എന്റെ മക്കളുടെ അമ്മയാവേണ്ടവള്‍! നയന്‍താര കുഞ്ഞിനെ കൈയിലെടുത്ത് നില്‍ക്കുന്ന ചിത്രവുമായി വിഘ്‌നേശ്

മേയ് പത്തിന് ലോക മാതൃദിനമായിരുന്നു. അമ്മമാര്‍ക്ക് ആശംസകള്‍ അറിയിച്ചും അവരുടെ സ്‌നേഹത്തെ കുറിച്ചുമുള്ള പോസ്റ്റുകള്‍ കൊണ്ട് സോഷ്യല്‍ മീഡിയ നിറഞ്ഞു. ഒരു താരങ്ങളും അക്കൂട്ടത്തിലുണ്ടായിരുന്നു. എന്നാല്‍ വിഘ്‌നേശ് ശിവന്റെ പോസ്റ്റാണ് ഏറ്റവുമധികം തരംഗമുണ്ടാക്കിയത്. മറ്റാരും പങ്കുവെക്കാത്ത തരത്തില്‍ വേറിട്ടൊരു ആശംസയുമായിട്ടാണ് വിഘ്‌നേശ് എത്തിയത്. തന്റെ അമ്മയ്ക്ക് മാത്രമല്ല ഭാവി അമ്മായിയമ്മയ്ക്കും തന്റെ കുഞ്ഞുങ്ങളുടെ അമ്മയാവാന്‍ പോകുന്നവള്‍ക്കും കൂടിയാണ് വിഘ്‌നേശിന്റെ ആശംസ.

ഒന്നിലധികം പോസ്റ്റുകളുമായിട്ടാണ് മാതൃദിനത്തില്‍ വിഘ്‌നേശ് ശിവന്‍ എത്തിയത്. ആദ്യം സ്വന്തം അമ്മയ്ക്കും സഹോദരിയ്ക്കുമൊപ്പമുള്ള ചിത്രമായിരുന്നു പങ്കുവെച്ചത്. ചെറുപ്പം മുതല്‍ അമ്മയ്‌ക്കൊപ്പമുള്ള ചിത്രങ്ങളും ഒരു ടിക് ടോക് വീഡിയോയും അതിനൊപ്പമുണ്ടായിരുന്നു. ശേഷം നയന്‍താരയും നടിയുടെ അമ്മയും ഒന്നിച്ചുള്ള ചെറുപ്പം മുതലുള്ളതും അല്ലാത്തതുമായ ചിത്രങ്ങളും വിഘ്‌നേഷ് പോസ്റ്റ് ചെയ്തു. 'മാതൃദിനാശംസകള്‍ മിസിസ് കുര്യന്‍. ഈ സുന്ദരിക്കുട്ടിയെ നിങ്ങള്‍ നന്നായി വളര്‍ത്തി. അമ്മേ നിങ്ങളെ ഞങ്ങള്‍ ഒരുപാട് സ്‌നേഹിക്കുന്നു. നന്ദി അമ്മു... എന്നാണ് ഈ പോസ്റ്റിന് വിഘ്‌നേശ് ക്യാപ്ഷനിട്ടിരിക്കുന്നത്.

എന്നാല്‍ നയന്‍താരയ്ക്ക് മാത്രമായി വിഘ്‌നേശ് നല്‍കിയ ആശംസയാണ് വൈറലായത്. വിദേശത്ത് നിന്നോ മറ്റോ ഒരു കുഞ്ഞിനെ എടുത്ത് നില്‍ക്കുന്ന നയന്‍താരയുടെ ചിത്രമായിരുന്നു വിഘ്‌നേശ് പോസ്്റ്റ് ചെയ്തിരിക്കുന്നത്. എന്നാല്‍ അതിന് കൊടുത്ത താരത്തിന്റെ ക്യാപ്ഷനാണ് ശ്രദ്ധേയം. 'ഇപ്പോള്‍ ഒരു കുഞ്ഞിനെ കൈയിലെടുത്ത് നില്‍ക്കുന്നതും ഭാവിയിലെ എന്റെ കുട്ടികളുടെ അമ്മയാവാന്‍ പോവുന്ന ആള്‍ക്ക് മാതൃദിനത്തിന്റെ ആശംസകള്‍ എന്ന അടിക്കുറിപ്പാണ് വിഘ്‌നേശ് കൊടുത്തിരുന്നത്.

നടി റിബ ജോണ്‍, അടക്കം ഒരുപാട് പേരാണ് വിഘ്‌നേശിന്റെ പോസ്റ്റിന് താഴെ കമന്റുകളുമായി എത്തിയിരിക്കുന്നത്. ഇത്രയും തുറന്ന് പറയാന്‍ നിങ്ങള്‍ക്ക് അല്ലാതെ മറ്റാര്‍ക്കും കഴിയില്ലെന്നാണ് ചിലരുടെ കമന്റ്. എപ്പോഴാണ് വിവാഹം കഴിക്കാന്‍ പോവുന്നത്? വേഗം കല്യാണം കഴിക്കൂ. നിങ്ങള്‍ പറഞ്ഞത് പോലെ തന്നെ ഉടന്‍ സംഭവിക്കട്ടെ എന്ന് തുടങ്ങി വിഘ്‌നേശിനോടും നയന്‍താരയോടും വിവാഹത്തെ കുറിച്ചുള്ള ചോദ്യങ്ങള്‍ വീണ്ടും ഉയരുകയാണ്.