ഇവിടെയുള്ള ഒരു സുന്ദരിയുമായി എനിക്ക് ബന്ധമുണ്ട്; സ്റ്റാര്‍ മാജിക്കിന്റെ വേദിയില്‍ നിന്നും നടന്‍ സുധീഷ്

ഇനി വരാന്‍ പോവുന്ന എപ്പിസോഡിലാണ് സിനിമാ നടന്‍ സുധീഷും ബിഗ് ബോസ് താരം ഡിംപല്‍ ഭാലും ഒരുമിച്ച് പങ്കെടുക്കുന്നത്. ആദ്യം ഡിംപലിനെയാണ് വേദിയിലേക്ക് ക്ഷണിക്കുന്നത്. ബിഗ് ബോസില്‍ കണ്ടത് പോലെ പവര്‍ഫുള്‍ ആയിട്ടാണ് താരത്തിന്റെ എന്‍ട്രി. ഡിംപലിനെ പുകഴ്ത്തി പറഞ്ഞും കളിയാക്കുകയുമൊക്കെ പലരും ചെയ്തിരുന്നു. അവര്‍ക്കൊക്കെ ശക്തമായ മറുപടികള്‍ താരം കൊടുക്കുകയും ചെയ്തു. ഡിംപലിന്റെ ഇംഗ്ലീഷ് ഡയലോഗുകളാണ് പ്രൊമോയിലുള്ളത്.

ഇതിന് പിന്നാലെയാണ് നര്‍മ്മസൂത്രങ്ങള്‍ ഒളിപ്പിച്ച് സുധീഷും എത്തുന്നത്. യുവകോമളനായ തന്നെ ഇവിടേക്ക് ക്ഷണിച്ചതിന്റെ നന്ദി സുധീഷ് പറഞ്ഞിരുന്നു. ഇതിനിടയിലാണ് മണിച്ചിത്രത്താഴിലെ കിണ്ടി എന്ന വിളി വരുന്നത്. പിന്നാലെ 'ഇതിനകത്തുള്ള ഒരു സുന്ദരിയുമായി എനിക്കൊരു ബന്ധം ഉണ്ടെന്ന്' സുധീഷ് പറയുന്നത്. ശ്രീവിദ്യ, അനു, ലക്ഷ്മി നക്ഷത്ര എന്നിങ്ങനെ മൂന്ന് സുന്ദരിമാരാണ് സ്റ്റാര്‍ മാജിക്കില്‍ ഉണ്ടായിരുന്നത്. ഇവരില്‍ ആരാണ് സുധീഷ് പറഞ്ഞ ആ സുന്ദരി എന്നറിയാനാണ് പ്രേക്ഷകരുടെയും കാത്തിരിപ്പ്.

സുധീഷ് പറഞ്ഞത് വെച്ച് അത് നടി ശ്രീവിദ്യ ആവാനാണ് ചാന്‍സ് എന്നാണ് ചിലരുടെ കണ്ടുപിടുത്തം. ആ സമയത്ത് ശ്രീവിദ്യയുടെ മുഖത്ത് വന്ന ചിരി കണ്ടപ്പോള്‍ അങ്ങനെ തോന്നിയെന്നാണ് കമന്റിലൂടെ പറയുന്നത്. എന്തായാലും സുധീഷ് പ്രേക്ഷകരെ പോലും അത്ഭുതപ്പെടുത്തുന്ന നര്‍മ്മ സംഭാഷണങ്ങളുമായി എത്തുമെന്ന കാര്യം ഉറപ്പാണ്. ഇത്രയും തമാശ പറയുന്ന ആളാണെന്ന് മനസിലായെന്നുമൊക്കെയുള്ള കമന്റുകളാണ് താരത്തിന് ലഭിക്കുന്നത്.

ഒരു കാലത്ത് നായകനായി തിളങ്ങി നിന്നിരുന്ന സുധീഷ് പിന്നീട് കോമഡി താരമായി മാറി. അടുത്തിടെയാണ് അഭിനയ പ്രധാന്യമുള്ള കഥാപാത്രങ്ങളിലേക്ക് മാറിയത്. സിനിമാപ്രേമികള്‍ വിചാരിക്കാത്ത ലെവലിലേക്ക് ഉയരാന്‍ സുധീഷിന് സാധിച്ചിരുന്നു. അതുപോലെ മിന്നല്‍ മുരളി എന്ന സിനിമയില്‍ അതിഥി വേഷത്തിലെത്തിയും താരം ഞെട്ടിച്ചിരുന്നു. സുധീഷ് എന്ന സിനിമാ നടന്റെ വേഷത്തില്‍ ആയിരുന്നെങ്കിലും കുറഞ്ഞ സമയത്തിനുള്ളില്‍ കൈയ്യടി വാങ്ങിക്കാന്‍ നടന് സാധിച്ചു.