നിത്യയെ ആദ്യം കണ്ടപ്പോള്‍ കലിയാണ് വന്നത്; എന്തൊരു ജാഡക്കാരിയാണെന്ന് തോന്നിയെന്ന് യമുനയുടെ ഭര്‍ത്താവ് ദേവന്‍

ഇങ്ങനൊരു റിയാലിറ്റി ഷോ തന്റെ ജീവിതത്തിലെ ആദ്യാനുഭവം ആയിരുന്നുവെന്നാണ് ദേവന്‍ പറയുന്നത്. ഞാനും യമുനയും മാത്രമായിട്ടാണ് ഇവിടേക്ക് വന്നത്. എന്നാല്‍ തിരികെ പോകുമ്പോള്‍ വലിയൊരു അമേസിംഗ് ഫാമിലിയെയാണ് ഞങ്ങള്‍ക്ക് കിട്ടിയത്.

ഓരോ ദിവസവും അത്രയും മനോഹരമായിരുന്നു. ഇവിടെയെത്തിയ ആദ്യമൊക്കെ റൂമില്‍ താമസിക്കാന്‍ മടിച്ചു. വേറൊരു ഹോട്ടലില്‍ പോയാണ് താമസിച്ചത്. എന്നാല്‍ പതുക്കെ ഇവരൊക്കെ എവിടെയാണ് താമസിക്കുന്നതെന്ന് അന്വേഷിച്ച് അവിടെ പോയി താമസിച്ച് തുടങ്ങിയെന്നും ദേവന്‍ പറഞ്ഞു.

ഇവരൊക്കെ എവിടെയാണ് താമസിക്കുന്നതെന്ന് ചോദിച്ചു മനസിലാക്കാന്‍ ദേവേട്ടന്‍ എന്നെയാണ് ഏല്‍പ്പിച്ചതെന്ന് പറഞ്ഞാണ് യമുനയും ഈ വിഷയം സംസാരിച്ചത്. എനിക്കിവിടെ പറ്റില്ലെന്ന് ആദ്യം പറഞ്ഞയാളെ ഇപ്പോള്‍ ഇവിടെ നിന്നും തിരുവനന്തപുരത്തേക്ക് വലിച്ചു കൊണ്ട് പോകേണ്ട അവസ്ഥയായി മാറിയെന്ന് യമുന പറയുന്നു.

വിധികര്‍ത്താക്കളായ ജോണി ആന്റണിയെ കുറിച്ചും നിത്യയെ കുറിച്ചും ദേവന്‍ സംസാരിച്ചിരുന്നു. 'എന്തിനും ഏതിനും നന്മ കണ്ടെത്താന്‍ കഴിയുന്ന ഒരാളാണ് ജോണി ചേട്ടന്‍. ഒരു സത്യം പറയട്ടെ, നിത്യ ദാസിനെ ആദ്യം കണ്ടപ്പോള്‍ എനിക്ക് കലിയാണ് തോന്നിയത്. എന്റെ മനസ്സില്‍ ഒരു ജാഡക്കാരി പെണ്ണ് അതായിരുന്നു നിത്യ. നമ്മളോട് ഒന്നും മിണ്ടാതെ നേരെ അവിടെ പോയി ഇരിക്കും. അതുകൊണ്ട് നിത്യയെ ആദ്യം ഇഷ്ടപ്പെട്ടില്ല.

പോകെ പോകെ നിത്യ എന്ന് പറയുന്നത് ഒരു അമേസിങ് പേഴ്‌സണ്‍ ആണൈന്ന് മനസിലായി. മനസ്സില്‍ ഉള്ളത് അതുപോലെ തുറന്ന് പറയുന്ന ഒരു വ്യക്തിയാണ്. ഇപ്പോള്‍ എനിക്ക് ഒരുപാട് ഇഷ്ടമുള്ള വ്യക്തി കൂടിയാണ് നിത്യ. എത്ര പ്രഷര്‍ ഉണ്ടായാലും നിത്യ തന്റെ സ്റ്റാന്‍ഡില്‍ ഉറച്ചു നില്‍ക്കും. അനൂപിന്റെയും ദര്‍ശനയുടെയും കേസില്‍ നിന്ന് തന്നെ അത് മനസിലാക്കാന്‍ സാധിക്കുമെന്നും ദേവന്‍ കൂട്ടിച്ചേര്‍ത്തു.

ഒരു വസ്തു വാങ്ങുന്നതുമായി ബന്ധപ്പെട്ട് തുടങ്ങിയ പരിചയത്തിനൊടുവിലാണ് യമുന റാണിയും ദേവനും പരിചയപ്പെടുന്നത്. ദേവന്റെ സ്ഥലം വാങ്ങിയത് യമുനയായിരുന്നു. ആ അടുപ്പം പിന്നീട് വിവാഹാലോചനയിലേക്ക് എത്തി.

മക്കളുടെ കൂടെ സമ്മതം ലഭിച്ചതോടെ വിവാഹം കഴിക്കാമെന്ന തീരുമാനത്തിലേക്ക് എത്തുകയായിരുന്നു. ഒടുവില്‍ 2020 ഡിസംബറില്‍ താരങ്ങള്‍ വിവാഹിതരായി. യമുന സീരിയല്‍ നടിയായത് കൊണ്ട് തന്നെ നടിയുടെ രണ്ടാം വിവാഹം വലിയ രീതിയില്‍ ചര്‍ച്ചയാക്കപ്പെട്ടു.

വിവാഹത്തിന് ശേഷം സീരിയലില്‍ സജീവമായി അഭിനയിക്കുകയായിരുന്നു യമുന. ഒപ്പം യൂട്യൂബ് ചാനല്‍ കൂടി തുടങ്ങുകയും വീട്ടിലെ വിശേഷങ്ങളും മറ്റും പറയുകയും ചെയ്യുന്നത് പതിവാണ്. ഇതിനിടയിലാണ് ഞാനും എന്റാളും എന്ന റിയാലിറ്റി ഷോ യിലേക്കും എത്തുന്നത്. അതുവരെ ഉണ്ടായിരുന്ന വിമര്‍ശനങ്ങളെല്ലാം മാറ്റിയെഴുതാന്‍ ഇരുവര്‍ക്കും സാധിച്ചതും ഈ ഷോ യിലൂടെയാണ്.