന​ഗ്മ ​ഗോസിപ്പ് കോളങ്ങളിൽ ചർച്ചയായി. മുമ്പൊരിക്കൽ തന്നെപ്പറ്റിയുള്ള വിവാ​​ദങ്ങളെക്കുറിച്ച് ന​ഗ്മ സംസാരിച്ചിട്ടുണ്ട്. വിവാദങ്ങളെ കൈകാര്യം ചെയ്യാൻ ധൈര്യം വേണം. നെ​ഗറ്റീവോ പോസീറ്റീവോ ആയ കാരണങ്ങളാൽ താനെപ്പോഴും വാർത്തകളിൽ ഇടം പിടിക്കാറുണ്ടെന്നും ന​ഗ്മ അന്ന് ചൂണ്ടിക്കാട്ടി. 49 കാരിയായ ന​ഗ്മ ഇപ്പോഴും അവിവാഹിതയാണ്.

പ്രണയ ​ഗോസിപ്പുകളോടൊന്നും ന​ഗ്മ അധികം പ്രതികരിച്ചിട്ടില്ല. ശരത്കുമാറും ആദ്യ ഭാര്യ ഛായ ദേവിയും തമ്മിലുള്ള വിവാഹബന്ധം തകരാൻ കാരണം ന​ഗ്മയാണെന്ന് ഒരു കാലത്ത് സംസാരമുണ്ടായിരുന്നു. ​ഗോസിപ്പുകൾ പരിധി വിട്ടതോടെ ശരത്കുമാറുമായുള്ള ബന്ധം അവസാനിപ്പിക്കാൻ നഗ്മ തീരുമാനിച്ചെന്നും ഇത് സംബന്ധിച്ചുണ്ടായ പ്രശ്നങ്ങൾ കാരണമാണ് നടി തെന്നിന്ത്യൻ സിനിമാ രം​ഗത്ത് നിന്നും അകന്നതെന്നും അക്കാലത്ത് ​ഗോസിപ്പുണ്ടായിരുന്നു.

പിന്നീടും ന​ഗ്മയെക്കുറിച്ച് പല തരത്തിലുള്ള സംസാരങ്ങളുണ്ടായി. നടിക്ക് അധോലോക ബന്ധമുണ്ടെന്ന് അഭ്യൂഹങ്ങൾ പരന്നിട്ടുണ്ട്. നടി രാഷ്ട്രീയത്തിലേക്ക് ശ്രദ്ധ കൊടുത്തപ്പോഴാണ് ഇത്തരമാെരു ​ഗോസിപ്പ് വന്നത്. എന്നാൽ ഇക്കാര്യം ന​ഗ്മ നിഷേധിച്ചിട്ടുണ്ട്. നടി ജ്യോതികയുടെ അർധ സഹോദരിയാണ് നഗ്മ. ജ്യോതിക തമിഴകത്ത് കരിയർ തുടങ്ങുന്ന കാലത്ത് അറിയപ്പെട്ടത് ന​ഗ്മയുടെ സഹോദരിയായാണ്. പിന്നീട് ജ്യോതിക താരമായി മാറിയപ്പോഴേക്കും ന​ഗ്മ സിനിമാ ലോകത്ത് നിന്നും അകന്നു.

മുംബെെയിലാണ് ജ്യോതികയും ന​ഗ്മയും ഇന്ന് താമസിക്കുന്നത്. ചെന്നെെയിൽ ഭർത്താവ് സൂര്യക്കൊപ്പം താമസിച്ചിരുന്നു ജ്യോതിക അടുത്തിടെയാണ് മുംബൈയിലേക്ക് മാറിയത്. സൂര്യയും നടിക്കൊപ്പം മുംബൈയിലാണുള്ളത്. മാതാപിതാക്കൾക്ക് പ്രായമായതിനാൽ അവർക്കൊപ്പം നിൽക്കാൻ വേണ്ടിയാണ് മുംബൈയിലേക്ക് മാറിയതെന്ന് ജ്യോതിക വ്യക്തമാക്കിയിട്ടുണ്ട്. താൽക്കാലികമായാണ് മാറ്റമെന്നും പിന്നീട് തിരിച്ചെത്തുമെന്നും നടി പറഞ്ഞു.