താരപുത്രി ശ്രുതി ഹാസന്‍ വീണ്ടും പ്രണയത്തിലാണോ? ബോയ് ഫ്രണ്ടിനെ കുറിച്ച് പറഞ്ഞ് നടി

അമേരിക്കന്‍ നാടക നടനായ മൈക്കില്‍ കോര്‍സലേയുമായി ശ്രുതി ഹസന്‍ ഏറെ നാളുകളായി പ്രണയത്തിലായിരുന്നു. ഇരുവരും ഒന്നിച്ച് എയര്‍പോര്‍ട്ടിലും പൊതുപരിപാടികളിലുമൊക്കെ എത്തിയതോടെയാണ് ആദ്യം പ്രണയ വാര്‍ത്ത പുറംലോകം അറിയുന്നത്. ഗോസിപ്പുകള്‍ക്കിടയില്‍ മൈക്കിളിനൊപ്പമുള്ള ചിത്രം പുറത്ത് വിട്ട് തന്റെ പ്രണയത്തെ കുറിച്ച് നടിയും വെളിപ്പെടുത്തി. മൈക്കിളിനൊപ്പമാണ് താമസമെന്ന് സൂചിപ്പിച്ച് കൊണ്ടുള്ള ചിത്രങ്ങളും താരപുത്രി പങ്കുവെച്ചു.

ഒരിക്കല്‍ കമല്‍ഹാസനൊപ്പം ശ്രുതിയും മൈക്കിളും ഒരു പൊതുപരിപാടിയില്‍ പങ്കെടുക്കുകയും ചെയ്തിരുന്നു. ഇതോടെ അച്ഛനടക്കം കുടുംബത്തിന്റെ പിന്തുണ ശ്രുതിയ്ക്ക് ഉണ്ടെന്ന കാര്യം കൂടി പുറംലോകം അറിഞ്ഞു. കാര്യങ്ങള്‍ ഇങ്ങനെയാക്കെ പ്രചരിക്കുന്നതിനിടെയാണ് ഉരുവരും പിരിഞ്ഞെന്ന റിപ്പോര്‍ട്ട് വരുന്നത്. ശ്രുതിയുമായി വേര്‍പിരിഞ്ഞെന്ന കാര്യം മൈക്കില്‍ കോര്‍സലോയാണ് ആദ്യം വെളിപ്പെടുത്തിയത്. പ്രണയം അവസാനിപ്പിച്ചെങ്കിലും ശ്രുതി എപ്പോഴും തന്റെ അടുത്ത സുഹൃത്തായിരിക്കുമെന്നും മൈക്കിള്‍ പറഞ്ഞിരുന്നു.

മൈക്കിളിന് ശേഷം തെന്നിന്ത്യന്‍ താരം സിദ്ധാര്‍ഥുമായി ശ്രുതി പ്രണയത്തിലാണെന്ന് ചില റിപ്പോര്‍ട്ടുകള്‍ വന്നു. എന്നാല്‍ അതിനുള്ള ഉത്തരമാണ് കഴിഞ്ഞ ദിവസം നടി നല്‍കിയിരിക്കുന്നത്. ഒരു ചാറ്റിനിടെ ആരെങ്കിലുമായി പ്രണയത്തിലാണോ എന്ന് ഒരു ആരാധകന്‍ ചോദിച്ചിരുന്നു. 'ഞാന്‍ സിംഗിളാണ്. ഉടനെ ഒരു പ്രണയം നോക്കുന്നില്ലെന്നും നടി പറയുന്നു. തന്റെ പേരില്‍ പ്രചരിക്കുന്ന എല്ലാ വാര്‍ത്തകള്‍ക്കുമുള്ള ഉത്തരമായിട്ടായിരുന്നു ശ്രുതിയുടെ മറുപടി എത്തിയത്.

കൊവിഡ് 19 കാരണം ലോക്ഡൗണ്‍ ആയതിനാല്‍ പാചകവും സംഗീതവുമൊക്കെയായി മുംബൈയിലെ വീട്ടിലാണ് ശ്രുതി ഹാസന്‍. ഇടയ്ക്ക് ചില ചിത്രങ്ങളൊക്കെയായി താരപുത്രി എത്താറുമുണ്ട്. ഇനി സിനിമയുടെ തിരക്കുകളിലേക്ക് മാറാനുള്ള തയ്യാറെടുപ്പിലാണെന്നാണ് അറിയുന്നത്. രവി തേജ നായകനായിട്ടെത്തുന്ന ആക്ഷന്‍ ത്രില്ലര്‍ ചിത്രത്തില്‍ ശ്രുതിയും അഭിനയിക്കുന്നുണ്ട്. അതിനൊപ്പം വിജയ് സേതുപതി കേന്ദ്രകഥാപാത്രത്തെ അവതരിപ്പിച്ച് എസ്പി ജനനാതന്‍ സംവിധാനം ചെയ്യുന്ന സിനിമയുമാണ് ശ്രുതിയുടേതായി വരാനിരിക്കുന്നത്.