വിജയുടെ സര്‍ക്കാര്‍ ഓപ്പണിംഗ് തകര്‍ക്കാന്‍ ആവാതെ രജനിയുടെ ദര്‍ബാര്‍

ആക്ഷനും മാസും കോമഡിയും സെന്റിമെന്റ്സുമെല്ലാം തന്നെ കൃത്യമായി ഉള്‍പ്പെടുത്തികൊണ്ടാണ് ദര്‍ബാര്‍ അണിയിച്ചൊരുക്കിയിരിക്കുന്നത്. ഗംഭീര ആദ്യ പകുതിയും മോശമല്ലാത്ത രണ്ടാം പകുതിയുമാണ് ചിത്രത്തിലുളളത്. ദര്‍ബാറില്‍ പോലീസ് ഓഫീസറായി രജനി തകര്‍ത്താടുന്നുണ്ട്. 69ാമത്തെ വയസിലും പഴയ പ്രസരിപ്പോടെ മികച്ച പ്രകടനമാണ് തലൈവര്‍ കാഴ്ചവെക്കുന്നത്.

സ്‌റ്റൈല്‍ മന്നന്റെ ചില രോമാഞ്ചമുണ്ടാക്കുന്ന സീനുകളും ദര്‍ബാറിലുണ്ട്. ഒരു കംപ്ലീറ്റ് രജനീകാന്ത് ഷോ തന്നെയാണ് ദര്‍ബാര്‍. പോലീസ് കമ്മീഷണറായുളള നടന്റെ പ്രകടനത്തെ എല്ലാവരും പ്രശംസിക്കുന്നുണ്ട്. രജനീ കാന്തിനൊപ്പം മകളായി എത്തിയ നിവേദ തോമസിനും മികച്ച പ്രേക്ഷക പ്രശംസകളാണ് ലഭിക്കുന്നത്. നായികയാണെങ്കിലും വളരെ കുറച്ച് സീനുകളില്‍ മാത്രമാണ് നയന്‍താര എത്തുന്നത്.

മികച്ച പ്രതികരണമാണ് ലഭിക്കുന്നതെങ്കിലും കളക്ഷന്റെ കാര്യത്തില്‍ വിജയുടെ സര്‍ക്കാറിന് പിന്നിലായാണ് ദര്‍ബാര്‍ എത്തിയിരിക്കുന്നത്. ചെന്നൈ മള്‍ട്ടിപ്ലക്‌സ് കളക്ഷന്റെ കാര്യത്തിലാണ് സര്‍ക്കാരിന് പിന്നില്‍ ദര്‍ബാര്‍ എത്തിയത്. ആദ്യ ദിന കളക്ഷനില്‍ 2.37 കോടിയാണ് സര്‍ക്കാരിന് ലഭിച്ചതെങ്കില്‍ 2.27 കോടി മാത്രമാണ് ദര്‍ബാരിന് നേടാനായത്. രജനിയുടെ തന്നെ 2.0 ആണ് ചെന്നൈ മള്‍ട്ടിപ്ലക്‌സുകളില്‍ ആദ്യ ദിന കളക്ഷനില്‍ മുന്നിലുളളത്.

ചെന്നൈയിലെ അഭിരാമി മെഗാമാള്‍ അടച്ചിട്ടതാണ് ദര്‍ബാറിന്റെ കളക്ഷന്‍ കുറയാന്‍ പ്രധാന കാരണമായത്. ദര്‍ബാറിന് മുന്‍പ് പുറത്തിറങ്ങിയ സിനിമകളെല്ലാം ഈ മാളില്‍ നിന്നും മികച്ച കളക്ഷനാണ് നേടിയത്. അതേസമയം തമിഴ്‌നാട് ബോക്‌സോഫീസില്‍ നിന്നുമാത്രമായി 15 കോടിക്കടുത്ത് കളക്ഷന്‍ ദര്‍ബാര്‍ ആദ്യദിനം നേടിയതായും റിപ്പോര്‍ട്ടുകളുണ്ട്.

തെലുങ്കില്‍ നിന്നും 4.5 കോടിയും കേരളത്തില്‍ നിന്നും 2 കോടിയും കര്‍ണാടകയില്‍ നിന്നും 2.5 കോടിക്കടുത്തും കളക്ഷന്‍ നേടിയതായി റിപ്പോര്‍ട്ടുകള്‍ സൂചിപ്പിക്കുന്നു. ഓള്‍ ഇന്ത്യ ബോക്‌സോഫീസില്‍ നിന്നായി ചിത്രം 20 കോടിക്കടുത്ത് ആദ്യ ദിനം നേടിയതായും അറിയുന്നു. ഓവര്‍സീസില്‍ നിന്നായി 10 മുതല്‍ 15 കോടി വരെയാണ് ചിത്രത്തിന് കളക്ഷന്‍. അങ്ങനെയാണെങ്കില്‍ ലോകമെമ്പാടുനിന്നും ചിത്രത്തിന് 30 മുതല്‍ 35 കോടി വരെയായിരിക്കും ആദ്യ ദിന കളക്ഷന്‍.