അയൽക്കാരായുള്ളത് പ്രമുഖർ; വിശേഷങ്ങൾക്ക് തിരുവല്ലയിലേക്ക് ഓടിയെത്തുന്ന നയൻ; വീട്ട് വിശേഷങ്ങൾ

തെന്നിന്ത്യയിലെ ഏറ്റവും വിലപിടിപ്പുള്ള നായിക നടിയാണ് ഇന്ന് നയൻതാര. പ്രതിഫലത്തിൽ മറ്റ് നായികമാരേക്കാൾ മുന്നിൽ നിൽക്കുന്ന നയൻസ് പുതിയ ചിത്രം ജവാനിൽ അഭിനയിക്കാൻ വാങ്ങിയ പ്രതിഫലം 10 കോടി രൂപയാണ്. അവ​ഗണിക്കാൻ പറ്റാത്ത താരമൂല്യമായതിനാൽ ഉയർന്ന പ്രതിഫലം നൽകാൻ നിർമാതാക്കളും തയ്യാറാണ്. സിനിമയ്ക്ക് പുറമെ ഇന്ന് ബിസിനസ് രം​ഗത്തും നടി പ്രബല സാന്നിധ്യമായിക്കൊണ്ടിരിക്കുന്നു.

കഴിഞ്ഞ ദിവസമാണ് നയൻതാരയുടെ സ്കിൻ കെയർ ബ്രാൻഡ് 9 സ്കിന്നിന്റെ ലോഞ്ചിം​ഗ് ന‌ടന്നത്. ഇതിന് പുറമെ വിവിധ ബ്രാൻഡുകളിൽ നടിക്ക് നിക്ഷേപമുണ്ട്. റിയൽ എസ്റ്റേറ്റ് രം​ഗത്തും താരം സജീവമാണ്. കരിയറിൽ നിന്നുള്ള സമ്പാദ്യം ഉപയോ​ഗിച്ച് നയൻതാര കെട്ടിപ്പൊക്കിയ ബം​ഗ്ലാവ് ആരെയും അത്ഭുതപ്പെടുത്തും.

രാജകീയ ജീവിതമാണ് നയൻതാര ഇന്ന് നയിക്കുന്നത്. ചെന്നെെയിലെ പോയസ് ​ഗാർഡനിലുള്ള നയൻതാരയുടെ വീ‌‌ടിന്റെ വിശേഷങ്ങളാണ് ഇപ്പോൾ ജനശ്രദ്ധ നേടുന്നത്. 16,500 സ്ക്വയർ ഫീറ്റിലാണ് നയൻതാരയുടെ വീ‌ടുള്ളത്. സ്വിമ്മിം​ഗ് പൂൾ, ഹോം തിയറ്റർ, ജിം എന്നീ സൗകര്യങ്ങൾ വീട്ടിലുണ്ട്.

കുഞ്ഞുങ്ങൾക്കായി പ്രത്യേക മുറി ഒരുക്കിയിട്ടുണ്ട്. അടുത്തടുത്തായാണ് കുട്ടികൾക്ക് ബെഡ് ഒരുക്കിയത്. സീലിം​ഗിൽ ഇം​ഗ്ലീഷ് അക്ഷരങ്ങൾ എഴുതിയിട്ടുണ്ട്. ലിവിം​ഗ് റൂമും മനോഹരമായാണ് ഒരുക്കിയിരിക്കുന്നത്.
ഇന്റീരിയർ ഡിസൈനിം​ഗിൽ നയൻതാരയ്ക്ക് പ്രത്യേക താൽപര്യമുണ്ട്.

അതിനാൽ വീട് മനോഹരമായാണ് സജ്ജീകരിച്ചിരിക്കുന്നത്. നാല് ബെ‍ഡ് റൂമുകളാണ് വീട്ടിലുള്ളത്. രജിനികാന്ത്, ധനുഷ് എന്നിവരു‌ടെ വീടും നയൻതാരയുടെ വീടിനടുത്താണ്. മുൻ തമിഴ്നാട് മുഖ്യമന്ത്രി ജയലളിതയുടെ വീടും ഇതിന് സമീപത്തുണ്ട്.

ഹൈദരാബാദിൽ ഒരു ബം​ഗ്ലാവ് താരത്തിനുണ്ട്. ടോളിവുഡിലെ പ്രമുഖർ താമസിക്കുന്ന ജൂബിലി ഹിൽസിലാണ് ഈ വീടുള്ളത്. അതേസമയം വിശേഷ ദിവസങ്ങളിൽ കേരളത്തിൽ മാതാപിതാക്കൾ താമസിക്കുന്ന തിരുവല്ലയിലെ വീട്ടിലെത്താനാണ് നയൻതാര താൽപര്യപ്പെടുന്നത്. പ്രെെവറ്റ് ജെറ്റിലാണ് പലപ്പോഴും നടി നാട്ടിലെത്താറ്.

സിനിമാ രം​ഗത്ത് പഴയ കാലത്ത് പല നടിമാരും നയൻതാരയെ പോലെ താരറാണിയായി വന്നതാണ്. ഇവരിൽ പലർക്കും ഒരുഘ‌ട്ടത്തിൽ ജീവിതം കൈ വിട്ട് പോകുന്ന സാഹചര്യം ഉണ്ടായിട്ടുണ്ട്. നടി സാവിത്രിയുടെ ജീവിതമാണ് ഇതിന് ഉദാഹരണമായി പലപ്പോഴും ചൂണ്ടിക്കാട്ടാറുള്ളത്. അത്യാഡംബരം നിറഞ്ഞ ബം​ഗ്ലാവിൽ താമസിച്ച സാവിത്രിക്ക് ഒടുക്കം ഇതെല്ലാം നഷ്ടപ്പെട്ടു. എന്നാൽ നയൻതാരയുൾപ്പെടെയുള്ള ഇന്നത്തെ നടിമാർ ഇക്കാര്യത്തിൽ ശ്രദ്ധാലുക്കളാണ്.

സിനിമയിലൂടെ ലഭിക്കുന്ന കോടികളുടെ വരുമാനം നഷ്ടപ്പെ‌ടാതിരിക്കാൻ ഇവർ ശ്രദ്ധിക്കുന്നു. സിനിമയ്ക്കപ്പുറം നിക്ഷേപങ്ങളും ബിസിനസ് സംരഭങ്ങളുമൊക്കെയായി വരുമാനശ്രോതസുകൾ വർധിപ്പിക്കാൻ ഇവർ ശ്രമിക്കുന്നുണ്ട്. കാജൽ അ​ഗർവാൾ, തമന്ന, സമാന്ത ഉൾപ്പെ‌ടെ മിക്ക ന‌ടിമാർക്കും സ്വന്തമായി ബിസിനസുകളുണ്ട്.

ജവാൻ, ഇരവൈൻ എന്നിവയാണ് നയൻതാരയുടേതായി ഒടുവിൽ റിലീസ് ചെയ്ത സിനിമകൾ. നയൻതാരയുടെ പുതിയ സിനിമകൾക്കായി കാത്തിരിക്കുകയാണ് ആരാധകർ. മലയാളത്തിൽ ​ഗോൾഡ് ആണ് നടി അവസാനമായി അഭിനയിച്ച സിനിമ. പൃഥിരാജിനെ നായകനാക്കി അൽഫോൻസ് പുത്രൻ സംവിധാനം ചെയ്ത സിനിമ പക്ഷെ പരാജയപ്പെട്ടു.

ജവാന് ശേഷം നയൻതാരയ്ക്ക് ബോളിവുഡിൽ നിന്നും തുടരെ അവസരങ്ങൾ വരുന്നുണ്ട്. എന്നാൽ പുതിയ ബോളിവുഡ് ചിത്രങ്ങളൊന്നും ഇതുവരെ പ്രഖ്യാപിച്ചിട്ടില്ല. നിലവിൽ 9 സ്കിൻ ബ്രാൻഡ് വിപണിയിലെത്തിച്ചതുമായി ബന്ധപ്പെട്ട തിരക്കിലാണ് നടി. നയൻതാരയുടെ പുതിയ സിനിമകൾക്കായി കാത്തിരിക്കുകയാണ് ആരാധകർ.