ആര്യയല്ല സൂര്യയാണ് സയേഷയുടെ നായകന്‍! കാപ്പാനിലെ നായികാവേഷത്തിന് പിന്നിലൊരു കഥയുണ്ട്! അറിയാമോ?

സയേഷയും സൂര്യയും

കെവി ആനന്ദ് സൂര്യ കൂട്ടുകെട്ടില്‍ പുറത്തിറങ്ങുന്ന പുതിയ സിനിമയെക്കുറിച്ച് പ്രഖ്യാപിച്ചപ്പോള്‍ എല്ലാവരും ഉറ്റുനോക്കിയൊരു കാര്യമുണ്ടായിരുന്നു. ആരാണ് ചിത്രത്തില്‍ നായികയായി എത്തുന്നതെന്നായിരുന്നു ആരാധകര്‍ക്ക് അറിയേണ്ടിയിരുന്നത്. വനമഗനിലും ഗജിനികാന്തിലുമൊക്കെയായി തിളങ്ങി നിന്ന സയേഷയാണ് ഇത്തവണ സൂര്യയുടെ നായികയായി എത്തുന്നതെന്നറിഞ്ഞതോടെ ആരാധകരും സന്തോഷത്തിലായിരുന്നു. സിനിമയുടെ ലൊക്കേഷന്‍ ചിത്രങ്ങളും ഫസ്റ്റ് ലുക്കുമൊക്കെ പുറത്തുവന്നപ്പോഴും സയേഷയുടെ എന്‍ട്രിക്കായി കാത്തിരിക്കുകയായിരുന്നു ആരാധകര്‍. കാത്തിരിപ്പിനൊടുവില്‍ കഴിഞ്ഞ ദിവസമാണ് സയേഷയുടെ ചിത്രങ്ങള്‍ പുറത്തുവന്നത്. പ്രണയിതാക്കളായി നില്‍ക്കുന്ന താരജോഡികളുടെ ചിത്രങ്ങള്‍ സോഷ്യല്‍ മീഡിയയിലൂടെ വൈറലായി മാറിയിരുന്നു.

ഗജിനി റിലീസ് ചെയ്തപ്പോള്‍

സൂര്യയുടെ കരിയറിലെ എക്കാലത്തേയും മികച്ച സിനിമകളിലൊന്നാണ് ഗജിനി. ഇന്നും പ്രേക്ഷക മനസ്സില്‍ നിറഞ്ഞുനില്‍ക്കുന്ന സിനിമ കൂടിയാണിത്. എ ആര്‍ മുരുഗദോസായിരുന്നു ചിത്രമൊരുക്കിയത്. അസിനും നയന്‍താരയുമാണ് ചിത്രത്തില്‍ നായികമാരായി എത്തിയത്. ഗംഭീര വിജയമായി മാറിയ സിനിമയുടെ റീമേക്ക് പതിപ്പുകളും പുറത്തിറങ്ങിയിരുന്നു. 2005ലായിരുന്നു ഈ ചിത്രം റിലീസ് ചെയ്തത്. ഈ സിനിമ റിലീസ് ചെയ്യുമ്പോള്‍ മൂന്നാം ക്ലാസില്‍ പഠിക്കുകയായിരുന്നു സയേഷ.

കാപ്പാനിലെ ചിത്രങ്ങള്‍

പ്രഖ്യാപനവേള മുതല്‍ത്തന്നെ വാര്‍ത്തകളില്‍ നിറഞ്ഞുനിന്ന സിനിമയാണ് കാപ്പാന്‍. ചിത്രീകരണം തുടങ്ങി നാളുകള്‍ കഴിഞ്ഞതിന് ശേഷമാണ് ഈ സിനിമയുടെ പേര് തീരുമാനിച്ചത്. ആരാധകരുടെ അഭിപ്രായം കൂടി പരിഗണിച്ചതിന് ശേഷമായിരുന്നു സിനിമയുടെ പേര് തീരുമാനിച്ചത്. കാപ്പാനുമായി ബന്ധപ്പെട്ട വാര്‍ത്തകളെല്ലാം നിമിഷനേരം കൊണ്ടാണ് വൈറലായി മാറുന്നത്. അടുത്തിടെ പുറത്തുവന്ന ചിത്രങ്ങള്‍ കണ്ടതോടെ ആരാധകരുടെ ആകാംക്ഷയും കൂടിയിരിക്കുകയാണ്. സൂര്യയുടെ നായികയായി അഭിനയിക്കാന്‍ കഴിഞ്ഞതിന്റെ ത്രില്ലിലാണ് സയേഷ. ഇവരുടെ കെമിസ്ട്രി എങ്ങനെയാണെന്നറിയാന്‍ ഇനിയും കാത്തിരിക്കണം. സായ് പല്ലവിക്കും രാകുല്‍ പ്രീതിനുമൊപ്പമായിരുന്നു സൂര്യ അടുത്തിടെ എത്തിയത്.

മോഹന്‍ലാല്‍-സൂര്യ കൂട്ടുകെട്ട്

തമിഴകത്തിന്റെ സ്വന്തം നടിപ്പിന്‍ നായകനായ സൂര്യയ്ക്ക് കേരളത്തില്‍ നിന്നും മികച്ച സ്വീകാര്യതയാണ് ലഭിച്ചുകൊണ്ടിരിക്കുന്നത്. താരസംഘടനയായ അമ്മ നടത്തിയ പ്രത്യേക പരിപാടിയായ അമ്മമഴവില്ലില്‍ പ്രധാന അതിഥിയായെത്തിയത് സൂര്യയായിരുന്നു. അവസാനനിമിഷമായിരുന്നു അദ്ദേഹത്തെ പരിപാടിയിലേക്ക് ക്ഷണിച്ചത്. ആ ക്ഷണം നിരസിക്കാതെ തലസ്ഥാനനഗരിയിലേക്ക് ഓടിയെത്തുകയായിരുന്നു താരം. മമ്മൂട്ടിക്കൊപ്പം മോഹന്‍ലാലിനുമൊപ്പം വേദി പങ്കിട്ട സൂര്യയോട് ഇവര്‍ക്കൊപ്പമുള്ള സിനിമ എന്ന് കാണാനാവുമെന്നുമായിരുന്നു ആരാധകര്‍ ചോദിച്ചത്. ഇതിന് പിന്നാലെയായാണ് കാപ്പാനെക്കുറിച്ചുള്ള പ്രഖ്യാപനമെത്തിയത്. പ്രധാനമന്ത്രിയായി മോഹന്‍ലാല്‍ എത്തുമ്പോള്‍ കമാന്‍ഡോ ഓഫീസറായാണ് സൂര്യ എത്തുന്നത്.

സയേഷയുടെ വരവ്

സൂര്യയുടെ കരിയര്‍ ബ്രേക്ക് ചിത്രമായ ഗജിനി റിലീസ് ചെയ്യുമ്പോള്‍ മൂന്നാം ക്ലാസില്‍ പഠിക്കുകയായിരുന്നു സയേഷ. വര്‍ഷങ്ങള്‍ക്കിപ്പുറം അദ്ദേഹത്തിന്റെ നായികയായി അഭിനയിക്കാനുള്ള അവസരമാണ് ഈ താരത്തിന് ലഭിച്ചത്. വ്യത്യസ്തമായ സിനിമകളിലൂടെ സൂര്യയുടെ ആരാധികയായി മാറിയിരുന്നു സയേഷ. വര്‍ഷങ്ങള്‍ക്കിപ്പുറം ആരാധ്യപുരുഷനൊപ്പം ആടിപ്പാടാന്‍ അവസരം ലഭിച്ചതിന്‍രെ സന്തോഷത്തിലാണ് ഈ താരം.