വിജയുടെ സര്‍ക്കാര്‍ കുതിക്കുന്നു! ഓള്‍ ഇന്ത്യ ഓപ്പണിങ് റെക്കൊര്‍ഡും ഇനി സ്വന്തം!

സര്‍ക്കാര്‍ മുന്നേറുന്നു

തുപ്പാക്കി,കത്തി എന്നീ വിജയചിത്രങ്ങള്‍ക്കു ശേഷം വിജയ്-ഏആര്‍ മുരുകദോസ് കൂട്ടുകെട്ട് വീണ്ടുമൊന്നിച്ച മൂന്നാമത്തെ ചിത്രമായിരുന്നു സര്‍ക്കാര്‍. ഇത്തവണയും വ്യത്യസ്ത പ്രമേയം പറഞ്ഞുകൊണ്ടുളള ഒരു ചിത്രവുമായിട്ടാണ് ഈ കൂട്ടുകെട്ട് എത്തിയിരിക്കുന്നത്. ലോകമെമ്പാടുമായി 3000 ഓളം സ്‌ക്രീനുകളിലായിരുന്നു ചിത്രം പ്രദര്‍ശനത്തിനെത്തിയിരുന്നത്. കേരളത്തിലും 400ലധികം തിയ്യേറ്ററുകളിലായിട്ടായിരുന്നു സര്‍ക്കാറിന്റെ വരവ്. റിലീസ് ചെയ്ത കേന്ദ്രങ്ങളില്‍ എല്ലാം തന്നെ ഹൗസ്ഫുള്‍ ഷോകളായിരുന്നു ചിത്രത്തിന് ആദ്യ ദിനം ലഭിച്ചിരുന്നത്.

ഓള്‍ ഇന്ത്യ റെക്കോര്‍ഡ്

ഈ വര്‍ഷം റിലീസ് ദിനത്തില്‍ എറ്റവും കൂടുതല്‍ കളക്ഷന്‍ നേടിയ ഇന്ത്യന്‍ ചിത്രമായിട്ടാണ് സര്‍ക്കാര്‍ മാറിയിരിക്കുന്നത്. ആദ്യ ദിനം രാജ്യത്താകമാനം നിന്നായി 35 കോടിക്കു മുകളില്‍ കളക്ഷന്‍ സര്‍ക്കാര്‍ നേടിയെന്നാണ് റിപ്പോര്‍ട്ടുകള്‍ വന്നിരിക്കുന്നത്. പ്രമുഖ ബോളിവുഡ് ട്രേഡ് അനലിസ്റ്റായ സുമിത് കാദെല്‍ ആയിരുന്നു ഇക്കാര്യം ട്വീറ്റ് ചെയ്തിരുന്നത്. രണ്‍വീര്‍ കപൂര് ചിത്രത്തിന്റെ റെക്കാര്‍ഡാണ് ദളപതിയുടെ സര്‍ക്കാര്‍ മറികടന്നതെന്നാണ് റിപ്പോരട്ടുകള്‍ വന്നിരിക്കുന്നത്.

സഞ്ജുവിനെ മറികടന്നു

രാജ് കുമാര്‍ ഹിരാനി സംവിധാനം ചെയ്ത സഞ്ജുവിന്റെ റെക്കോര്‍ഡാണ് സര്‍ക്കാര്‍ മറികടന്നിരിക്കുന്നത്. 37-40 കോടിക്കടുത്ത് സര്‍ക്കാര്‍ ആദ്യദിനം കളക്ഷന്‍ നേടിയതായി ദക്ഷിണേന്ത്യയിലെ പ്രമുഖ ട്രേഡ് അനലിസ്‌റിറുകള്‍ ട്വീറ്റ് ചെയ്തിരുന്നു. തമിഴകത്ത് നിന്നു മാത്രമായി ചിത്രം 30 കോടിക്കടുത്ത് കളക്ഷന്‍ നേടിയിരുന്നു. കേരളത്തില്‍ 6.5 കോടിക്കടുത്തായിരുന്നു ചിത്രം റിലീസ് ദിനം വാരിക്കൂട്ടിയിരുന്നത്.

50 കോടി ക്ലബില്‍

കളക്ഷന്റെ കാര്യത്തില്‍ ബോക്‌സ് ഓഫീസില്‍ സ്ഥിരത നിലനിര്‍ത്തിയാണ് വിജയ് ചിത്രത്തിന്റെ കുതിപ്പ്. രണ്ടു ദിവസം കൊണ്ട് ചിത്രം 50 കോടി കളക്ഷനില്‍ എത്തിയതായാണ് അറിയുന്നത് എറ്റവും വേഗത്തില്‍ അമ്പത് കോടി കളക്ഷന്‍ സ്വന്തമാക്കുന്ന തമിഴ് ചിത്രമായും സര്‍ക്കാര്‍ മാറിയിട്ടുണ്ട്. വിദേശരാജ്യങ്ങളില്‍ നിന്നും ചിത്രത്തിന് മികച്ച സ്വീകരണം ലഭിച്ചതായാണ് അറിയുന്നത്. യുഎഇ,യുഎസ് എ, ഓസ്‌ട്രേലിയ, യുകെ തുടങ്ങിയ രാജ്യങ്ങളില്‍ നിന്ന് ചിത്രം ആദ്യ ദിനം മികച്ച കളക്ഷന്‍ സ്വന്തമാക്കിയിരുന്നു.

കേരളത്തില്‍ ബാഹുബലിയെ പിന്നിലാക്കി

കേരളത്തില്‍ ബാഹുബലിയെ പിന്നിലാക്കികൊണ്ടായിരുന്നു ചിത്രം ആദ്യ ദിനത്തില്‍ റെക്കൊര്‍ഡിട്ടിരുന്നത്. ബാഹുബലി 5.4 കോടിക്കടുത്തായിരുന്നു കേരളത്തില്‍ നിന്നു മാത്രമായി ആദ്യ ദിനം സ്വന്തമാക്കിയിരുന്നത്. ഈ റെക്കോര്‍ഡ് 6.5 കോടിക്കടുത്ത് നേടിയാണ് സര്‍ക്കാര്‍ മറികടന്നിരിക്കുന്നത്. മലയാള ചിത്രങ്ങളില്‍ മാസ്റ്റര്‍ പീസും കായംകുളം കൊച്ചുണ്ണിയും ആണ് ആദ്യ ദിന കളക്ഷനില്‍ മുന്നില്‍ നില്‍ക്കുന്നത്. സണ്‍ പിക്‌ചേഴ്‌സിന്റെ ബാനറില്‍ കലാനിധി മാരനായിരുന്നു വിജയുടെ സര്‍ക്കാര്‍ നിര്‍മ്മിച്ചിരുന്നത്. കീര്‍ത്തി സുരേഷ് നായികയാവുന്ന ചിത്രത്തില്‍ വരലക്ഷ്മി ശരത്കുമാറും പ്രധാന വേഷത്തിലെത്തുന്നു.